သျှမ်းမြောက် ကျောက်မဲမြို့နယ် နမ့်မန်းကျေးရွာတွင် ငှက်ပျောဖူးဆင်းခူးသည့် လင်မယား မိုင်းနင်းမိပြီး အမျိုးသားသေဆုံးခဲ့ကြောင်း သတင်းရရှိကြောင်းသိရသည်။
ကျောက်မဲမြို့ ရပ်ကွက်(၇) နှစ်မိုင်ကုန်းတွင် နေထိုင်သူများဖြစ်သည့် လင်မယား(၂)ဦး နမ့်မန်း − ပုံးလုံကျေးရွာသွားလမ်းဘေးတွင် ငှက်ပျောဖူး သွားခူးရာမှ မိုင်းနင်းမိကာ အမျိုးသား သေဆုံးခဲ့တာဖြစ်ကြောင်း ဒေသခံများထံမှ သိရသည်။
“နမ့်မန်းကနေ ပုံးလုံရွာကို တက်တဲ့ လမ်းဘေးမှာ ယောက်ျားဖြစ်သူက ငှက်ပျောဖူးသွားခူးရင်း မိုင်းနင်းမိတာ၊ ခန္ဓာကိုယ်အပေါ်ပိုင်း တစ်ခုလုံး ဒဏ်ရာတွေ ရထားတာတွေ့တယ်၊ မိန်းမက လမ်းဘေးမှာပဲ စောင့်နေလို့ ဒဏ်ရာမရဘူး” ဟု နမ့်မန်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
သြဂုတ်လ (၁၉)ရက်နေ့ မွန်းလွဲ (၂)နာရီအချိန်ခန့်တွင် အဆိုပါနေရာ၌ မိုင်းနင်းမိခဲ့တာဖြစ်ပြီး အမျိုးသားဖြစ်သူ အသက် (၃၅)နှစ်အရွယ်ရှိ ကိုကျော်လွင်မှာ မိုင်းစထိမှန်သော ဒဏ်ရာများဖြင့် သေဆုံးခဲ့တာ ဖြစ်ကြောင်း စုံစမ်းသိရသည်။
ထိုဒေသတို့ လာရောက်သူများအနေဖြင့် ဒေသခံများထံ ကြိုတင်စုံစမ်းပြီးမှ သွားလာစေချင်ကြောင်း ဒေသခံတစ်ဦးက ယခုလို ပြောသည်။
“ဒီရွာဘက် လာတဲ့သူအားလုံးကို သတိထားစေချင်ပါတယ်၊ မလာခင်မှာ ဒီနယ်မြေအနေအထားကို အရင်စုံစမ်းပြီးမှ လာကြပါ၊ ဖြစ်နိုင်မယ်ဆိုရင်တော့ ဘယ်သူ့ကိုမှ မလာစေချင်ဘူး၊ အန္တရာယ်များလွန်းလို့ပါ” ဟု နမ့်မန်းဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။
နမ့်မန်းကျေးရွာအနီးတစ်ဝိုက်တွင် တိုင်းရင်းသားလက်နက်ကိုင်တပ်များ မကြာခဏ တိုက်ပွဲဖြစ်ပွားသည့်အတွက် အချို့နေရာများတွင် ဒေသခံများကိုယ်တိုင် သွားလာခြင်းမပြုလုပ်ကြောင်း၊ ယခုကာလ မှိုရှာ၊ မျှစ်ချိုးလာသည့် အခြားဒေသမှ ပြည်သူများအတွက် အန္တရာယ်ပိုရှိနိုင်သည့်အတွက် သတိပိုထားသင့်ကြောင်း ဒေသခံများက ပြောသည်။
ယခု သြဂုတ်လအတွင်း အဆိုပါ ကျောက်မဲ − မိုင်းငေါ့ လမ်းမကြီးပေါ်ရှိ နမ့်မန်းကျေးရွာအနီးတွင် မိုင်းနင်းမိမှု (၂)ကြိမ်ဖြစ်ပွားခဲ့ကြောင်း၊ ပြီးခဲ့သည့် သြဂုတ်လ (၁၅)ရက်နေ့တွင်လည်း မျှစ်ချိုးလာသည့် သားအဖ (၂)ဦး မိုင်းထိကာ ဒဏ်ရာရရှိခဲ့ကြောင်း သိရသည်။
Leave a Comments