သျှမ်းပြည် တောင်ပိုင်း ဟိုပုံးမြို့နယ်အတွင်းရှိ မီတာခ ပေးဆောင်ခြင်း မရှိသည့် အိမ်ခြေ (၁၅) အိမ်မီးလိုင်းကြိုး ဖြတ်ခံလိုက်ရကြောင်း သတင်းရရှိသည်။
ဇူလိုင်လ ၅ ရက်တွင် ဟိုပုံးမြို့နယ် နမ့်ခုတ်စံပြကျေးရွာ၊ အမှတ် (၄) ရပ်ကွက်ရှိ မီတာခ ပေးဆောင်ခြင်းမရှိသည့် နေအိမ် (၁၅) အိမ်မှ မီးလိုင်းကြိုးများကို လျှပ်စစ်ရုံးဝန်ထမ်းများ မဟုတ်သည့် ဌာန ပြည်သူ့စစ် အဖွဲ့ဝင်တစ်ဦးက မီးလိုင်းကြိုးများကိုလာရောက် ဖြတ်သွားကြောင်းသိရသည်။
“သူတို့က မီတာခ သွားဆောင်ခိုင်းပါတယ်၊ ကျနော်တို့က သွားမဆောင်တော့ အိမ်ရှေ့မှာ ရှိတဲ့ မီးလိုင်းကြိုးနဲ့ မီတာဘောက်ကို လာဖြုတ်ယူသွားတယ်၊ လာဖြုတ်တဲ့သူက လျှပ်စစ်ရုံးဝန်ထမ်းလည်း မဟုတ်ပါဘူး၊ သူက ဒီဒေသအတွင်းက ပြည်သူ့စစ် တစ်ဦးပဲ ဖြစ်ပါတယ်” ဟု နမ့်ခုတ်စံပြကျေးရွာမှ မီးလိုင်းကြိုးဖြတ်ခံလိုက်ရ သည့် ဒေသခံတစ်ဦးက သျှမ်းသံတော်ဆင့်ကို ပြောသည်။
အဆိုပါ နမ့်ခုတ်စံပြကျေးရွာမှ လျှပ်စစ်မီး နှင့် မီတာခဆိုင်ရာ ကိစ္စရပ်များကို စစ်ကောင်စီက ၎င်း၏ လက်အောက်ခံ ဌာနေပြည်သူ့စစ်အဖွဲ့ကို စေခိုင်းလုပ်ဆောင်ခြင်းဖြစ်ကြောင်းလည်း သိရသည်။
“မီတာခ မဆောင်တဲ့ အိမ်တွေ မီးလိုင်းဖျက်ခံရမယ်ဆိုပြီး ရောက်လာတယ်၊ လျှပ်စစ်ရုံးကလား ဆိုတော့ မဟုတ်ဘူးတဲ့၊ နမ့်ခုတ်စံကပြကျေးရွာက မီးကိစ္စအရာရာအတွက် စစ်ကောင်စီက ဌာနပြည်သူ့စစ်ကို တာဝန်ပေးထားပြီးပြီတဲ့၊ မီးလိုင်းလာဖြတ်တဲ့သူက အဲ့လို ပြောသွားတယ်” ဟု အထက်ပါ ပုဂ္ဂိုလ်က ပြောသည်။
အာဏာသိမ်းစစ်ကောင်စီကို ဆန့်ကျင်သည့် အနေဖြင့် ပြည်သူများက မီတာခ နှင့် အခြားအခွန်တို့ကိုလည်း ပေးဆောင်ခြင်း မပြုဘဲ ဆန္ဒပြမှုများ ပြုခဲ့သော်လည်း ပြီးခဲ့သည့် ဇူလိုင်လအတွင်းမှာ စစ်ကောင်စီမှ မီတာခ များ ပေးဆောင်ရန် စေခိုင်းလာသောကြာင့် တချို့သူများက မီတာခများကို ပေးဆောင်လာကြကြောင်းလည်း ၎င်းက ပြောသည်။
“သူတို့ကတော့ မီးမရတော့ရင် အခက်အခဲတွေရှိမယ်ပေါ့၊ အဲ့ကြောင့် မီတာခ သွားဆောင်တဲ့သူတွေလည်း ရှိကြပါတယ်၊ ဒါပေမယ့် ကျွန်တော်တို့ကတော့ မဆောင်ပါဘူး၊ အခုလို မီးဖြတ်ခံရလည်း မဆောင်ပါဘူး” ဟု ၎င်းက ပြောသည်။
စစ်တပ်မှ နိုင်ငံတော်အာဏာ မသိမ်းယူခင် ပြီးခဲ့သည့် ၂၀၂၀ ခုနှစ် ကိုဗစ် ၁၉ ကာလတွင် အမျိုးသားဒီမိုကရေစီ အဖွဲ့ချုပ် NLD ပါတီမှ ပြည်သူများ စားဝတ်နေရေးအခက်အခဲကြောင့် မီတာခအပြင် အခြားသော အခွန်များကိုပါ ဖြေလျှော့ခွင့် ပေးထားခဲ့ကြောင်းသိရသည်။
