သျှမ်းမြောက် ကျောက်မဲနှင့် သီပေါမြို့နယ်တို့တွင် နယ်မြေအငြင်းပွားမှုကြောင့် တိုင်းရင်းသားလက်နက်ကိုင် အချင်းချင်းကြား တိုက်ပွဲ ဆက်လက်ပြင်းထန်လာနိုင်ကြောင်း စုံစမ်းသိရသည်။

သျှမ်းပြည်မြောက်ပိုင်းနှင့် တောင်ပိုင်းနယ်စပ်ကြား သျှမ်းတပ် (၂)တပ်ဖြစ်သည့် သျှမ်းပြည်ပြန်လည် ထူထောင်ရေး ကောင်စီ (RCSS/SSA)နှင့် သျှမ်းပြည်တိုးတက်ရေးပါတီ (SSPP/SSA)တို့ သည် နယ်မြေ အငြင်းပွားမှုကြောင့် တိုက်ပွဲ သဖန်ပြင်းထန်လာပြီး ဒေသခံ ရာချီ ထွက်ပြေးတိမ်းရှောင်နေရကြောင်း သိရသည်။

“ဒီရက်ပိုင်းအတွင်း နမ့်လန်ဒေသမှာ RCSS ဖက်ကနေ လာရောက်ပစ်ခတ်တာတွေ ရှိလို့ တိုက်ပွဲတွေ ပြန်ဖြစ်နေတယ်၊ နယ်ခြားထားတဲ့နေရာတွေကို မကျော်လာဘူး ဆိုရင်တော့ တိုက်ပွဲက ဖြစ်မှာ မဟုတ်ဘူး” ဟု SSPP/SSA ပြောရေးဆိုခွင့်ရှိသူ ဗိုလ်မှူးကြီး စိုင်းဆု က သျှမ်းသံတော်ဆင့်ကို ပြောသည်။

ထို့အပြင် နယ်မြေကျူးကျော် တိုက်ခိုက်မှုများ ဆက်ရှိနေပါက သျှမ်းတောင်ပိုင်း ကျေးသီးမြို့နယ်၊ မိုင်းကိုင်မြို့နယ်ထိ တိုက်ပွဲ ကူးဆက် သွားနိုင်ကြောင်း ဗိုလ်မှူးကြီး စိုင်းဆု ပြောသည်။

“နောက်ထပ် နယ်မြေကျူးကျော်တာတွေ ရှိရင်တော့ နမ့်လန်ဒေသအပြင် ကျေးသီး၊ မိုင်းကိုင်ဖက်တွေပါ ဆက်ဖြစ်သွားနိုင်ပါတယ်၊ သူတို့ဖက်ကသာ နောက်ဆုတ်လိုက်ရင်တော့ တွေ့ဆုံဆွေးနွေးပြီး နယ်မြေသတ်မှတ်တာတွေ၊ တိုက်ပွဲပြီးဆုံးတာတွေလည်း ဖြစ်လာနိုင်ပါတယ်” ဟု ဗိုလ်မှူးကြီး စိုင်းဆု က ဆိုသည်။

တဖက်ကလည်း သျှမ်းမြောက် တိုက်ပွဲ ကိစ္စနှင့်ပတ်သက်ပြီး တဖက်တပ် (SSPP/SSA) လှုပ်ရှားမှုပေါ် မူတည် ကြောင်း၊ တဖက်တပ်မှ လာရောက် မတိုက်ပါက စစ်ရေးလျော့ကျနိုင်ကြောင်း RCSS/SSA ပြောရေးဆိုခွင့်ရှိသူ ဗိုလ်မှူး ခမ်းစံက သျှမ်းသံတော်ဆင့်ကို ပြောသည်။

“နောက်ထပ် တိုက်ပွဲတွေ ပြင်းထန်လာနိုင်လား ဆိုတာကတော့ တစ်ဖက်က တပ်တွေရဲ့ အနေအထားပေါ် မူတည်တယ်၊ သူတို့တွေ လာမတိုက်ဘူး ဆိုရင် တိုက်ပွဲက ဆက်ဖြစ်မှာမဟုတ်ဘူး” ဟု ဗိုလ်မှူး စိုင်းခမ်းစံ က ပြောသည်။

