သျှမ်းပြည် အရှေ့ပိုင်း တာချီလိတ်မြို့တွင် ကိုဗစ် – ၁၉ တတိယလှိုင်း အတွင်း ရောဂါပိုး ကူးစက်ခံရသူ အတည်ပြုလူနာများ အဆမတန်များပြားလာသည့် အပြင် သေဆုံးသည့် အတည်ပြုလူနာများလည်း များ ပြားလာကြောင်း သတင်းသိရသည်။
“တာချီလိတ်မြို့မှာ ကိုဗစ်ရောဂါနဲ့ သေဆုံးမှုနှုန်းမြင့်မားလာပါတယ်၊ မနေ့က ဩဂုတ်လ (၁၆) ရက်နေ့မှာ အမျိုးသား (၃)ဦး နဲ့အမျိုးသမီး (၂)ဦး တစ်ရက်ထဲ (၅) ဦးသေဆုံးသွားခဲ့ပါတယ်” ဟု တာချီလိတ်မြို့နေ ပြည်သူ တစ်ဦးက သျှမ်းသံတော်ဆင့်ကို ပြောသည်။
တာချီလိတ်မြို့ ဆေးရုံဟောင်းအတွင်း ထားရှိသည့် Fever Clinic စင်တာသည်လည်း ကိုဗစ် – ၁၉ ရောဂါများ ကို တစ်ရက်ခြား အလှည့်ကျဖြင့်သာ စစ်ဆေးပေးနေကြောင်း တာချီလိတ်မြို့မှ ပရဟိအသင်းဝင် ဦးကိုကိုဦး က သျှမ်းသံတော်ဆင့်ကို ပြောသည်။
“အခုတလော ထိုင်းဖက်ကနေ မြန်မာပြည်ကို ပြန်လာတဲ့သူတွေကလည်း များနေတယ်လေ၊ သူတို့ကိုလည်း စစ်ပေးရတယ်၊ ပြီးတော့ ဒီတာချီလိတ်မြို့တွင်းက သံသယလူနာနဲ့ ပြည်သူတွေကိုလည်း စစ်ပေးရတယ်၊ ပြောရမယ်ဆို စင်တာကလူတွေက နားရတယ်ကို မရှိဘူး၊ စစ်တိုင်းတွေ့တယ်၊ တွေ့တော့ ကွာရန်တင်းစင်တာ ကို ပို့ရတာ” ဟု ဦးကိုကိုဦးက သျှမ်းသံတော်ဆင့်ကို ပြောသည်။
လက်ရှိတွင် တာချီလိတ် ပြည်သူ့ဆေးရုံကြီးသို့ ကိုဗစ်ရောဂါဖြင့် တက်ရောက်ကုသမှုခံယူနေသူများ အားလုံး သည် အောက်ဆီဂျင်အမြဲပေးထားရသည့် အရေးပေါ်အခြေအနေ လူနာများဖြစ်ကြောင်း တာချီလိတ်ပြည်သူ့ ဆေးရုံကြီး အသိုင်းအဝိုင်းမှ ပြည်သူတစ်ဦးက သျှမ်းသံတော်ဆင့်ကို ပြောသည်။
“လူနာတွေကလည်း နေ့နေ့ညည ဆေးရုံ ဆေးခန်းပြသဖို့ အပူအပင်တွေ အဆင်မပြေမှုတွေ များစွာ ရှိသလို ပြည်သူ့ဆေးရုံကြီးမှာလည်း ဆရာဝန် ၊ ဆရာမ အင်အားမလုံလောက်တဲ့ အခက်ခဲများစွာရှိ နေပါတယ်၊ဒေသ တွင်းမှာ ကိုဗစ်ရောဂါနဲ့ပတ်သက်ပြီး ထိန်းမနိုင် သိမ်းမရ အရမ်းဆိုးရွားမလာဖို့ မျှော်လင့်မိပါတယ်” ဟု အထက်ပါ ပုဂ္ဂိုလ်က ပြောသည်။
ကိုဗစ် – ၁၉ တတိယလှိုင်းတွင် တာချီလိတ်မြို့၌ ကိုဗစ်ပိုးတွေ့ရှိသူ စုစုပေါင်း ၂၀၀၀ ဦးဝန်းကျင်ရှိနေပြီး ရောဂါကြောင့် သေဆုံးသူ ၅၀ နီးပါးရှိလာသည့် အပြင် ကိုဗစ် – ၁၉ အတည်ပြုလူနာမှ ထွက်ပြေးသူ စုစု ပေါင်း ၁၀ ဉီးထက်မနည်း ရှိနေကြောင်း သိရသည်။
Leave a Comments