သျှမ်းပြည် တောင်ပိုင်းအတွင်း အခြေစိုက်လှုပ်ရှားသော ဟိုမိန်းနယ်ခြား ကာကွယ်ရေးပြည်သူ့ စစ်ခေါင်းဆောင် ကိုဗစ် – ၁၉ ကူးစက်ခံရကြောင်း သတင်းသိရသည်။
ဟိုမိန်းနယ်ခြားကာကွယ်ရေးတပ် ပြည်သူ့စစ်ခေါင်းဆောင် ဟု လူသိများကြသည့် ဟိုမိန်း ဒေသ ဖွံ့ဖြိုးတိုးတက်ရေး နှင့် သက်သာချောင်ချိရေးအဖွဲ့ (လက်နက်ချ MTA အဖွဲ့/SSS ပြည်သူ့ စစ်) ခေါင်းဆောင် ဉီးမဟာကြာ နှင့် အဖွဲ့သား ၂၀ နီးပါးခန့် ကိုဗစ် – ၁၉ ရောဂါ ကူးစက်ခံရကြောင်း သတင်းသိရသည်။
“ဟုတ်ပါတယ်၊ ခေါင်းဆောင်ကြီးနဲ့ အဖွဲ့သား ၂၀ ကျော်ခန့်က ကိုဗစ် – ၁၉ ကူးစက်ခံရတယ်လို့ ကျနော် လည်း ကြားမိပါတယ်၊ သိပ်စိုးရိမ်စရာရယ်လို့တော့ မရှိပါဘူး၊ အခုလည်း ရောဂါကုသမှုခံယူရင်း သက်သာပျောက် ကင်းစ ပြုနေပါပြီ” – ဟု အမည်မဖော်လိုသည့် နမ့်စန် ပြည်သူ့စစ်အရာရှိတဉီးက သျှမ်းသံတော်ဆင့် အား ပြောသည်။
အဆိုပါ SSS ပြည်သူ့စစ်တပ်ဖွဲ့၏ ခေါင်းဆောင်နှင့် အဖွဲ့သားတို့သည် ကျိုင်းတောင်းဖက်မှ ခရီးပြန်လာပြီး သည့် နောက် ကိုဗစ် – ၁၉ စစ်ဆေး တွေ့ရှိရကြောင်းလည်း သိရသည်။
“ဒီသြဂုတ်လဆန်းပိုင်းမှာ ကျိုင်းတောင်းဖက် သွားခဲ့သေးတယ်လေ၊ အဲ့ကနေပဲ ကူးလာတာထင်တယ်၊ ဒီမှာ တချို့က နေမကောင်းဖြစ်ပြီး ဆေးစစ်ကြည့်တော့ ကိုဗစ် – ၁၉ ကူးစက်ခံနေရတယ်ဆိုတာ သိရတယ်” ဟု အထက်ပါ ပုဂ္ဂိုလ်က ပြောသည်။
ဦးမဟာကြာ ဦးဆောင်သော ဟိုမိန်းပြည်သူ့စစ်အဖွဲ့သည် ၁၉၉၆ ခွန်ဆာဉီးဆောင်သော မုံးတိုင်းတပ်မတော် MTA လက်နက်ချစဉ်ပါဝင်ပြီး ဟိုမိန်းနယ်ခြားကာကွယ်ရေးတပ်အဖြစ် ပြန်လည်ဖွဲ့စည်းပြီး အာဏာသိမ်းတပ်မတော်၏ ပြည်သူ့စစ်လမ်းစဉ်အောက်တွင်နေထိုင်သည်။ လက်ရှိတွင် ဉီးမဟာကြာက နမ့်စန်မြို့တွင်သာအနေများပြီး သားဖြစ်သူ စိုင်းနုက ဟိုမိန်းပြည်သူ့စစ်တပ်ကို တာဝန်ယူသည်။
