သျှမ်းပြည် အရှေ့ပိုင်း တာချီလိတ်မြို့တွင် ကိုဗစ် – ၁၉ ရောဂါကူးစက်ခံရသည့် လူနာများနှင့် ရောဂါ သံသယ လက္ခဏာရှိသည့် လူနာများရှိပါက အိမ်တွင်း ကျိတ်ပြီး ကုသမှုများ မပြုလုပ်ကြရန် ကျန်းမာရေး နှင့် ပရဟိတ သမားများက တောင်းဆိုနေကြသည်။
သြဂုတ်လ ဆန်းပိုင်းမှ ယနေ့ အထိ တာချီလိတ်မြို့တွင် ကိုဗစ် ၁၉ ကူးစက်လူနာ တရက်ထက် တရက်မြင့်တက်လာနေကြောင်း၊ အိမ်တွင်း ကိုယ်ထူကိုယ်ထ ကုသမှု ကြောင့်သေ ဆုံးမှုလဲ ရှိလာနေကြောင်း၊ ထို့ကြောင့် ကိုဗစ်သံသယ သို့မဟုတ် ကူးစက်ခံရပါက ကျန်းမာရေးဌာန သို့ အကြောင်းကြားပြီး ကုသမှု လမ်းညွှန်မှုခံယူသင့်ကြောင်း၊ ကျန်းမာရေး နှင့် ပရဟိတ သမားများက တောင်းဆိုတိုက်တွန်းထားသည်ဟု ဒေသခံပြည်သူ တဉီးက ပြောသည်။
“ပြည်သူက အိမ်တွင်း ကျိတ်ကုတာမျိုးတွေက မတည့်တာမျိုးတွေ ဖြစ်လာပြီဆိုရင် ရောဂါ အခြေအနေ ပိုဆိုးလာနိုင်ဖို့ပဲ ရှိတယ်၊ အဲ့ကြောင့် ပြည်သူများကျိတ်မကုပါနဲ့ တတ်ကျွမ်းတဲ့ ဆေးရုံ၊ ဆေးခန်း ဆရာဝန် တွေနဲ့ ပြသပြီးကုသမှု ခံယူပါလို့ ပြောချင်ပါတယ်” ဟု တာချီလိတ် ပရဟိတ လူမှုကူညီ ရေးအသင်းမှ ဦးကိုကိုဉီးက သျှမ်းသံတော်ဆင့်ကို ပြောသည်။
ကိုဗစ် – ၁၉ တတိယလှိုင်းအတွင်း ပိုးတွေ့လူနာများ စံချိန်တင်မြင့်တက်များပြားလာသည့် တာချီလိတ် မြို့ သည် Stay At Home ကြေညာခံထားရသည့် မြို့ဖြစ်ပြီး ပြည်သူများအနေဖြင့်လည်း ရောဂါ တစ်ဖက် နှင့် စားဝတ်နေရေး အတွက် အခက်အခဲများ ရင်ဆိုင်နေရသည်။
“ပိုးတွေ့များလာလို့ Stay At Home ကြေညာတာတော့ မကန့်ကွက်ပါဘူး၊ ဒါပေမယ့် ပြည်သူတွေက စားဝတ် နေရေးအတွက်လည်း ရှိသေးတယ်ဆိုတော့ ဒီအတွက်လည်း တာဝန်ရှိသူတွေ ညှိနှိုင်းအဖြေရှာပေးဖို့ တောင်းဆိုလိုပါတယ်” – ဟု ၎င်းကပြောသည်။
လက်ရှိ ဖြစ်ပွားနေသည့် ကိုဗစ် တတိယလှိုင်းအတွင်းမှ ပြည်သူများ အိမ်တွင်းကုသမှုများသည်လည်း ငွေကြေး အခက်အခဲကြောင့်လည်း ဖြစ်ကြောင်း တာချီလိတ်ဒေသခံတဉီးက ပြောသည်။
“ကျနော်တို့ တမိသားစုလုံးကူးတယ်။ ၅ ယောက်လုံးပဲပေါ့။ ဆေးရုံတက်ရင် ကုန်ကျဖို့ကော၊ ဆေးဖိုး ဝါးခတွေ လိုအပ်တဲ့ အစားအစာတွေ ပို့ဖို့ မလွယ်ကူဘူးလေ၊ ပြီးတော့ အသက်ကြီးတဲ့လူနာတွေဆို ကိုယ့်သားသမီး ဆွေမျိုးတွေ ကိုပဲ အနားမှာရှိနေချင်ကြတာ၊ ဆေးရုံမှာက အဲ့လိုတွေမရဘူးလေ” ဟု တာချီလိတ်မြို့ခံ စိုင်းယီတွီ့က ပြောသည်။
တာချီလိတ်မြို့တွင် ကိုဗစ်ပိုးတွေ့ရှိသူ များပြားလာသောကြောင့် အာဏာသိမ်း စစ်ကောင်စီလက် အောက်ခံ အာဏာပိုင်းများက ဇူလိုင် ၁၃ ရက်ကစတင်ကာ Stay at Home ဒေသအဖြစ် သတ်မှတ်ခဲ့ သော်လည်း အမိန့်အာဏာ နှင့် ရောဂါကာကွယ်ထိန်းချုပ်မှု ထိရောက်ခြင်း မရှိကြောင်း သိရသည်။
ကိုဗစ် – ၁၉ တတိယလှိုင်းတွင် တာချီလိတ်မြို့၌ ကိုဗစ်ပိုးတွေ့လူနာ စုစုပေါင်း ၁၈၂၉ ဉီးရှိနေပြီး သေဆုံးသည့်လူနာ စုစုပေါင်း ၂၄ ဉီး အထိ ရှိလာနေပြီ ဖြစ်သည်။
Leave a Comments