သျှမ်းပြည်မြောက်ပိုင်း သီပေါမြို့နယ် အတွင်း ယနေ့ (သြဂုတ် ၂၃)ရက် မနက်ပိုင်း တွင် သျှမ်းတပ် (၂) တပ် ဖြစ်ပွားသည့် တိုက်ပွဲကြောင့် ဒေသခံ ပြည်သူ အများအပြား ထွက်ပြေးနေရကြောင်း စုံစမ်းသိရှိရသည်။
ယနေ့ မနက် (၆) နာရီခန့်မှ စပြီး သျှမ်းတပ် (၂) တပ်သည် သီပေါမြို့နယ် နမ့်လန်ဒေသ ဝမ်စိမ်းကျေးရွာအုပ်စု ကုံးကော်ကျေးရွာအနီးတွင် တိုက်ပွဲပြင်းထန်ပြီး ဒေသခံများ နမ့်လန်ဒေသ ကုံးကော်ဘုန်းကြီးကျောင်းမှာ (၅၀၀) ကျော် ထွက်ပြေးလာပြီး မိုင်းကိုင်မြို့နယ် တုံလောကျေးရွာအုပ်စုဘက်တွင်လည်း ထွက်ပြေးလာခဲ့ကြောင်း စုံစမ်းသိရှိရသည်။
“ လူတွေ အားလုံးကတော့ ထွက်ပြေးလာပြီ၊ တချို့ကလည်း ထော်လဂျီရတယ်။ တချိုကလည်း ဘာမှ ကိုမရဘူး။ ကျနော်တို့ ထွက်ပြေးလာတုန်းက သေနတ်သံတွေကြားနေရတုန်းပဲ” ဟု နမ့်လန် ရောက်နေသည့် စစ်ရှောင် အမျိုးသား တစ်ဦးက သျှမ်းသံတော်ဆင့်ကို ပြောသည်။
သီပေါမြို့နယ် ဝမ်စိမ်းကျေးရွာအုပ်စုအတွင်းတွင် တိုက်ပွဲ (၂)နေရာဖြစ်ပြီး တချို့ မှာ တိုက်ပွဲထဲတွင် ပိတ်မိနေသေးကြောင်း၊ ထွက်းပြေးလာသူအများစုသည် တစုံတရာမျှ မပါလာဘဲ ထွက်ပြေးလာရကြောင်း၊ လက်ရှိမှာစားဝတ်နေရေးအတွက် ခက်ခဲနေကြကြောင်း လည်း ကုံးကော်ကျေးရွာမှ စစ်ရှောင်လာသူ တစ်ဦး က ပြောသည်။
“တိုက်ပွဲ့ အရမ်းပြင်းထန်တယ်။ တစ်ချို့ကျေးရွာဆို ထွက်လာလို့မရသေးဘူး။ ကျနော်တို့ ထွက်ပြေးလာတော့ ဘာမှ မရဘူး။ အဓိက အစားအသောက်ခက်ခဲတယ်။ သေနတ်သံကြားတော့ ကြောက်ပြီးပြေးလာကြတာ” ဟု ၎င်းထွက်ပြေးလာသူတစ်ဦးက ဆိုသည်။
ယနေ့ မနက်တိုက်ပွဲကြောင့် တချို့သည် သျှမ်းပြည်တောင်ပိုင်း မိုင်းကိုင်မြို့နယ် တုံလောကျေးရွာအုပ်စု ပန်လန့်ဘုန်းကြီးကျောင်းသို့ ရောက်ရှိလာသူများလည်း ရှိကြောင်း သိရသည်။
“နှစ်ဖက် စစ်ရေးတင်းမာမှုရှိနေသေးတော့ ပြည်သူတွေ ထွက်ပြေးလာတာများတယ်။စာရင်း တိကျတော့ မရသေးဘူး။ စစ်ရှောင်တွေက ဟိုတစ ဒီတစ ဖြစ်နေတယ်” စစ်ရှောင်များကို ကူညီပေးနေသည့် သူတစ်ဦးကပြောသည်။
သျှမ်းတပ် (၂) တပ်သည် ဇွန်လဆန်းပိုင်းက စတင်ကာ နယ်မြေ အငြင်းပွားမှု ပြသာနာဖြင့် အပြန်အလှန် တိုက်ခိုက်နေကြပြီး ထိုတိုက်ပွဲကြောင့် လယ်ယာလုပ်ငန်းကို စွန့်ခွာရပြီး စစ်ရှောင်နေရကြောင်းသိရသည်။
လက်ရှိ ကာလမှာ ကိုဗစ် ကူးစက်မှုနှုန်းမြင့်တက်လာပြီး စီးပွားရေး အခက်အခဲကြား သျှမ်းတပ်(၂)တပ် တိုက်ပွဲ ထပ်မံဖြစ်ပွားမှုကြောင့်လည်း သျှမ်းလူထုများသည် အခက်အခဲပေါင်းများစွာ ကြုံနေရကြောင်းသိရသည်။
Leave a Comments