ရွှေလီမြို့နယ် ပြည်သူများ ကိုဗစ်-၁၉ စစ်ဆေးမှုကို လက်မခံ

မြန်မာ – တရုတ် နယ်စပ် ရွှေလီမြို့နယ် နောင်တောင်းကျေးရွာအုပ်စု၊ စယ်ဆိုင်ကျေးရွာအုပ်စု ဒေသခံများ နှင့် မြန်မာရွှေ့ပြောင်းအလုပ်သမားများက တရုတ်အစိုးရ ကျန်းမာရေးဌာနမှ ကိုဗစ် – ၁၉ လာရောက်စစ်ဆေးပေးခြင်းကို လက်မခံကြောင်း စုံစမ်းသိရှိရသည်။

အဆိုပါ ထိုကျေးရွာအုပ်စုထဲတွင် တရုတ်အစိုးရ ကျန်းမာရေးဌာနက ကိုဗစ် – ၁၉ ပိုး လာရောက် စစ်ဆေးပေးရာတွင် ပြည်သူများက အယုံအကြည်မရှိသောကြောင့် အစစ်ဆေးမခံပဲ ယနေ့ အောက်တိုဘာ ၂၆ ရက်တွင် ပြည်သူများက ကန့်ကွက်ပြီး ကိုဗစ် စစ်ဆေးသူများကို မောင်းထုတ်ခဲ့ကြောင်း သတင်းရရှိသည်။

“ သူတို့ကို ကိုဗစ် စစ်ပေးမယ်ဆိုပြီးတော့ လာခဲ့တာ။ သူတို့ကို မယုံတော့ဘူး။ လာစစ်တဲ့ အချိန်တိုင်းလည်း ကိုဗစ် ပိုးတွေ့တယ်ဆိုပြီးတော့ Lockdown ချတယ်။ Lockdown ချတော့ ကျနော်တို့ အလုပ်မလုပ်ရဘူး။ စားဝတ်နေရေးခက်တယ်။ အဲ့ကြောင့် ကျနော်တို့ အစစ်ဆေးမခံတော့ဘူး။ ပြန်မောင်းထုတ်လိုက်တာ” ဟု နောင်တောင်းကျေးရွာ ဒေသခံတစ်ဦးက ပြောသည်။

လက်ရှိ အချိန်တွင်လည်း စပါးရိတ်သိမ်းချိန်ဖြစ်သည့်အတွက်ကြောင့် ရွှေလီမြို့နယ် နောင်တောင်းကျေးရွာအုပ်စု နှင့် စယ်ဆိုင်ကျေးရွာအုပ်စု နောင်ဆာကျေးရွာ ဒေသခံများသည် ကိုဗစ် – ၁၉ ပိုး လက်ခံစစ်ဆေးမှု မပြုလုပ်ကြကြောင်း သိရသည်။

“ ခက်ခဲတာပေါ့။ အခုက စပါးရိတ်သိမ်းချိန် ဖြစ်တယ်လေ။ ကိုဗစ် လာစစ်ပြီး တစ်ခုခုဖြစ်တယ်ပြောရင် ကျနော်တို့လည်း ဘာမှလုပ်လို့ မရတော့ဘူး။ အလုပ်မဖြစ်ဘူးလေ။ ဒီလို လုပ်လာတာလည်း ၃ နှစ်ရှိနေပြီ။ ကျနော်တို့လည်း စားဝတ်နေရေး ခက်ခဲလာခဲ့တယ်” ဟု အထက်ပါ နောင်တောင်း ဒေသခံ အမျိုးသားက ပြောသည်။

ထိုအပြင် နောင်တောင်းကျေးရွာ အုပ်စု နှင့် စယ်ဆိုင်ကျေးရွာအုပ်စုများတွင် ကျန်းမာရေးဌာနမှ ကိုဗစ် – ၁၉ ပိုးလာစစ်ပေးချိန်တိုင်း ပိုးတွေ့ရှိသည်ဟု ဆိုကာ Quarantine ဝင်ခိုင်းပြီး စားစရိတ်အတွက် တစ်ဦးကို အနည်းဆုံး ယွမ် (၁,၀၀၀) မြန်မာငွေ ၄ သိန်းကျပ် အထိ ကုန်ကျကြောင်း သိရသည်။

“ သူတို့ လာစစ်တိုင်းက ပိုးတွေ့တယ်ဆိုပြီးတော့ ပြောတယ်။ အတင်း စစ်ဆေးခိုင်းတယ်။ ပိုးတွေ့တယ်ဆိုရင် Quarantine သွားဝင်ခိုင်းတယ်။ သွားဝင်ရင်လည်း တစ်ယောက်ကို အနည်းဆုံး တရုတ်ငွေ ၁,၀၀၀ လောက်ကုန်တယ်။ စားစရိတ်တွေလည်း ကိုယ်တိုင်ထုတ်ရတယ်” ဟု နောင်တောင်းဒေသခံ တစ်ဦးက ပြောသည်။

အဆိုပါ ရွှေလီမြို့နယ်တွင် ကိုဗစ် – ၁၉ အကြောင်းပြပြီး Lockdown ဖွင့် ပိတ်လုပ်ရာတွင် ၃ နှစ်ကြာလာသောကြောင့် ပြည်သူများက အလုပ်ကို ပုံမှန်မလုပ်ရတော့ကြောင်း သိရသည်။

“ အလုပ်တွေ ပုံမှန်မလုပ်ရတော့ဘူး။ ဝင်ငွေတွေလည်း အရင်ကလိုမျိုး မရတော့ဘူး။ သူတို့ Lockdown ကို ဖွင့်လိုက်ပိတ်လိုက်လုပ်နေတာပဲ။ ဈေးတွေ ပုံမှန်မရောင်းရတော့ဘူး။ အရင်က ငွေ ၁၀,၀၀၀ လောက်ဝင်ရင် အခုက ၅,၀၀၀ လောက်ပဲရတော့တယ်” ဟု ရွှေလီမြို့ ကုန်သည်တစ်ဦးက ပြောသည်။

အလားတူ တရုတ်နိုင်ငံ ရွှေလီမြို့ သို့ ရောက်ရှိနေသည့် မြန်မာရွှေ့ပြောင်းအလုပ်သမားတစ်ဦးလည်း “ ဘာအလုပ်မှ လုပ်လို့ မရတော့ဘူး။ နိုင်ငံကလည်း ပိတ်ထားတယ်လေ။ ကျနော်တို့ ရွှေ့ပြောင်းအလုပ်သမားတွေကလည်း ဘာအလုပ်မှ လုပ်လို့မရတော့ဘူး။ အခန်းခ၊ မီးဖိုး ရေဖိုးတွေလည်း ပေးရတယ်လေ။ တစ်ချို့ဆိုရင် ပြည်တွင်းကိုပြန်သွားတာရှိတယ်။ အခုတော့ အသိမိတ်ဆွေတွေနဲ့နေပြီး ရှိတာကူလုပ်ပေးတယ်။ သူများ အကူညီနဲ့ပဲ နေရတာပေါ့” ဟု ပြောသည်။

ရွှေလီမြို့တွင် ပြီးခဲ့သည့် အောက်တိုဘာ ၁၂ ရက်နေ့က Lockdown ချ ထားပြီး အောက်တိုဘာ ၁၉ ရက် တွင် ပြန်ဖွင့်ပေးခဲ့ကြောင်း သိရသည်။