သျှမ်းပြည် မြောက်ပိုင်း သီပေါမြို့နယ် အတွင်း ယနေ့ (သြဂုတ် ၂၃)ရက် မနက်ပိုင်း သျှမ်းတပ်(၂)တပ် တိုက်ပွဲ ဆက်လက်ပြင်းထန်နေပြီး ဒေသခံ ပြည်သူများ ထပ်မံထွက်ပြေးနေရကြောင်း စုံစမ်းသိရသည်။
ယနေ့ မနက် (၆)နာရီခန့်မှ စပြီး လက်ရှိ အချိန်ထိ သျှမ်းတပ် (၂)တပ်သည် သီပေါမြို့နယ် ကုံးကော်ကျေးရွာ အနီးတွင် တိုက်ပွဲပြင်းထန်းနေသဖြင့် ဒေသခံများသည် သျှမ်းတောင် မိုင်းကိုင်မြို့နယ် တုံလောကျေးရွာအုပ်စုရှိ ပန်လန့်ဘုန်းကြီးကျောင်းသို့ထွက်ပြေးတိမ်းရှောင်နေရကြောင်း သတင်းရရှိသည်။
“ တိုက်ပွဲက သျှမ်းတောင်နဲ့ သျှမ်းမြောက် နယ်စပ်မှာ ဖြစ်တာ။ ခုထိ သေနတ်သံတွေ ကြားနေရတုန်းပဲ၊ ထွက်ပြေးတဲ့သူတွေရှိတယ်။ စာရင်းအတိအကျတော့မသိရဘူး” မိုင်းကိုင်မြို့နယ် တုံလောကျေးရွာ ဒေသခံ တစ်ဦး က သျှမ်းသံတော်ဆင့်ကို ပြောသည်။
သျှမ်းတပ် (၂) တပ်တိုက်ပွဲကြောင့် လက်ရှိ မှာ စစ်ရှောင် (၁၀၀)ခန့်ရောက်ရှိနေပြီး ၎င်းစစ်ရှောင်များအတွက် စားနပ်ရိက္ခာနှင့် မိုးကားများလိုအပ်နေကြောင်းလည်း သတင်းရရှိသည်။
“ဒီနေ့ ထပ်ရောက်လာတဲ့ စစ်ရှောင်အတွက် နေထိုင်ဖို့ အမိုးအကာတွေ လိုအပ်တယ်။ လူထပ်တိုးလာတော့ စားနပ်ရိက္ခာတွေလည်း ထပ်လိုအပ်တယ်” ဟု စစ်ရှောင်များကို ကူညီပေးနေသည့် သူ တစ်ဦးကပြောသည်။
သျှမ်းတပ် (၂) တပ် အချင်းချင်း တိုက်ပွဲကြောင့် ဒေသခံများ ထွက်ပြေးတိမ်းရှောင်ရပြီး၊ အခက်ခဲများစွာ ရင်ဆိုင်နေရကြောင်း တိုက်ပွဲများ ရပ်နားကြရန်လည်း စစ်ရှောင်လာသည့် ပြည်သူများက တောင်းဆိုသည်။
သျှမ်းတပ် (၂) တပ်သည် ဇွန်လဆန်းပိုင်းက စတင်ကာ နယ်မြေ အငြင်းပွားမှု ပြသာနာဖြင့် အပြန်အလှန် တိုက်ခိုက်နေကြပြီး ထိုတိုက်ပွဲကြောင့် လယ်ယာလုပ်ငန်းကို စွန့်ခွာရပြီး စစ်ရှောင်နေရသဖြင့် နောင်နှစ် စားဝတ်နေရေးအတွက်လည်း စိုးရိမ်နေကြကြောင်း သိရှိရသည်။
