တာချီလိတ်မြို့ ဆေးရုံဟောင်းမှ ကိုဗစ် – ၁၉ စစ်ဆေးတွေ့သည့် လူနာ ၂ ဦးထွက်ပြေး

သျှမ်းပြည်အရှေ့ပိုင်း တာချီလိတ်မြို့ ဆေးရုံဟောင်းအတွင်း  ထားရှိသည့် Fever Clinic စင်တာတွင် ကိုဗစ် – ၁၉ ပိုး  ကူးစက်ခံရသူ အတည်ပြု လူနာ ၂ ဦး ထွက်ပြေး ကြောင်း သတင်း သိရသည်။

ထွက်ပြေးသွားကြသူများမှာ တာချီလိတ်မြိုႉ ရန်အောင်မြေရပ်ကွက်၊ ပါလျှံ(၁)တွင် နေထိုင်ကြသည့် အသက်(၂၈)နှစ်အရွယ် မမာမာဝင်း နှင့် အသက်(၁၇)နှစ်အရွယ် ကိုဇော်မင်းထွေးတိုႉ ဖြစ်ကြောင်း သိရပြီး ၎င်းတို့ပေးထားသည့် ဖုန်းနံပါတ်ဖြင့် ဆက်သွယ်သော်လည်း ဆက်သွယ်၍မရကြောင်း တာချီလိတ်မြို့ ကိုဗစ် – ၁၉ Fever Clinic မှ တာဝန်ရှိသူ တစ်ဦးက သျှမ်းသံတော်ဆင့်အား ပြောသည်။

“သူတို့ ပေးထားတဲ့ ဖုန်းကို ဆက်သွယ်တယ် မရဘူး၊ ကိုဗစ် – ၁၉ ပိုးစစ်ဆေးတွေ့ရှိတာများ ထွက်ပြေးစရာ မလိုပါဘူး၊ ပိုးတွေ့လူနာကို သက်ဆိုင်ရာကျန်းမာရေးဌာန စောင့်ကြပ်ကုသပေးမှုကို ဘာလို့ မခံယူချင်တာလဲ၊ အခုလို ထွက်ပြေးတာ့ မသိတဲ့ တခြားသူတွေနဲ့ ထိတွေ့မိရင် ပိုခက်ကုန်တော့မယ်၊ တာချီလိတ်က ပိုးတွေ့များ နေရတဲ့ အထဲ” ဟု အထက်ပါပုဂ္ဂိုလ်က ပြောသည်။

ယမန်နေ့ သြဂုတ်လ ၁၁ ရက်နေ့ တစ်ရက်တည်းတွင် တာချီလိတ်မြို့၌ ကိုဗစ် – ၁၉ ရောဂါပိုး ကူးစက်ခံရသူ စုစုပေါင်း ၇၂ ဦး ထပ်တိုးပြီး ​၁ ရက်တည်းအတွင်း ကိုဗစ်​ရောဂါဖြင့် သေဆုံးသူ ၃ ဦးရှိ​ကြောင်း တာချီလိတ်မြို့ ပရဟိတ လူမှုကူညီ ရေးအသင်းမှ ဦးကိုကိုဦးထံမှ သိရသည်။

“မနေ့က တာချီလိတ်မှာပိုးတွေ့သူ စုစုပေါင်း ၇၂ ဦးရှိပါတယ်၊ Fever clinic စင်တာမှာ ၅၉ ဦးကို ရောဂါပိုးစစ် ဆေးတွေ့မိတယ်၊ ဒီထွက်ပြေးတဲ့ နှစ်ဦးအပါအဝင်ပေါ့၊ သူတို့အခုလို ထွက်ပြေးတာကတော့ သူတို့အတွက်ရော တခြားသူတွေ အတွက်ရော အန္တရာယ်များတယ်“ –  ဟုဦးကိုကိုဦး က ပြောသည်။

ကိုဗစ် – ၁၉ တတိယလှိုင်းတွင် တာချီလိတ်မြို့၌ ကိုဗစ်ပိုးတွေ့ရှိသူ စုစုပေါင်း ၂၀၀၀ ဦးဝန်းကျင်ရှိနေပြီး ​ရောဂါကြောင့် သေဆုံးသူ ၃၀ ဝန်းကျင်ရှိလာသည့် အပြင် ကိုဗစ် – ၁၉ အတည်ပြုလူနာ ထွက်ပြေးမှု များ လည်း ခဏခဏဖြစ်ပွားကာ လက်ရှိတွင် ကိုဗစ် – ၁၉ အတည်ပြုလူနာမှ ထွက်ပြေးသူ စုစုပေါင်း ၄ ဦးရှိ နေကြောင်း သိရသည်။