သျှမ်းပြည် မြောက်ပိုင်း ကျေးသီးမြို့ နှင့် မိုင်းနောင်ကြားရှိ လွိုင်ဟွန်းတောင်ကြော အနီးတွင် သျှမ်းတပ်(၂) တပ် တိုက်ပွဲ ထပ်မံဖြစ်ပွားသဖြင့် စစ်ရှောင် (၁၀၀)နီးပါး ထပ်မံရောက်လာကြောင်းသိရသည်။
ယနေ့ နေ့လည် (၁)နာရီဝန်းကျင်တွင် သျှမ်းပြည်ပြန်လည်ထူထောင်ရေးကောင်စီ (RCSS/SSA) နှင့် သျှမ်းပြည်တိုးတက်ရေးပါတီ (SSPP/SSA) တို့ တိုက်ပွဲ ဆက်လက် ဖြစ်ပွားပြီး စစ်ရှောင် (၁၀၀)နီးပါးသည် ကျေးသီးမြို့ပေါ်သို့ ထပ်မံ ရောက်ရှိလာ ကြောင်း သိရသည်။
“မနေ့ကတည်း နှစ်ဖက်လုံးစစ်ရေးတင်းမာတွေ ရှိနေတယ်လို့ ကြားတယ်၊ ဒီနေ့ ၁ နာရီဝန်းကျင်လောက်မှာ ပစ်ခတ်သံတွေ စကြားရပါတယ်၊ တိုက်ပွဲတွေပိုပြီး ဆက်ပြင်းထန်နေမှာစိုးလို့ အနီးနားရွာက ပြည်သူတွေ မြို့ပေါ်ရှောင်လာတယ်” ဟုစစ်ဘေးရှောင်များကို ကူညီနေသူတစ်ဦး က သျှမ်းသံတော်ဆင့် ကို ပြောသည်။
တစ်လကြာကြာ ဖြစ်ပွားသည့် တိုက်ပွဲကြောင့် လက်ရှိတွင် ကျေးသီးမြို့ပေါ်တွင် စစ်ဘေးရှောင် (၁)ထောင်ကျော် ရောက်ရှိနေပြီး၊ စစ်ရှောင်အမျိုးသမီးများ နှင့် ကလေးငယ်များအတွက် တကိုယ်ရေသုံးပစ္စည်းများ လိုအပ်နေကြောင်း လည်း စစ်ဘေးရှောင် များကို ကူညီနေသူ တစ်ဦးက ဆိုသည်။
“ အမျိုးသမီးနဲ့ကလေးငယ်တွေ အတွက် တကိုယ်ရေသုံးပစ္စည်းတွေ လိုတယ်။ နောက် စစ်ရှောင်တွေ စားနပ်ရိက္ခာတွေ လည်း အခက်အခဲရှိနေပြီ” ဟု ၎င်းက ပြောသည်။
သျှမ်းတောင် ကျေးသီးမြို့နယ်ရှိ လွိုင်ဟွန်းတောင်ကြော တလျောက်တွင် RCSS/SSA နှင့် SSPP/SSAတို့ တလကြား စစ်ရေး ဖြစ်ပွားကာ ၊ နှစ်ဖက်တပ် စစ်အင်အားဖြည့်တင်းမှုများပြုလုပ်နေကြပြီး၊ သျှမ်းတပ် (၂)တပ်လုံး နောက်ဆုတ်ရန် အစီစဉ်မရှိကြောင်း သတင်းရရှိသည်။
သျှမ်းတပ်(၂)တပ် စစ်အင်အားဖြည့်တင်းမှုကို ကြည့်ခြင်းအားဖြင့် စစ်ရေး ပိုပြီး ပြင်းထန်လာနိုင်ကြောင်း၊ ထို့ကြောင့် ထိုတိုက်ပွဲအနီးတွင်နေထိုင်သည့် ပြည်သူများလည်း စိုးရိမ်ထိတ်လန့်နေရကြောင်း သိရသည်။
