သျှမ်းပြည် တောင်ပိုင်း တောင်ကြီးမြို့နယ် အေးသာယာမြို့တို့တွင် အမျိုးသား ဒီမိုကရေစီအဖွဲ့ချုပ် (NLD) အဖွဲ့ဝင် အမျိုးသမီးတစ်ဦး ကို စစ်ကောင်စီ မှ ပုဒ်မ (၅၀၅)ဖြင့် ဖမ်းဆီး တရားစွဲဆိုထားကြောင်း သတင်းရရှိသည်။
ဖြစ်စဉ်မှာ ယမန်နေ့(ဇူလိုင် ၁၂)ရက် နေ့လည် ၁၁နာရီ ကျော်တွင် အေးသာယာမြို့တွင်နေထိုင်သည့် မထွေးထွေးမြင့် Facebook( လူမှုကွန်ရက်စာမျက်နှာ)ပေါ်တွင် နိုင်ငံတောအကြည်ညိုပျက်စေသည့် အရေးအသား ဟု ပြောဆိုကာ စစ်ကောင်စီ မှ ပုဒ်မ (၅၀၅)ဖြင့် လာရောက်ဖမ်းဆီးခေါ်ဆောင်သွားကြောင်း အေးသာယာမြို့နေ အမည်မဖော်လိုသည့် အမျိုးသမီး တစ်ဦး က သျှမ်းသံတော်ဆင့် ကို ပြောသည်။
“ မနေ့က ၁၁နာရီ စစ်ကား ၃စီး လူအင်အား ၃၀ခန့်က သူ့အိမ်ကိုလာဝိုင်ပြီး စစ်ဆေးမေးမြန်းဖို့ရှိတယ်ဆိုပြီး ဖမ်းခေါ်သွားတာ။ လာတဲ့သူတွေကလည်း အရပ်ဝတ်တွေပဲ။ ကျမသိရသလောက်တော့ သူ့ ဖေ့ဘွတ်ပေါ်မှာ ရေးသားတဲ့ကိစ္စကြောင်လို့ပြောတာပဲ” ဟု ၎င်းအမျိုးသမီးက ပြောသည်။
လက်ရှိ ဖမ်းဆီးခံရသည့် မထွေးထွေးမြင့်ကို တောင်ကြီးအမှတ်(၁) ရဲစခန်းတွင် ဖမ်းဆီးထိန်းသိမ်းထားကြောင်း သိရသည်။
အဆိုပါ အဖမ်းခံရသည့် မထွေးထွေးမြင့် သည် NLD ပါတီ အဖွဲ့ဝင်တစ်ဦးဖြစ်ပြီး၊ ပါတီနှင့် ပတ်သက်သည့် တာဝန်များကို ပေးအပ်ထားခြင်းမရှိကြောင်း သိရသည်။
“မထွေးထွေးမြင့်က ရိုးရိုးပါတီဝင်တစ်ဦးပါ၊ ပါတီပိုင်းမှာ ဘာဝာာဝန်မှ မယူထားပါဘူး၊ ပြီးတော့ ဆန္ဒပြမှုမှာ လည်း အစောပိုင်းက ငြိမ်းချမ်းစွာ ဆန္ဒထုတ်ဖော်မှုမှာပဲ ပါဝင်ဖြစ်ပါတယ်” ဟု အေးသာယာမြို့မှ NLD ပါတီ တာဝန်ရှိသူ တစ်ဦး က သျှမ်းသံတော်ဆင့်ကို ပြောသည်။
စစ်ကောင်စီမှ အေးသာယာမြို့ ဒေသခံ(၁၀)ဦးထက်မနည်း ဖမ်းဆီးထားရှိကြောင်း၊ ထိုဖမ်းဆီးမှုကြောင့်လည်း ဒေသခံများက စိုးရိမ်မှုရှိနေကြောင်း သိရသည်။
“ နိုင်ငံရေးနဲ့ ပက်သက်တာဆိုလို့ နွေဦးတော်လှန်ရေး အစောပိုင်းကာလမှာ ငြိမ်းချမ်းစွာ ဆန္ဒပြမှုလုပ်ဆောင် တာပဲရှိတယ်၊ အခုက Facebook ပေါ်မှာ နိုင်ငံတော်အကြည်ညိုပျက်စေမှုကို ရေးသားလို့ဆိုပြီး ၅၀၅ တပ်တယ်။ ခုခေတ်က ရေးနေတိုင်းသာဖမ်းမယ်ဆိုရင် ဘယ်မှာလည်း လူ့အခွင့်အရေး” ဟု အထက်ပါ ပုဂ္ဂိုလ်က ဆိုသည်။
စစ်တပ်မှ နိုင်ငံတော် အာဏာသိမ်းယူပြီးနောက်ပိုင်း NLD အဖွဲ့ဝင်များနှင့် အာဏာရှင်စနစ် ဆန့်ကျင်တော် လှန်နေသော လူငယ်အများစုပါဝင်သည့် PDF အဖွဲ့ဝင်များကိုစစ်ကောင်စီတပ်သားများက လိုက်လံဖမ်းဆီးမှု များ ရှိနေကြောင်းသိရသည်။
