သျှမ်းပြည်တောင်ပိုင်း ကျေးသီးမြို့နယ်အတွင်း တိုက်ပွဲများငြိမ်သက်သွားသော်လည်း မိုင်းကိုင်မြို့နယ်နှင့်လဲချားမြို့နယ်ဘက်သို့ တိမ်းရှောင်ခိုလှုံလာသည့် စစ်ရှောင် (၆၀၀) နီးပါး နေရပ်သို့ မပြန်နိုင်သေးကြောင်း စုံစမ်းသိရှိရသည်။
ကျေးသီးမြို့နယ်အတွင်းရှိ တိုက်ပွဲများကြောင့် မိုင်းကိုင်မြို့နယ် မိုင်းခွန်ကျေးရွာအုပ်စု နှင့် ကျေးသီးမြို့နယ် တို့ဘက်မှ ဒေသခံရွာသားများ လဲချားမြို့နယ်အထိ ရောက်ရှိစစ်ရှောင်ခိုလှုံလာကြခြင်းဖြစ်ပါသည်။
“ဘာကြောင့် သူတို့မပြန်သေးလဲဆိုတာ ကျနော်တို့လည်း မသိရဘူး။ တိုက်ပွဲ ဖြစ်တာ မကြားတော့ဘူး။ ငြိမ်နေတယ်။ မပြန်ရဲလို့ မပြန်တာလားဆိုတာ ကျနော်တို့လဲ မသိဘူး” ဟု စစ်ဘေးရှောင်များကို ကူညီထောက်ပံ့ပေးနေသည့် အမျိုးသား တစ်ဦး က သျှမ်းသံတော်ဆင့် ကိုပြောသည်။
လက်ရှိ စစ်ဘေးရှောင် (၆၀၀) ခန့်အတွက် စားနပ်ရိက္ခာများ အဆင်ပြေနေသော်လည်း ရေရှည်အတွက် ကိုဗစ်-၁၉ ရောဂါကြောင့် စားနပ်ရိက္ခာများ အခက်အခဲဖြစ်လာနိုင်ကြောင်း ၎င်း အမျိုးသားက ဆိုသည်။
“ခုလက်ရှိက နေရာအခက်ခဲဖြစ်တယ်။ လူများတော့ အိပ်တဲ့နေရာတွေ ခက်ခဲတယ်။ ခုက အလှူရှင်တွေ ထောက်ပံ့ထားတဲ့ အစားအသောက်တွေရှိသေးလို့ အဆင်ပြေနေသေးတာ။ ရေရှည်တော့ ခက်ခဲလာမယ်” ဟု စစ်ရှောင်များကို ကူညီထောက်ပံ့ပေးနေသည့် အမျိုးသား တစ်ဦးကပြောသည်။
ကိုဗစ်-၁၉ ရောဂါ မြှင့်တက်နေချိန်မှာ စစ်ရှောင်များကို ကူညီထောက်ပံ့ရန်အတွက် ယနေ့ ဇူလိုင် (၂၆) ရက်မှ စတင်ပြီး ခေတ္တရပ်နားထားမည်ဖြစ်ကြောင်း ကျေးသီး၊ သီပေါ၊ မိုင်းကိုင်၊ လဲချား စသည့် စစ်ဘေးရှောင်များကို လိုက်လံ ကူညီထောက်ပံ့ပေးနေသည့် အမျိုးသား တစ်ဦးက သျှမ်းသံတော်ဆင့် ကိုပြောသည်။
လဲချားမြို့နယ်ရှိ စစ်ဘေးရှောင်များမှာ ဝမ်ထီရွာ (၆၀) ကျော်၊ စလိုင်းခုံရွာ (၂၀) ကျော်၊ နမ့်လေရွာ (၄၀၀) ကျော် နှင့် တတ်မောက် ဟိုလုံးရွာ (၁၀၀) ကျော် စုစုပေါင်း (၆၀၀) ခန့်ရှိပြီး ၎င်းတို့သည် မိခင် နှင့်ကလေးများ ၊ သက်ကြီးရွယ်အိုများ ဖြစ်ကြကြောင်း သိရသည်။
“တစ်ချို့တော့ ပြန်ပြီး သူတို့ရဲ့ တောင်ယာပြန်သွားလုပ်တာရှိတယ်။ တစ်ချို့လည်း ပစ္စည်းပြန်သိမ်းတာရှိတယ်။ တစ်ချို့လည်း ပြန်လာတာရှိတယ်” ဟု အသက် (၃၀) ကျော် အမျိုးသား တစ်ဦးကပြောသည်။
အဆိုပါ စစ်ရှောင်များသည် ဇူလိုင် ဒုတိယအပတ်က (၁၀၀၀)ကျော် အထိရှိခဲ့ပြီး တစ်ချို့ စစ်ရှောင်များသည် ဆွေမျိုးများ နေအိမ်သို့ လာရောက်နေထိုင်ကြောင်းသိရသည်။
