မြန်မာ – တရုတ်နယ်စပ် တရုတ်ပြည် ရွှေလီမြို့အတွင်း ကိုဗစ် – ၁၉ ကူးစက်မှု ပြန်လည်မြင့်တက်လာသဖြင့် ရွှေလီမြို့ တမြို့လုံးကို Lockdown ပြန်လည်ချထားလိုက်ကြောင်း စုံစမ်းသိရှိရသည်။

ယနေ့ အောက်တိုဘာ ၁၂ ရက် မနက် (၁) နာရီ မှ စတင်ပြီး ရွှေလီမြို့တမြို့လုံးကို Lockdown ပြန်လည် ချထားပြီး ယခင်ထက် ပိုမိုတင်းကြပ်ပြီး ကိုဗစ် – ၁၉ ရောဂါသွားရောက် စစ်ဆေးခြင်းမှအပ အိပ်ပြင်သို့ထွက်ခြင်း၊ လယ်ယာသွားခြင်း၊ ဈေးဆိုင်ရောင်းခြင်း၊ ဟင်းသီးဟင်းရွက် ရောင်းခြင်း စသည်ဖြင့် မပြုလုပ်ရန် ကန့်သတ်ထားကြောင်း ရွှေလီမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

“၉ ရက်နေ့ ကနေ ၁၀ ရက်နေ့ထိက မြို့ရဲ့တစ်ဝက်ကို Lockdown ချထားတယ်။ ဒီမနက် ၁ နာရီမှာ တစ်မြို့လုံး
Lockdown ပြန်ချထားတယ်လို့ ထုတ်ပြန်လာတယ်။ အရင်က အိမ်ပြင်ထွက်ခွင့် ပြုသေးတယ်။ အခုတစ်ကြိမ် က အရမ်းတင်းကြပ်ထားတယ်။ သူတို့ ကိုဗစ် – ၁၉ ရောဂါ စစ်ဆေးဖို့ လူကိုခေါ်တာကလွဲရင် အိမ်ပြင်ကို လုံးဝ ထွက်ခွင့်မပေးတော့ဘူး “ ဟု ၎င်းဒေသခံ တစ်ဦးကပြောသည်။

ရွှေလီမြို့တွင်း Lockdown ပြန်လည် ချထားခြင်းမှာ ရက်အကန့်သတ်ဖြင့် ယနေ့ အောက်တိုဘာ ၁၂ ရက်မှ စ၍ အောက်တိုဘာ ၁၆ ရက် အထိ သတ်မှတ်ထားကြောင်း သိရသည်။

“ဒီတစ်ကြိမ် သူတို့ Lockdown ချထားတာ အရမ်းတင်းကြပ်တယ်။ အိမ်ပြင်လုံးဝ မပေးထွက်ဘူး။ စက်တင်ဘာလ ကစပြီး အောက်တိုဘာလအတွင်း ကိုဗစ် ကူးစက်သူတွေ (၁၀၀) ဦး ထက်မနည်း များလာတယ်။ မနေ့က ကူးစက်သူ (၂၆) ယောက်ရှိတယ်။ အရင်နေ့တွေထက် များလာတယ်” ဟု ရွှေလီဒေသခံ အမျိုးသား တစ်ဦး ကပြောသည်။

အဆိုပါ ကိုဗစ် – ၁၉ ရောဂါ ကူးစက်ခံရသူ ပြန်လည်ကျဆင်းမှုမရှိသေးပါက Lockdown ချထားသော ရက်များကို ထပ်မံတိုးမြင့်သွားမည် ဖြစ်ကြောင်း ဆိုသည်။