သျှမ်းမြောက် သီပေါမြို့နယ် နမ့်လန်ဒေသအနီးရှိ ဝမ်ကောင်းနှင့် လွယ်လုံရွာကြားတွင် သျှမ်းတပ် (၂)တပ် သည် ယနေ့ (သြဂုတ် ၁၁)ရက် မနက် (၆)နာရီတွင် တိုက်ပွဲဖြစ်ပွားကာ မွေးကင်းစ ရက်သားကလေး အပါအဝင် ဒေသခံ (၃၀၀) ထွက်ပြေးတိမ်းရှောင်နေရကြောင်း သတင်းရရှိသည်။
နမ့်လန်ဒေသတွင် ယနေ့( သြဂုတ်လ ၁၁)ရက် မနက်ပိုင်း (၆)နာရီ ခန့်က စပြီး သျှမ်းပြည်ပြန်လည် ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA)နှင့် သျှမ်းပြည်တိုးတက်ရေးပါတီ၊ သျှမ်းပြည် တပ်မတော် (SSPP/SSA)တို့ တိုက်ပွဲ ဖြစ်ပွားခဲ့မှုကြောင့် (၄)ရက်သား အရွယ်ရှိ ကလေးငယ် တစ်ဦးအပါအဝင် ဒေသခံ (၃၀၀)ကျော် ထွက်ပြေးတိမ်းရှောင်ခဲ့ရကြောင်း သိရသည်။
“ဝမ်ကောင်းနဲ့ လွယ်လုံရွာကြားမှာ သျှမ်းတပ် (၂)တပ် တိုက်ပွဲဖြစ်တာပါ၊ ဒေသခံတွေ ထိခိုက်တာတော့ မရှိဘူး၊ ဒါပေမယ့် ရွာနဲ့နီးတော့ ကြောက်ပြီး ထွက်ပြေးခဲ့ကြတာ” ဟု စစ်ရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ တိုက်ပွဲကြောင့် လွယ်လုံ၊ ဝမ်ကောင်း၊ ဝမ်ကျောင်းနှင့် ကောင်းကော်ကျေးရွာတို့မှ ဒေသခံများ ထွက်ပြေးတိမ်းရှောင်ခဲ့ရပြီး ကောင်းကော်ဘုန်းကြီးကျောင်းတွင် လာရောက်ခိုလှုံနေကြကြောင်း စစ်ရှောင် အမျိုးသားက ပြောသည်။
ထို့အပြင် အခြားကျေးရွာသို့ ထွက်ပြေးတိမ်းရှောင်သွားသူများလည်းရှိကြောင်းသိရသည်။
သျှမ်းတပ် (၂)တပ် အချင်းချင်း တိုက်ပွဲကြောင့် ဒေသခံများ ထွက်ပြေးတိမ်းရှောင်ရပြီး၊ အခက်အခဲများစွာ ရင်ဆိုင်နေရကြောင်း တိုက်ပွဲများ ရပ်နားကြရန်လည်း ယနေ့စစ်ရှောင်လာသည့် ပြည်သူများက ပြောဆိုလိုက်သည်။
“တိုက်ပွဲတွေကို ရပ်နားသင့်ပြီ၊ တိုက်ပွဲတွေကြောင့် ထွက်ပြေးတိမ်းရှောင်နေရတဲ့ ဒေသခံတွေကို ငဲ့ပြီး တိုက်ပွဲဆက်မဖြစ်ဖို့ကို အမြန်ဆုံအဖြေရှာသင့်တယ်” ဟု စစ်ရှောင်များကို ကူညီနေသည့် သီပေါဒေသခံ အမျိုးသမီးတစ်ဦးက ပြောသည်။
သျှမ်းတပ်(၂)တပ်ဖြစ်သည့် RCSS/SSA နှင့် SSPP/SSA တို့ တိုက်ပွဲဖြစ်ပွားမှုကြောင့် သီပေါမြို့နယ်တွင် တိုက်ပွဲရှောင်ပြည်သူ (၆၀၀)ဝန်းကျင် ရှိနေကြောင်း သိရသည်။
သျှမ်းတပ်(၂)တပ်သည် ဇွန်လဆန်းပိုင်းက စတင်ကာ နယ်မြေ အငြင်းပွားမှု ပြဿနာ ဖြင့် အပြန်အလှန် တိုက်ခိုက်နေကြပြီး၊ ထိုတိုက်ပွဲများကြောင်း သျှမ်းပြည်သူများလည်းအလွန်ပင် ဝမ်းနည်းကာ စိုးရိမ်မှုများစွာရှိနေသည်။
တိုက်ပွဲကြောင့် လယ်ယာလုပ်ငန်းကို စွန့်ခွာရပြီး စစ်ရှောင်နေရသဖြင့် နောင်နှစ် စားဝတ်နေရေးအတွက်လည်း စိုးရိမ်နေကြကြောင်း သိရသည်။
သျှမ်းတပ် (၂)တပ် တိုက်ပွဲ မဖြစ်ရန် သျှမ်းသံဃာတော်များ၊ သျှမ်းပြည်သူများက အကြိမ်ကြိမ်တိုက်တွန်း ပြောဆိုခဲ့သော်လည်း သျှမ်းတပ်(၂)တပ်သည် နားထောင်ခြင်းမရှိပေ။
Leave a Comments