သျှမ်းပြည်တောင်ပိုင်း ကျေးသီးမြို့နယ် မိုင်ကောင်ကျေးရွာအုပ်စု နားထွန်ကျေးရွာ အနီး RCSS/SSAနှင့် SSPP/SSA တိုက်ပွဲဖြစ်ပွားမှုကြောင့် လယ်ယာလုပ်ကိုင်သည့် အရပ်သား (၁)ဦး ကျည်ထိမှန်ခဲ့ကြောင်း စုံစမ်းသိရသည်။
ဖြစ်စဉ်မှာ ဇူလိုင် ၄ ရက် မနက် ၈ နာရီအချိန်တွင် အသက် (၃၀)အရွယ်ရှိ စိုင်းစံအောင် လယ်ယာသွားကြည့်ချိန်တွင် RCSS/SSAနှင့် SSPP/SSAတို့တိုက်ပွဲမှု နှင့် တိုးကာ ကျည်ထိမှန်ခဲ့ကြောင်း ကျေးသီးမြိုု့နယ် စစ်ဘေးရှောင်ပြည်သူများကို ကူညီပေးနေသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
“ သူ က မနက်လယ်သွားကြည့်တာ။ သူလယ်ထဲရောက်တော့ တိုက်ပွဲနဲ့တိုးတာ။ အဲ့ဒါနဲ့ သူခြေထောက် ကျည်ထိမှန်သွားတယ်။ ရွာမှာပဲ ဆေးကုနေတယ်” ဟု စစ်ဘေးရှောင်ကူညီနေသည့် အမျိုးသားတစ်ဦးက ပြောသည်။
အဆိုပါ ကျေးရွာအနီးတွင် SSPP/SSAတပ်ရှိနေကာ ထိုအချိန်တွင် တိုက်ပွဲဖြစ်ပွားမှုရှိနေသဖြင့် ကျည်ထိမှန်သည့် စိုင်းစံအောင်ကို မြို့ထဲသို့ချက်ချင်းမပို့ဘဲ ကျေးရွာထဲတွင် SSPP/SSA ဆေးမှူးမှ ဆေးကုပေးခဲ့ကြောင်းသိရသည်။
လက်ရှိမှာတော့ ကျည်းထိမှန်ခံခဲ့ရသည် စိုင်းစံအောင် ကို သျှမ်းပြည်တိုးတက်ရေးပါတီ ဌာနချုပ်( ဝမ်းဟိုင်း)တို့ ခေါ်ဆောင်သွားပြီး ဆေးကုပေးနေကြောင်း ကျေးသီးမြို့ စစ်ဘေးရှောင်များကို လိုက်လံကူညီပေးနေသည့် စိုင်းတင် က သျှမ်းသံတော်ဆင့် ကို ပြောသည်။
“ အရပ်သားတစ်ဦး ကျည်ထိမှန်တယ်ဆိုတဲ့သတင်းကြားရတယ်။ လယ်သွားကြည့်ရင်နဲ့ ခြေထောက် ကျည်းမိတယ်လို့ ပြောတယ်။ အခုက ဝမ်းဟိုင်ကိုခေါ်ပြီးဆေးကုပေးနေတယ်လို့ကြားတယ်” ဟု စိုင်းတင် က ဆိုသည်။
အဆိုပါ ထိုပြည်သူကျည်းထိမှန်းခဲ့သည့် ကိစ္စနှင့်ပတ်သတ်ပြီး သျှမ်းပြည်တိုးတက်ရေးပါတီ SSPP ပြောခွင့်ရ ဗိုလ်မှူးစိုင်းဖုန်ဟန်ကို သျှမ်းသံတော်ဆင့်အနေဖြင့် ဖုန်းဆက်သွယ်မေးမြန်ရာတွင် ဖုန်းကိုင်ဖြေကြားခြင်းမရှိခဲ့ပေ။
ကျေးသီးမြို့နယ်လွိုင်ဟွန်းတောင်ကြောတွင် RCSS/SSA နှင့် SSPP/SSA တို့ ၁ လကြာတိုက်ပွဲဖြစ်ပွားခဲ့ပြီး စစ်ဘေးရှောင် (၃၀၀၀)ကျော် စစ်ဘေးရှောင်နေရကြောင်းသိရသည်။
Leave a Comments