သျှမ်းမြောက် ကျောက်မဲမြို့နယ် ပုံဝိုးဒေသတွင် စစ်ဘေးရှောင်ပြည်သူ (၁၀၀)ကျော်ရှိနေပြီး ဆေးဝါးနှင့် စားဝတ်နေရေးအတွက် အခက်ခဲဖြစ်နေကြောင်း သိရသည်။
သျှမ်းတပ် (၂)တပ်တိုက်ပွဲ မကြာခဏဖြစ်ပွားသည့်အတွက် ဒေခသံများ ထိခိုက်မှာကို စိုးရိမ်သဖြင့် စစ်ရှောင် (၁၀၀)ကျော်ထွက်ပြေးလာကြကြောင်း၊ ထိုစစ်ရှောင်များသည် တာလုံနဲ့ စလောင်းကျေးရွာတွင် နေထိုင်ကြသူများ ဖြစ်ကြောင်း သရသည်။
“သျှမ်းတပ် ၂ တပ် မကြာခဏ တိုက်ပွဲဖြစ်ကြတော့ ဒေသခံတွေ ထိခိုက်မှာစိုးရိမ်ပြီး ထွက်ပြေးလာတာ၊ တာလုံနဲ့နားစလောင်း ကျေးရွာဒေသခံတွေဖြစ်တယ်၊ ပြီးခဲ့တဲ့ လပြည့်နေ့ကတည်းက ထွက်ပြေးလာကြတာ” ဟု ပုံဝိုးကျောင်းတိုက် ဆရာတော်က သျှမ်းသံတော်ဆင့်ကို မိန့်သည်။
ဇူလိုင် (၂၃)ရက်နေ့တွင် စစ်ဘေးရှောင် (၁၀၀)ကျော် စတင်ရောက်ရှိလာပြီး လက်ရှိတွင် ရွာကျောင်းတိုက်မှာ ခိုလှုံနေရတာဖြစ်ကြောင်း၊ အသုံးအဆောင်ပစ္စည်း၊ အစားအသောက်များနှင့် ဆေးဝါးများပါ လိုအပ်နေတာဖြစ်ကြောင်း သိရသည်။
“စစ်ဘေးရှောင်တွေက ဟဲကွီရွာကျောင်းတိုက်မှာ (၃၅)ဦးနဲ့ နောင်စင်ရွာကျောင်းတိုက်မှာ (၇၀)ဦးကျော်ရှိတယ်၊ အများစုက ကလေးငယ်နဲ့ အမျိုးသမီး၊ လူကြီးလူအိုတွေပဲ၊ စောင်တွေ၊ ခြင်ထောင်တွေလည်း မလုံလောက်ဘူး၊ စားစရာတွေလည်း လိုနေတယ်” ဟု အဆိုပါ ဆရာတော် မှ မိန့်သည်။
ခုရက်ပိုင်းတွင် နေရပ်ပြန်သွားသူ အနည်းငယ်ရှိပြီး ဆွေမျိုး အသိအိမ်သို့ ပြောင်းရွေ့သွားသူလည်း ရှိကြောင်း၊ လက်ရှိ ကျန်နေသူများသည် သက်ကြီးရွယ်အို၊ အမျိုးသမီးနှင့် ကလေးငယ်များသာဖြစ်ပြီး လသားအရွယ်ကလေးငယ်လည်း ရှိနေကြောင်း စုံစမ်းသိရသည်။
အဆိုပါ စစ်ဘေးရှောင်များအတွက် ဇူလိုင် (၂၉)ရက် ယနေ့တွင် ပုံဝိုးကျောင်းတိုက်ဆရာတော် ဦးဆောင်ပြီး အစားအသောက်တချို့ကို သွားရောက်လှူဒါန်းခဲ့ကြောင်း သိရသည်။
ပြီးခဲ့သည့် ဇူလိုင် (၂၆)ရက်နေ့က သျှမ်းမြောက် ကျောက်မဲခရိုင် သီပေါမြို့နယ် နမ့်လန်ဒေသ ဝမ်စိမ်းကျေးရွာအုပ်စုတွင် သျှမ်းတပ် (၂)တပ် တိုက်ပွဲဖြစ်ပွားခဲ့ပြီး တိုက်ပွဲများ ဆက်လက်ဖြစ်ပွားနိုင်ခြေရှိကြောင်း သျှမ်းပြည်ပြန်လည်ထူထောင်ရေးကောင်စီ RCSS/SSA ပြောခွင့်ရ ဗိုလ်မှူး စိုင်းခမ်းစံ က ပြောဆိုထားသည်။
ကျောက်မဲမြို့နယ်တွင် ယခုလအတွင်း တိုင်းရင်းသားလက်နက်ကိုင်များ တိုက်ပွဲဖြစ်ပွားမှုကြောင့် စစ်ဘေးရှောင် (၇၀၀)ကျော်ခန့် ထွက်ပြေးတိမ်းရှောင်နေရဆဲဖြစ်ပြီး နေရပ်သို့ မပြန်နိုင်သေးကြောင်း သိရသည်။
