သျှမ်းပြည်တောင်ပိုင်း ကျေးသီးမြို့တွင် သျှမ်းတပ် (၂) တပ် တိုက်ပွဲကြောင့် ဒေသခံ ( ၅၀၀) ကျော် စစ်ဘေးထပ်မံရှောင် လာရကြောင်း စုံစမ်းသိရှိရသည်။
ကျေးသီးမြို့နယ်တွင် သျှမ်းပြည်တိုးတက်ရေးပါတီ SSPP/SSA နှင့် သျှမ်းပြည်ပြန်ထူးထောင်ရေးကောင်စီ RCSS/SSA တို့ တိုက်ပွဲကြောင့် ယမန့်နေ့ (ဇူလိုင် ၁) ရက်တွင် ညနေအချိန်ထိ ပြည်သူများ စစ်ဘေးရှောင်နေရကြောင်းသိရသည်။
“ မနေ့ညထိ စစ်ဘေးရှောင်အားလုံး စာရင်းက ( ၅၈၇) ယောက်ရှိတယ်။ ဒီနေ့လည်းထပ်လာသေးတယ်။ စာရင်းတော့ မသိရသေးဘူး။ ညနေအချိန်လာကြတယ်။ ဘုန်းကြီးကျောင်းမှာပဲလာနေကြတယ်” ဟု ကျေးသီးမြို့ စစ်ဘေးရှောင် ကူညီပေး နေသည့် ဒေသခံတစ်ဦးက သျှမ်းသံတော်ဆင့် ကိုပြောသည်။
အဆိုပါ ယခုချိန်သည် စိုက်ပျိုးရေးကာလဖြစ်ပြီး သျှမ်းတပ် (၂) တပ် တိုက်ပွဲဖြစ်ပွားမှုကြောင့် ပြည်သူများအနေဖြင့် လယ်ယာသွားဖို့ အခက်ခဲများစွာရှိနေရကြောင်းသိရသည်။
“ အခုချိန်က စိုက်ပျိုးတဲ့ရာသီဖြစ်တယ်။ အခုချိန်မှာ မစိုက်ပျိုးရဘူးဆိုရင် အချိန်ကကျော်လွန်သွားမယ်။ စိုက်ပျိုးရေး မလုပ်ရရင်နောက်နှစ် စားဝတ်နေရေးအတွက်က အခက်ခဲတွေရှိလာနိုင်တယ်။ သူတို့ တိုက်ပွဲဖြစ်တာက ကျနော်တို့ တော်တော်ထိခိုက်ရတယ်။” ဟု ကျေးသီးမြို့ စစ်ဘေးရှောင်ဒေသခံတစ်ဦး ကပြောသည်။
ကျေးသီးမြို့နယ်တွင် စစ်ဘေးရှောင်လာသည့် ပြည်သူ စုစုပေါင်း (၁၄၀၀) ကျော်ရှိလာပြီးဖြစ်ကြောင်းသိရသည်။
သျှမ်းတောင် ကျေးသီးမြို့နယ်ရှိ လွိုင်ဟွန်းတောင်ကြောတလျောက်တွင် RCSS/SSA နှင့် SSPP/SSAတို့ တလကြား စစ်ရေး ဖြစ်ပွားကာ ၊ (၂)ဖက်တပ် စစ်အင်အားဖြည့်တင်းမှုများပြုလုပ်နေကြပြီး၊ သျှမ်းတပ် (၂)တပ်လုံး နောက်ဆုတ်ရန် အစီစဉ်မရှိကြောင်း သိရသည်။