သျှမ်းတပ် (၂)တပ်ကြား တွေ့ဆုံဆွေးနွေးမှုသည် ယခင်တွင် အဖြေရှာခဲ့ဖူးကြောင်း၊ သို့သော် တဖက်မှာ စစ်ရေး နှင့် တိုက်ခိုက်လာပါက ပြန်လည်ခုခံရသည့်အနေအထားဖြစ်ကြောင်းလည်း ဗိုလ်မှူးခမ်းစံ က ဆိုသည်။

“အရင်ကတည်းက တွေ့ဆုံဆွေးနွေးပြီး အဖြေရှာခဲ့ဖူးပါတယ်၊ ဒါပေမယ့် တစ်ဖက်က စစ်ရေးနဲ့ပဲ တိုက်ခိုက်လာနေတာဆိုတော့ ကိုယ့်ကိုယ်ကို ကာကွယ်တဲ့အနေနဲ့ပဲ ပြန်လည် ခုခံနေတာပါ။ အဲ့ဒါကြောင့် ဒီပြဿနာကို မဖြေရှင်းနိုင်သေးဘူး” ဟု ဗိုလ်မှူးခမ်းစံ က ထပ်လောင်းပြောသည်။

သျှမ်းပြည်တွင် လက်ရှိကာလမှာ စစ်အာဏာရှင် အမြစ်ပြတ်တိုက်ခိုက်ရေး လှုပ်ရှားမှုကြောင့် အကြပ်အတည်းကြုံနေရချိန်၊ တဖက်တွင် ကိုဗစ်-၁၉ ကူးစက်မှုနှုန်းမြင့်တက်မှုကြောင့် အခက်အခဲ ရင်ဆိုင်နေရချိန်ဖြစ်သည်။

ထို့ပြင် သျှမ်းတပ်(၂)တပ် နယ်မြေ အငြင်းပွားမှုကြောင့် စစ်ရှောင်များ ထွက်ပြေးတိမ်းရှောင်နေရပြီး ကိုဗစ်ကာလ သွားလာကန့်ကွက်ချက်များကြောင့် စစ်ရှောင်များ စားနပ်ရိက္ခာ ခက်ခဲနေကြောင်း ဒေသခံများ ပြောပြချက် အရသိရသည်။

“စစ်ရှောင်တွေက ပိုများလာတယ်၊ ကိုဗစ်ကာလ ဆိုတော့ စစ်ရှောင်တွေကို လှူဒါန်းမှုတွေကလည်း အားနည်းသွားတယ်၊ တိုက်ပွဲတွေ အမြန်ဆုံး အဆုံးသတ်ဖို့ မျှော်လင့်တယ်” ဟု ကျောက်မဲမြို့မှ စစ်ရှောင်များကို ကူညီနေသည့် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ်အတွင်း တိုက်ပွဲဖြစ်ပွားနေမှုတွင် သျှမ်းတပ်(၂)တပ်အပြင် TNLA လည်း ပါဝင်ပတ်သက်နေသည့် အတွက် သျှမ်းသံတော်ဆင့်အနေဖြင့် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ပြောရေးဆိုခွင့်ရှိသူကို ဆက်သွယ်ခဲ့သော်လည်း အဆက်အသွယ် မရခဲ့ပေ။

“ တိုင်းရင်းသားအချင်းချင်း၊ ကိုယ့်လူမျိုးအချင်းချင်းကြားဘာကြောင့် တွေ့ဆုံဆွေးနွေးမှု ညှိနှိုင်းမရကြတာလဲ။ တခြားသူတွေနဲ့တောင် ညှိလို့ရနေတာ။ အချင်းချင်းကြားညှိမရတာတော့ စဉ်းစားလို့မရဘူး” ဟု စစ်ရှောင်များကို ကူညီပေးနေသည့် အမျိုးသမီး တစ်ဦးက သျှမ်းသံတော်ဆင့် ကို ပြောသည်။

သြဂုတ်လ (၁၁)ရက်နေ့မှ စတင်ပြီး တိုင်းရင်းသားလက်နက်ကိုင်များကြား တိုက်ပွဲပြန်လည် ပြင်းထန်လာမှုကြောင့် ကျောက်မဲနှင့် သီပေါမြို့နယ်တို့တွင် စစ်ဘေးရှောင်သူ (၂၀၀၀)ဝန်းကျင်ထိ ရှိနေကြောင်း၊ တိုက်ပွဲများပြီးဆုံးရန် တွေ့ဆုံဆွေးနွေးကာ အမြန်ဆုံး အဖြေရှာသင့်ကြောင်း ဒေသခံများက တောင်းဆိုလိုက်သည်။