သျှမ်းပြည်တောင်ပိုင်း နမ့်စန်မြို့နယ်နှင့် လင်းခေးမြို့နယ်ရှိ မဲရုံများတွင် စစ်ကော်မရှင်တပ်နှင့် ၎င်းလက်အောက်ခံ ပြည်သူ့စစ်များ လုံခြုံရေး တင်းကြပ်ထားကြောင်း စုံစမ်းသိရသည်။

ယနေ့ (ဒီဇင်ဘာလ ၂၈ ရက်) တွင် စစ်ကော်မရှင်ဘက်မှ ရွေးကောက်ပွဲ ပထမပိုင်းကို နမ့်စန်မြို့နယ်နှင့် လင်းခေးမြို့နယ် အပါအဝင် သျှမ်းပြည်မှ မြို့နယ် ၁၂ ခုတွင် စတင်ကျင်းပ ပြုလုပ်နေသည်။

နမ့်စန်မြို့နှင့် အရှေ့အလယ်ပိုင်း တိုင်းစစ်ဌာနချုပ် အခြေစိုက်ရာ ခိုလမ်မြို့ အပါအဝင် ရွေးကောက်ပွဲအတွက် မဲရုံပေါင်း (၇၈) ရုံ ရှိပြီး ထိုမဲရုံများတွင် စစ်ကော်မရှင်တပ်သားနှင့် ၎င်းလက်အောက်ခံ ရဲတပ်ဖွဲ့ဝင်အချို့က လုံခြုံရေး ယူပေးထားကြောင်း နမ့်စန်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“မနေ့ကလည်း စစ်ကား ၂ စီးနဲ့ ရွာတွေဘက်ကို ဆင်းသွားတယ်။ မဲရုံတွေမှာ လုံခြုံရေးယူဖို့လို့ သိရတယ်။ ပြည်သူတွေကတော့ မဲပုံမှန် လာပေးနေကြတယ်။ သူတို့က ၂၀၂၀ လို တက်ကြွမှုတော့ ဘယ်ရှိမလဲ၊ လူတွေက တချို့ကလည်း မဲပေးရမယ်ထင်ပြီး သွားတယ်ပေမယ့် နာမည်မပါဘူး”ဟု နမ့်စန်ဒေသခံ ၎င်းအမျိုးသားက ပြောသည်။

အလားတူ လင်းခေးမြို့နယ်တွင်လည်း မြို့ပေါ်ရပ်ကွက်နှင့် ကျေးရွာအုပ်စုများတွင် မဲရုံပေါင်း (၃၈) ခုရှိပြီး အချို့နေရာများကို စစ်ကော်မရှင်တပ်သား၊ လက်အောက်ခံ ရဲတပ်ဖွဲ့ဝင်များနှင့် မီးသတ်တပ်ဖွဲ့တို့က လုံခြုံရေး တာဝန်ယူထားသည့်အပြင် မြို့အတွင်း ကားဖြင့် ကင်းလှည့်နေကြကြောင်း လင်း‌ခေးမြို့နယ် ဒေသခံအမျိုးသားတစ်ဦးက ပြောသည်။

“မဲရုံတချို့ကတော့ စစ်သားတွေ မရှိပေမဲ့ ရဲတွေနဲ့ မီးသတ်တွေ လုံခြုံရေး ယူထားတယ်၊ တချို့မဲရုံမှာတော့ ရှိတယ်။ မြို့ထဲမှာတော့ စစ်တပ်ကကား၊ မီးသတ်ကား၊ ရဲကားတို့က ကင်းလှည့်နေတာ။ ကြိုတင်မဲပေးရက်နဲ့ ဒီနေ့ပဲ သူတို့ကင်းလှည့်တာပါ”ဟု လင်းခေးဒေသခံ ၎င်းအမျိုးသမီးက ပြောသည်။

နမ့်စန်မြို့နယ် မဲဆန္ဒနယ်အတွက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) ၊ ပြည်သူ့ရှေ့ဆောင်ပါတီ (PPP)၊ တိုင်းရင်းသား စည်းလုံးညီညွတ်ရေးပါတီ (NUP)နှင့် ပအိုဝ်းအမျိုးသားအဖွဲ့ချုပ်ပါတီ (PNO) တို့မှ ကိုယ်စားလှယ်လောင်းများ ဝင်ရောက်ယှဉ်ပြိုင်ကြသည်။

လင်းခေးမြို့နယ် မဲဆန္ဒနယ်အတွက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) နှစ်ပါတီသာ ကိုယ်စားလှယ်လောင်းများ ဝင်ရောက်ယှဉ်ပြိုင်ကြသည်။

စစ်ကော်မရှင်ကျင်ပသည့် ရွေးကောက်ပွဲ ပထမပိုင်းတွင် သျှမ်းပြည်ရှိ မြို့နယ်ပေါင်း ၁၂ ခု ပါဝင်ပြီး ၎င်းမြို့များမှာ ပင်းတယ၊ ဟိုပုံး၊ နောင်ချို၊ ကျိုင်းတုံ၊ တာချီလိတ်၊ တောင်ကြီး၊ နမ့်စန်၊ မူဆယ်၊ မိုင်းဆတ်၊ လားရှိုး၊ လင်းခေးနှင့် လွိုင်လင်မြို့နယ်တို့ ဖြစ်သည်။