သျှမ်းပြည်မြောက်ပိုင်းတွင် တိုင်းရင်းသား လက်နက်ကိုင်အချင်းချင်း နယ်မြေ အငြင်းပွားမှုပြဿနာကြောင့် တိုက်ပွဲဖြစ်ပွားရာတွင် နယ်မြေကျူးကျော်မှု ကြောင့် တိုက်ပွဲ ပြန်လည်ဖြစ်ပွားလာရကြောင်း စုံစမ်းသိရှိရသည်။

ယခုလက်တလောတွင် သျှမ်းပြည်မြောက်ပိုင်း ကျောက်မဲမြို့နယ်၊ သီပေါမြို့နယ်တို့တွင် သျှမ်းတပ် ၂ တပ် နှင့် မြောက်ပိုင်းမဟာမိတ် (TNLA၊SSPP/SSA ) တို့သည် အပြန်အလှန် နယ်မြေကျူးကျော်မှုကိစ္စကြောင့် တိုက်ပွဲဖြစ်ပွားပြန်ဖြစ်ရကြောင်း လက်နက်ကိုင် တပ်ဖွဲ့များ၏ တာဝန်ရှိသူများက သျှမ်းသံတော်ဆင့် ကို ပြောသည်။

“ ကျနော်တို့ အခုက မိုးရာသီနဲ့ ကိုဗစ် ကာလမို့လို့ ကျနော်တို့ တိုက်ပွဲတော့ရပ်ထားတယ်။ သူတို့ဖက်ကနေ စစ်ထိုးလာတာကြောင့် ကျနော်တို့ တိုက်ပွဲပြန်ဖြစ်ပွားရတာပါ။” ဟု သျှမ်းပြည်ပြန်လည်ထူးထောင်ရေးကောင်စီ RCSS/SSA ပြောခွင့်ရ ဗိုလ်မှူးကြီး စိုင်းခမ်းစံက သျှမ်းသံတော်ဆင့်ကို ပြောသည်။

သို့သော် ယမန့်နေ့ သြဂုတ် ၁၁ ရက်နေ့ သီပေါမြို့နယ် နမ့်လန့်ဝမ်းစိမ်းကျေးရွာ RCSS/SSA တပ်ဖွဲ့သည် ကျေးရွာအတွင်း ဝင်ရောက်လာပြီးနောက် တိုက်ပွဲဖြစ်ပွားခဲ့ရကြောင်း သီပေါမြို့ ဝမ်းကောင်း စစ်ဘေးရှောင်ပြည်သူ တဦးက ပြောသည်။

“ တိုက်ပွဲမတိုင်ခင်က RCSS/SSA အဖွဲ့က ကျနော်တို့ ရွာထဲရောက်လာသေးတယ်။ ပြီးတော့ သူတို့ပစ္စည်းတွေတင်ဖို့ ဆိုပြီး ကားငှားတင်ခိုင်းသေးတယ်။ တိုက်ပွဲကတော့ ဘယ်လိုစဖြစ်လဲမသိဘူး။ ညအချိန်ကနေစပစ်တာ” ဟု သီပေါမြို့ ဝမ်းကောင်း စစ်ဘေးရှောင် ပြည်သူတဦးကပြောသည်။

အလားတူ ယမန့်နေ့ သြဂုတ် ၁၁ ကျောက်မဲမြို့နယ် ပန်းဖြတ်တွင်လည်း သျှမ်းပြည်ပြန်လည် ထူထောင်ရေးကောင်စီ RCSS/SSA နှင့် မြောက်ပိုင်း မဟာမိတ်( SSPP/SSA) ၊ (TNLA) တို့သည် တိုက်ပွဲဖြစ်ပွားခဲ့ပြီး အရပ်သား နေအိမ်နှင့် ဘုန်းကြီးကျောင်တို့ ထိခိုက်ပျက်စီးခဲ့ကြောင်း သိရသည်။

“ တိုင်းရင်းသားအချင်းချင်းဖြစ်ပွားတဲ တိုက်ပွဲတွေ က အပြန်အလှန် နယ်မြေကျူးကျော်တဲ့ ကိစ္စဖြစ်တာ များတယ်။ တခြားကြောင့်တိုက်ပွဲဖြစ်နေတာတော့ သိပ်မရှိဘူး။ နယ်မြေတွေကြောင့်ပဲ တိုက်နေကြတယ်” ဟု ကျောက်မဲမြို့ စစ်ရှောင်များကို ကူညီပေးနေသည့် အမျိုးသားတဦးက ပြောသည်။

TNLA ပြောခွင့်ရ မိုင်းအိုက်ကျော်ကလည်း “ သူတို့ဖက်နေ ကျနော်တို့ နယ်မြေထဲရောက်လာတော့ တိုက်ပွဲဖြစ်ရတယ်။” ဟု မိုင်းအိုက်ကျော်က ပြောသည်။

ထိုသို့ တိုက်ပွဲကိစ္စနှင့်ပတ်သတ်ပြီး သျှမ်းပြည်တိုးတက်ရေးပါတီ SSPP/SSA ပြောခွင့်ရ ဗိုလ်မှူး စိုင်းဖုန်းဟန် ကို သျှမ်းသံတော်ဆင့်မှ အကြိမ်ကြိမ် ဖုန်းဆက်ပြီး ဖုန်းဝင်သော်လည်း ဖုန်းကိုင်ဖြေကြားပေးခြင်းမရှိပေ။

သျှမ်းပြည်တွင် တိုင်းရင်းသားလက်နက်ကိုင်အချင်းချင်းတိုက်ပွဲကြောင့် ပြည်သူများ စားဝတ်နေရေးအတွက် ပိုမိုခက်ခဲလာပြီး တိုက်ပွဲကြောင့် ပြည်သူများထိခိုက်ဒဏ်ရာရရှိပြီး သေဆုံးမှုလည်းဖြစ်ခဲ့ကြောင်းသိရသည်။

သျှမ်းတပ် (၂)တပ် တိုက်ပွဲ မဖြစ်ရန် သျှမ်းသံဃာတော်များ၊ သျှမ်းပြည်သူများက အကြိမ်ကြိမ်တိုက်တွန်း ပြောဆိုခဲ့သော်လည်း သျှမ်းတပ်(၂)တပ်သည် နားထောင်ခြင်းမရှိပေ။