သျှမ်းပြည်မြောက်ပိုင်း မူဆယ် – ပန်ဆိုင်းမြို့နယ်ခွဲအတွင်း ကျေးရွာအချို့အတွင်း အိမ်စောင့် တပ်မှ လက်နက်ကြီးများဖြင့် ပစ်ခတ်သောကြောင့် တောတောင်အတွင်းသို့တိမ်းရှောင်နေရသည့် ကျေးလက်ဒေသခံများ စားဝတ်နေရေးအခက်အခဲများကြုံတွေ့နေရသည်ဟုသတင်းရရှိသည်။

သြဂုတ်လဆန်းပိုင်းမှယနေ့အထိ စစ်ကောင်စီတပ်နှင့်မြောက်ပိုင်းမဟာမိတ်တပ်တို့ကြား တိုက်ပွဲများ မကြာခဏဖြစ်ပွားခဲ့သည်။ တိုက်ပွဲကြောင့် မူဆယ်ခရိုင် ကြူကုတ် – ပန်ဆိုင်း မြို့နယ်ခွဲ ဖေါင်းဆိုင် ကျေးရွာအုပ်စု ဖိုင်ကောင်းကျေးရွာအတွင်း အိမ်စောင့်တပ်က လက်နက်ကြီးများဖြင့်ပစ်ခတ်မှု ကြောင့် တောတောင်ထဲ တိမ်းရှောင်နေရသည့် ဒေသခံ ၃၀၀ ကျော်က စားဝတ်နေရေး အခက်အခဲ များ ကြုံတွေ့နေရသည်။

“အခု အဓိက တိမ်းရှောင်ရတဲ့သူက သက်ကြီးပိုင်း အမျိုးသမီးနဲ့ ခလေးတွေများတယ်။ အဓိကလိုအပ် တာက ခြင်ဆေး နဲ့ မိုးကာ ပါ” – ဟု အမည်မဖေါ်လိုသည့် ဒေသခံ အမျိုးသမီးတဉီးကပြောသည်။

အိမ်စောင့်တပ်(ဗမာ့တပ်မတော်) ကို ဒေသအတွင်း လှုပ်ရှားသွားလာသည့် ကိုးကန့်တပ် MNDAA က သြဂုတ်လ ၂ ရက်နေ့က ဝင်ရောက်တိုက်ခိုက်ခဲ့သည်။ အဆိုပါ တိုက်ပွဲကြောင့် အိမ်စောင့်တပ်မှ ကျေးရွာအတွင်းသို့ လက်နက်ကြီးများပစ်ခတ်သောကြောင့်  တိမ်းရှောင်နေရသည့် ဒေသခံများ ခိုလှုံနေထိုင်ဖို့ မိုးကာ အဓိကလိုအပ်နေကြောင်းသိရှိရသည်။

“ဖောင်းဆိုင်ရွာကတချို့က ၂ ရက်နေ့ကတည်းက တောထဲကို ထွက်ပြေးလာတာရှိတယ်၊ ဒါပေမဲ့ အများစုက ၃ ရက်နေ့ကမှ ထွက်ပြေးလာတဲ့သူတွေပေါ့၊ မိုးတွင်းဆိုတော့  ဆေးတွေ၊ ခြင်ထောင်တွေ မိုးကာတွေရော အစားအသောက် တွေရာ လိုအပ်ပါတယ်”  – ဟု စစ်ရှောင်အရေးကူညီပေးသူတဉီးက သျှမ်းသံတော်ဆင့်သို့ ပြောသည်။

မူစယ်ခရိုင်အတွင်း မြောက်ပိုင်းမဟာမိတ် တပ်ဖွဲ့ဝင်များ ဖြစ်ကြသည့် ကချင်လွတ်လပ်ရေး တပ်မတော် KIA ၊ မြန်မာအမျိုးသားဒီမိုကရက်တစ်မဟာမိတ်တပ်မတော် MNDAA ၊ တအာင်း အမျိုးသားလွတ်မြောက်ရေးတပ်မတော် TNLA တပ်များနှင့် အာဏာသိမ်း/အိမ်စောင့်တပ်တို့အကြား တိုက်ပွဲများ မကြာခဏ ဖြစ်ပွားခဲ့သည်။