သျှမ်းပြည် အရှေ့ပိုင်း တာချီလိတ်မြို့တွင် ကိုဗစ် – ၁၉ ကူးစက်ရောဂါကြောင့် ၁ ရက်တည်းအတွင်း ၅ ဉီးသေဆုံးကြောင်း သိရသည်။
ယမန်နေ့ ဩဂုတ်လ ၈ ရက်က တာချီလိတ်ခရိုင်ဆေးရုံကြီးရှိ ကိုဗစ်ကူးစက်အတည်ပြုလူနာများ အနက် ၅ ဉီးအထိသေဆုံးမှုရှိကြောင်း တာချီလိတ်မြို့ ပရဟိတ လူမှုကူညီရေးအသင်းမှ ဉီးကိုကိုဉီး က သျှမ်းသံတော်ဆင့်ကို ပြောသည်။
“ပြောရမယ်ဆိုရင် ခုသေဆုံးသွားရတဲ့ လူနာတွေက တကယ့်အရေးပေါ်အခြေအနေရောက်တဲ့ အောက်စီဂျင် တွေ ကျသွားတဲ့ အချိန်မှာ ဆေးရုံကို ရောက်လာတဲ့ လူနာတွေဖြစ်တယ်ဗျ၊ ဆေးရုံရောက်ပြီး စစ်ဆေးမှုတွေ လုပ်မှ ကိုဗစ်ပိုးတွေ့ရတာလည်းပါတယ်၊ အဲ့ဒီတော့ ကုသမှု ခံယူပေမယ့် အချိန်မမှီတဲ့ သဘောပေါ့” ဟု ဉီးကိုကိုဉီး က သျှမ်းသံတော်ဆင့်ကို ပြောသည်။
သေဆုံးသွားသည့်ကိုဗစ်ကူးစက် လူနာ ၅ ဉီးမှာ ဝမ်ကောင်းရပ်ကွက်တွင်နေထိုင်သည့် အသက် ၇၆နှစ်အရွယ်အမျိုးသမီးတစ်ဦး၊ မယ်ခေါင်ရပ်ကွက်တွင်နေထိုင်သည့် အသက် ၅၉ နှစ်အရွယ် အမျိုး သမီးတစ်ဦး၊ မကာဟိုခမ်းရပ်ကွက်တွင် နေထိုင်သည့် ၅၂ နှစ်အရွယ် အမျိုးသမီးတစ်ဦး၊ အသက် ၃၁ နှစ် အရွယ် အမျိုးသားတစ်ဦး နှင့် ဝမ်ကောင်းရပ်ကွက်တွင်နေထိုင်သည့် အသက် ၇၂ နှစ် အရွယ်အမျိုးသမီး တစ်ဦး တို့ဖြစ်ကြောင်း သိရသည်။
လက်ရှိတာချီလိတ်မြို့တွင်းတွင် ကိုဗစ် – ၁၉ တတိယလှိုင်း ကူးစက်ပျံ့ပွားမှုနှုန်းနှင့် သေဆုံးသူများ စံချိန်တင် မြင့်တက်နေပါသည်။ ပြည်သူများအနေဖြင့် ကျန်းမာရေးအတွက် Stay At Home စည်းကမ်းချက်များ အတိုင်း လိုက်နာ ကျင့်သုံးသင့်ကြောင်း ဉီးကိုကိုဉီး က ပြောသည်။
“အခုကိုဗစ် ကူးစက်မှုနှုန်းက အရမ်းများနေတယ်၊ သေဆုံးမှုနှုန်းလည်း အရမ်းများနေတယ်၊ ကျန်းမာရေးဌာန နဲ့ ပရဟိတ သမားတွေကလည်း နိုင်သလောက်လုပ်နေကြပေမယ့် လူနာတွေက ကျိတ်ကုတွေများပြီး အရေး ပေါ် အခြေအနေရောက်မှ ဆေးရုံကို ပြေးလာတာမျိုးတွေနဲ့၊ ပြီးတော့ အရေးကြီးလိုအပ်ချက်တွေ မရှိလည်း အပြင်ထွက်နေတာမျိုးတွေ ရှိနေတာကြောင့် ပြည်သူများ Stay At Home စည်းကမ်းချက်တွေ လိုက်နာကျင့် သုံးပါလို့ ကျနော်က မီဒီယာကနေ တစ်ဆင့်ပြောလိုပါတယ်” ဟု ၎င်းကပြောသည်။
တာချီလိတ်မြို့တွင် ဩဂုတ်လ ၈ ရက်အတွင်း အသစ်တိုးလာသည့် အတည်ပြုလူနာ ၅၈ ဦးအပါအဝင် လက်ရှိတွင် အတည်ပြုလူနာ စုစုပေါင်း ၁၇၄၈ ဦး ရှိနေပြီး ကိုဗစ် – ၁၉ ကြောင့် သေဆုံးသူအရေအတွက် မှာ၂၃ ဦး ရှိလာပြီဖြစ်သည်။
