သျှမ်းပြည်တောင်ပိုင်း တောင်ကြီးမြို့တွင် ကိုဗစ်-၁၉ ရောဂါတစ်ကြော့ ပြန်လည်များလာပြီး ပိုးတွေ့လူနာများကို တစ်ချို့ ပုဂ္ဂလိက ဆေးရုံများက လက်ခံကုသပေးခြင်းမရှိတော့ကြောင်း စုံစမ်း သိရှိရသည်။

ပြီးခဲ့သည့် အောက်တိုဘာ ၁၉ ရက်နေ့တွင် သံဃာတော်တစ်ပါး တောင်ကြီးမြို့ ပုဂ္ဂလိက ဆေးရုံတစ်ခုတွင် ဆေးလာကုသရာမှ ကိုဗစ်-၁၉ ပိုးတွေ့ရှိသောကြောင့် ဆေးလက်ခံ ကုသပေးခြင်း မရှိတော့ကြောင်း သိရသည်။

“ကျမတို့လည်း အဲ့လိုကြားတယ်။ ကိုဗစ် ပိုးတွေ့လိုဆိုပြီးတော့ သူတို့က လက်ခံမကုပေးတာတဲ့။ ဘာကြောင့် ကိုဗစ် ပိုးတွေ့လူနာကို မကုပေးတော့တာလဲတော့ မသိဘူး။ တောင်ကြီးက ပြင်ပဆေးရုံတစ်ခုပဲ။ နာမည်တော့ ကျမ မပြောချင်တော့ဘူး။ အရင်တွေကတော့ ကုပေးတယ်” ဟု တောင်ကြီးမြို့ ဒေသခံ အမျိုးသမီးတစ်ဦးကပြောသည်။

အလားတူ လက်ရှိ တောင်ကြီးမြို့တွင် ကိုဗစ် – ၁၉ လူနာ ပြန်လည်များပြားလာပြီး ပရဟိတ များထံတွင်လည်း အောက်ဆီဂျင်အိုး ငှားယူသူများလည်း ပြန်လည် များပြားလာကြောင်း သိရသည်။ သို့သော် အများစုက နေအိမ်တွင် မိမိဘာသာ ကုသနေပြီး ယခင်ထက် ပြည်သူများက ဂရုစိုက်မှု မရှိတော့ကြောင်း သိရသည်။

“ပိုးတွေ့ လူနာများလာလားတော့ မသိဘူး။ ဒါမယ့် ပရဟိတ တွေမှာတော့ အောက်ဆီဂျင် လာငှားတဲ့ သူများတယ်တဲ့။ ပြည်သူတွေလည်း ပုံမှန်အတိုင်း သွားလာနေတာပဲ။ အရင်လောက် ဂရုမစိုက်ကြတော့ဘူး။ ပုံမှန်အတိုင်းပဲ သွားလာနေကြတယ်။ ဈေးတွေလည်း ဒီတိုင်းဖွင့်နေတာပဲ” ဟု တောင်ကြီးမြို့ ဒေသခံ က ပြောသည်။

အောက်တိုဘာ (၁၈) မှ (၂၀) ရက်နေ့ထိ သျှမ်းပြည်တွင်း ကိုဗစ်-၁၉ ကူးစက်သူ စုစုပေါင်း (၂၈) ဦးရှိကြောင်း စစ်ကောင်စီ လက်အောက်ခံ အားကစား နှင့် ကျန်းမာရေး ဝန်ကြီးဌာန ထုတ်ပြန်ချက် အရသိရသည်။

လက်ရှိ သျှမ်းပြည်တစ်ဝှမ်းတွင် ကိုဗစ် – ၁၉ ရောဂါ ပိုးတွေ့ လူနာရှိပေမယ့် ပြည်သူများ ပုံမှန်တိုင်း သွားလာလှုပ်ရှားနေလျှက်ရှိသည်။