သျှမ်းပြည်ပြန်လည်ထူထောင်ရေးကောင်စီ၊သျှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်တပ်ဖွဲ့ တို့ ဖြစ်ပွားသောတိုက်ပွဲသည် ငြိမ်းချမ်းသည့် နည်းလမ်းဖြင့် ဖြေရှင်းသင့်ကြောင်း RCSS/SSA ကပြောဆိုလိုက်သည်။
RCSS/SSA နှင့် မြောက်ပိုင်း မဟာမိတ်တပ်ဖွဲ့ဖြစ်သော SSPP/SSA နှင့် TNLA တို့သည် သျှမ်းပြည်မြောက်ပိုင်း နမတူမြို့နယ်၊ ကျောက်မဲမြို့နယ် နှင့် သီပေါမြို့နယ်တို့အတွင်း တိုက်ပွဲဖြစ်ပွားမှုကြောင့် ဒေသခံပြည်သူများ စစ်ဘေးရှောင်နေရပြီး ယနေ့ချိန်ထိ နေရပ် မပြန်နိုင်သေးပေ။
ထို့ကြောင့် သျှမ်းမြောက် စစ်ရေး ပဋိပက္ခပြဿနာကို စားပွဲပေါ် တွေ့ဆုံဆွေးနွေးခြင်းသည်သာ အကောင်းဆုံး နည်းလမ်းဖြစ်ကြောင်း RCSS/SSA ၏ ပြောရေးဆိုခွင့်ရှိသူ ဗိုလ်မှူး ခမ်းစံ က သျှမ်းသံတော်ဆင့်ကို ပြောသည်။
“ငြိမ်းချမ်းသောနည်းလမ်းဖြင့်ဆိုတာ စားပွဲဝိုင်းပေါ် တွေ့ဆုံဆွေးနွေးတာ အကောင်းဆုံးဖြေရှင်းတဲ့နည်းလမ်းဖြစ်တယ်။ ခုဖြစ်နေတာက ပဋိပကတစ်ခုကို လက်နက်ကိုင်ပြီးတော့ ဖြေရှင်းတာ မပြီးနိုင်ခဲ့ဘူးလေ။ အဲ့ဒါကို ဆိုလိုတာဖြစ်ပါတယ်” ဟု ဗိုလ်မှူးခမ်းစံ က ဆိုသည်။
သျှမ်းပြည်မြောက်ပိုင်းအတွင်း ဖြစ်ပွားနေသော စစ်ရေးပဋိပကများနှင့် ပတ်သက်ပြီး ငြိမ်းချမ်းသောနည်းလမ်းဖြင့် ဝိုင်းဝန်းကြိုးပမ်းဆောင်ရွက်ဖြေရှင်းကြစေလိုကြောင်း ယနေ့ ဇူလိုင် (၈) ရက်တွင် RCSS/SSA က ထုတ်ပြန်ကြေညာလိုက်သည်။
နိုင်ငံရေး ပြဿနာများကို စစ်ရေးနည်းလမ်းဖြင့် စစ်ရေးနည်းလမ်းဖြင့် ဖြေရှင်းမည်ဆိုပါက ဖြေရှင်းနိုင်မည် မဟုတ်ဘဲ ပြဿနာများကိုသာပိုမိုကြီးမားကျယ်ပြန့်လာစေနိုင်ပြီး အောက်ခြေတပ်ဖွဲ့ဝင်များနှင့် ဒေသခံများဆင်းရဲ ဒုက္ခအမျိုးမျိုးကြုံတွေ့စေမည် ဖြစ်ကြောင်း RCSS/SSAထုတ်ပြန်ချက်တွင်ရေးသားထားသည်။
ဆက်လက်ပြီး RCSS/SSA အနေဖြင့် သျှမ်းပြည်မြောက်ပိုင်း စစ်ရေး ပဋိပက္ခများတွင် ခံစစ်သွင်းသာဖော်ဆောင် နေခြင်းဖြစ်ကြောင်း ထုတ်ပြန်ချက်တွင်ဖော်ပြထားသည်။
“စာ မထုတ်ခင်ကတည်းက နှစ်ဖွဲ့စလုံးကို စဉ်းစားစေချင်တာပေါ့နော်။ ဘယ်အဖွဲ့ကပဲ နိုင်သွားသည်ဖြစ်စေ တကယ်ရှုံးနေတာက ပြည်သူတွေဖြစ်တယ်။ အရင်ကတည်းက ပဋိပကတွေကို ကြိုတင်ဖြေရှင်းစေချင်တာပေါ့နော်။ လက်နက်ကိုင်ပြီး ဖြေရှင်းရင်တော့ ဘယ်တော့မှ မပြီးနိုင်ဘူး” ဟု ကျောက်မဲမြို့နယ်အတွင်း စစ်ဘေးရှောင်များကို ကူညီပေးနေသည့် ဒေသခံ စိုင်းနောင့် က သျှမ်းသံတော်ဆင့် ကိုပြောသည်။
လက်ရှိချိန်ထိ သျှမ်းပြည်မြောက်ပိုင်း ကျောက်မဲမြို့နယ် တော့ဆန်ကျေးရွာအုပ်စု နှင့် သျှမ်းပြည်တောင်ပိုင်း ကျေးသီးမြို့နယ်တို့အတွင်း RCSS/SSA နှင့် SSPP/SSA တို့ တိုက်ပွဲပြင်းထန်နေကြောင်း စုံစမ်းသိရှိရသည်။
“တိုက်ပွဲကျတော့ တောင်ပိုင်းမှာဆိုရင် ကျေးသီးမှာဖြစ်နေတယ်။ မြောက်ပိုင်းလည်း ဖြစ်နေတယ်ခင်ဗျာ။ စစ်ရေးတင်းမာ တာတွေ ရှိနေတုန်းပဲ။” ဟု ဗိုလ်မှူးခမ်းစံ က သျှမ်းသံတော်ဆင့် ကိုပြောသည်။
စစ်အာဏာသိမ်းပြီးနောက်ပိုင်း RCSS/SSA နှင့် မြောက်ပိုင်းမဟာမိတ် တပ်ဖွဲ့တို့ တိုက်ပွဲဖြစ်ပွားပြီး ယနေ့ချိန်ထိ စစ်ရေး တင်းမာနေပြီး ဒေသခံ(၃၀၀၀)ကျော် နေရပ်စွန့်ခွာ ထွက်ပြေးနေရသည်။
