သျှမ်းပြည် မြောက်ပိုင်း မန်တုံမြို့ ပြည်သူ့ဆေးရုံသို့ ရောက်ရှိသည့် မွေးလူနာကို ဆေးရုံက လက်မ ခံသောကြောင့် မန်တုံ – လားရှိုး တောလမ်းပိုင်း ရုရှားတောင်ကြားလမ်းတွင် မီးဖွားကာ မွေးလာသည့် ကလေးငယ် သေဆုံးသွားကြောင်း ကြားသိရသည်။
သြဂုတ်လ ၅ ရက်နေ့ နံနက် ၁၁ အချိန်ခန့် က မန်တုံမြို့နယ် ပန်ဆွေရွာသူ ကိုယ်ဝန်ဆောင် အမျိုးသမီး မန်တုံပြည်သူ့ ဆေးရုံသို့ မီးဖွားဖို့ရန်ရောက်ရှိလာကြောင်း၊ မန်တုံဆေးရုံကလက်မခံဘဲ လားရှိုးဆေးရုံကြီးသို့ သွားမွေးရန် လွှဲပြောင်းလိုက်ကြောင်း၊ အရေးပေါ်မီးဖွားရန်အသွား နမ္မတူမြို့နယ် ရုရှားတောင်ကြားလမ်းအရောက် မီးဖွားလိုက်ရပြီးမကြာမှီ ကလေးသေဆုံးသွားကြောင်း ဆွေမျိုးများအသိုင်းအဝိုင်းကပြောသည်။
“ နံနက် ၁၁ နာရီခွဲ လောက် မန်တုံဆေးရုံကို ရောက်တယ်၊ ဆေးရုံကလက်မခံလို့ ကလေးမွေးဖို့ လားရှိုးသွားနေချိန် နေ့လည် ၃ နာရီ လောက်က မန်တုံ နဲ့ နမ္မတူကြားက ရုရှားတောင်ကြားအရောက်မှာဘဲ ကလေးကိုခက်ခက်ခဲခဲနဲ့ မွေးဖွားခဲ့ပါတယ်၊ နမ္မတူ ဆေးရုံရောက်ပြီးနောက်ရက်မနက်မှာဘဲ ကလေးဆုံးသွားတယ်” – ဟု မွေးလူနာ မိသားစုအသိုင်းအဝိုင်းက ပြောသည်။
မန်တုံ – နမ္မတူ – လားရှိုးလမ်းက ၈၂ မိုင်ဝေးကြောင်း၊ ၊ လမ်းခုလတ်တွင် မိန်းခလေး ကလေးငယ်လေးမွေးဖွားပြီး နမ္မတူဆေးရုံသို့ရောက်ရှိကာ မနက်ပိုင်းတွင် ကလေး ဆုံးသွား ကြောင်း ကြားသိရသည်။
“ကလေးငယ်က ဆုံးသွားပါပြီ၊ ဒီမနက် ၅ နာရီ ဆေးရုံမှာပဲဆုံးသွားတယ်ပေါ့၊ သွေးနုသားနုနဲ့ သယ်ရတဲ့ လမ်းခရီးလည်း ကြမ်းတယ်၊ ပြီးတော့ ဆေးရုံတွေမှာ အိမ်တွေမှာ မွေးဖွားသလိုလည်း မဖြစ်တော့အဲ့ကြောင့် လည်းပါမယ်၊ မိခင် ကတော့ ကျန်းမာစွာ ရှိနေပါတယ်” – ဟု မိုးသောက်ကြယ် လူမှုကူညီရေး အသင်းသား တဉီးက ပြောသည်။
အရေးပေါ် အခြေအနေကြား မွေးလူနာအား လက်ခံမွေးဖွားပေးခြင်း မရှိသည့် မန်တုံမြို့မှ ပြည်သူ့ ဆေးရုံကို မြို့ခံလူထုအချို့က ပြစ်တင်ဝေဖန်နေကြသည်။
အမည်မဖါ်လိုသည့် မန်တုံမြို့ ဆေးရုံအသိုင်းအဝိုင်း၀န်ထမ်းတဦးက – “မွေးဖွားဖို့ရောက်လာတဲ့ မိခင်က ကိုယ်၀န်လမစေ့ ဘူး၊ ရေမွှာလည်း ပေါက်နေတယ်၊ ပြီးတော့ သွေးဆင်းတာလည်း အရမ်းများနေတယ်၊ ဒီမှာက ခွဲစိပ် ကိရိ ယာပိုင်းရော လူအင်အားပိုင်းရော မလုံလောက်လို့ လားရှိုးဆေးရုံကို လွှဲလိုက်ရတာပါ” – ဟု သျှမ်းသံ တော်ဆင့်ထံ ပြောသည်။
သျှမ်းပြည်မြောက်ပိုင်း မန်တုံမြို့သည် ၂၀၀၈ ဖွဲ့စည်းပုံအရ ပလောင်ကိုယ်ပိုင်အုပ်ချုပ်ရ အဖြစ် သတ်မှတ်ထားသည်။ ဖေဖေါ်ဝါရီလ ၁ ရက်နေ့ (၂၀၂၁ ခု) က တပ်မတော်မှ တိုင်းပြည်အာဏာ သိမ်းလိုက်သောကြောင့် ဝန်ထမ်းအချို့ အလုပ်မဆင်းဘဲ CDM တွင်ပါဝင်နေကြောင်း၊ ဆေးရုံလည်ပတ်ဖို့ရန် ဝန်ထမ်းအင်အားမလုံလောက်ကြောင်း သိရှိရသည်။