သျှမ်းပြည်မြောက်ပိုင်း ကျောက်မဲမြို့နယ် တော့ဆန်ကျေးရွာဘက် လက်နက်ကိုင် တပ်ဖွဲ့များရှိနေသေးသဖြင့် တိုက်ပွဲများထပ်မံဖြစ်ပွားမည်ကို စိုးရိမ်ကြောင်း သတင်းရရှိသည်။

ကျောက်မဲမြို့နယ် တော့ဆန်ကျေးရွာ အနီးတွင် ဇူလိုင် ၁ရက် သျှမ်းပြည်ပြန်လည်ထူးထောင်ရေးကောင်စီ ( RCSS/SSA) နှင့် မြောက်ပိုင်းမဟာမိတ် သျှမ်းပြည်တိုးတက်ရေးပါတီ (SSPP/SSA )၊ တအာင်း(ပလောင်) အမျိုးသားလွတ်မြောက်ရေး တပ်မတော် ( TNLA )တို့ တိုက်ပွဲဖြစ်ပွားကာ စစ်ရှောင် (၈၀၀)ကျော် ထွက်ပြေးတိမ်းရှောင်နေရသည်။

လက်ရှိမှာ တိုက်ပွဲရပ်တန့်ထားသော်လည်း ကျေးရွာအတွင်း မြောက်ပိုင်းမဟာမိတ်တပ်ဖွဲ့များရှိနေသေးသဖြင့် စစ်ရှောင်ပြည်သူများက စိုးရိမ်ကြောင့်ကြကာ နေရပ်မပြန်ရဲသေးကြောင်း သိရသည်။

“ ကျနော်တို့မပြန်ရဲသေးဘူး။ တော့ဆန်ဖက် မဟာမိတ်တွေရှိနေသေးတယ်။ တိုက်ပွဲတော့ မဖြစ်တော့ဘူး။ သူတို့တွေရှိနေသေးလို့ ကျနော်တို့ မပြန်ရဲသေးဘူး။ သူတို့ စစ်သားကောက်မှာလဲကြောက်တယ်။ ” ဟု စစ်ရှောင် အမျိုးသားတစ်ဦး က ပြောသည်။

ထို့အပြင် ကျေးရွာအတွင်း တပ်သားများရှိနေသေးသဖြင့် ရွာထဲတွင် ကျန်ရှိနေသေးသည့် မသန်စွမ် ပြည်သူ (၉ )ဦး ကိုသွားရောက်မခေါ်နိုင်သေးကြောင်း လည်း သိရသည်။

“ ရွာထဲမှာ မသန်စွမ်း ဖြစ်နေတဲ့ သူ (၉) ဦးကျန်နေသေးတယ်။ ကျနော်တို့ မသွားခေါ်လာရဲသေးဘူး။ သူတို့ကို စိတ်ပူရတယ်။ ကျနော်တို့သူတို့သွားခေါ်ဖို့ခက်နေသေးတယ်” ဟု စစ်ရှောင် ပြည်သူတစ်ဦးက သျှမ်းသံတော်ဆင့် ကို ပြောသည်။

အဆိုပါ မြောက်ပိုင်းမဟာမိတ်တပ်ဖွဲ့များ ကျေးရွာဖက်တွင် ရှိ ၊ မရှိ ကို အသေးစိတ်မသိရှိရသေးကြောင်း တအောင်းအမျိုးသားလွတ်မြောက်ရေးတပ်မတော် TNLA ပြောခွင့်ရ ဗိုလ်မှူးမိုင်းအိုက်ကျော်က သျှမ်းသံတော်ဆင့်ကို ပြောသည်။

“ တိုက်ပွဲကတော့ မဖြစ်တာ ၂ ရက်ရှိပြီး။ တပ်သားတွေအဲ့ဘက်ရှိ၊မရှိကိုတော့ ကျနော်တို့ အသေးစိတ်မသိရှိရသေးဘူး။ RCSS ဖက်ကနေ ထိုးစစ်လာရင်တော့ တိုက်ပွဲပြန်ဖြစ်နိုင်တယ်” TNLA ပြောခွင့်ရ ဗိုလ်မှူးမိုင်းအိုက်ကျော်က ပြောသည်။

မြောက်ပိုင်းမဟာမိတ်တပ်ဖွဲ့ဖြစ်သည့် TNLA ၊ SSPP/SSA နှင့် RCSS/SSA တို့သည် တော့ဆန်ကျေးရွာအုပ်စု အတွင်း မကြာခဏ တိုက်ပွဲဖြစ်ပွားခဲ့ပြီး တော့ဆန်ဒေသခံများ (၆) လကျော်ကြာ ယနေ့ချိန်ထိ နေရပ်သို့ မပြန်နိုင်သေးသည့် စစ်ရှောင်များလည်း ရှိကြောင်း သိရသည်။