သျှမ်းပြည်မြောက်ပိုင်း နမ့်လန်မြို့နယ် ဝမ်းစိမ်းကျေးရွာ ယနေ့ (ဇူလိုင် ၂၆) မနက် ၅ နာရီ တွင် RCSS/SSA နှင့် SSPP/SSA တို့ တိုက်ပွဲဖြစ်ပွားခဲ့ကြောင်း စုံစမ်းသိရှိရသည်။
ယနေ့မနက်ပိုင်းဖြစ်ပွားသည့် တိုက်ပွဲတွင် လက်နက်ကြီးသံဖြစ်ပြီး နမ့်လန်မြို့ပတ်ဝန်းကျင်ထိ အသံကြားရကြောင်း နမ့်လန့်မြို့ဒေသခံ အမျိုးသားတဦး ကပြောသည်။
“ လက်နက်ကြီးသံတွေ ပဲအများဆုံးကြာရတာ။ မနက် ၅ ခွဲကတည်းက ဖြစ်တာ။ ၉ နာရီကျော်လောက်မှငြိမ်သွားတယ်။ ဘယ်နားဖြစ်မလဲတော့သေချာမသိရသေးဘူး။ တချို့တော့လည်း ရေဖြူကျေးရွာဘက်လို့ပြောတယ်” ဟု နမ့်လန်မြို့ဒေသခံအမျိုးသားတဦး ကပြောသည်။
လက်ရှိအခြေအနေ အရ နမ့်လန်မြို့တွင်လည်း ကိုဗစ်- ၁၉ ပြန့်ပွားမှုများသည့်အတွက် နေအိမ်ထဲတွင်သာနေကြသဖြင့် ယနေ့ မနက်ဖြစ်သည့် တိုက်ပွဲအခြေအနေ နှင့်နေရာကို အတိအကျ မသိရသေးကြောင်း လည်း နမ့်လန်ဒေသခံများက ပြောဆိုသည်။
“ ကျနော်တို့နမ့်လန်မှာကိုဗစ် ဖြစ်နေတယ်။ ဘယ်နေရာဖြစ်လဲဆိုတာ ကျနော်တို့အရင်လိုသွားကြည့်မရဘူး။ အိမ်ပြင်ထွက်လို့မရဘူး” ဟု နမ့်လန့်မြို့ ဒေသခံတဦးက ပြောသည်။
တိုက်ပွဲနှင့်ပတ်သတ်ပြီး သျှမ်းပြည်ပြန်လည်ထူထောင်ရေးကောင်စီ RCSS/SSA ပြောခွင့်ရ ဗိုလ်မှူး စိုင်းခမ်းစံက “ အရင်ကတော့သီပေါမြို့နယ်ဘက်ဖြစ်တယ်။ ခုတော့နမ့်လန်ဘက် ရောက်လာတယ်။ တိုက်ပွဲကတော့ ဆက်ဖြစ်သွားနိုင်တယ်။ ဝမ်းစိမ်းကျေးရွာအုပ်စုဘက်ဖြစ်တယ်” ဟု ပြောသည်။
သို့သော် သျှမ်းပြည်တိုးတက်ရေးပါတီ SSPP/SSA ပြောခွင့်ရ ဗိုလ်မှူး စိုင်းဖုန်းဟန်ကို သျှမ်းသံတော်ဆင့်မှ ဆက်သွယ်ရာတွင် ဖုန်းလက်ခံဖြေကြားခြင်းမရှိခဲ့ပေ။
တိုက်ပွဲကြောင့် ပြည်သူများတစ်ချို့ မြို့ပေါ်သို့ ထွက်ပြေးတိမ်းရှောင်လာခဲ့ကြောင်းသိရသည်။
“ စစ်ဘေးရှောင်အနေနဲ့တော့မရှိသေးဘူး။ တစ်ချို့ကတော့ မြို့ထဲအိမ်ရှိတဲ့သူတွေက ကလေးတွေကိုခေါ်လာပြီးတော့ ထွက်လာခဲ့တယ်။ စစ်ရှောင်တွေစုနေတာတော့ မရှိသေးဘူး” အထက်ပါ နမ့်လန်မြို့ ဒေသခံအမျိုးသားတဦးက ပြောသည်။
ထိုနည်းတူ ဇူလိုင် ၂၂ ရက် မှစတင်ပြီး သီပေါမြို့နယ် နောင်အန်ကျေးရွာအနီးတွင် သျှမ်းတပ် ၂ တပ် တိုက်ပွဲစတင်ဖြစ်ပွားခဲ့ကြောင်းသိရသည်။
Leave a Comments