သျှမ်းပြည် မြောက်ပိုင်း မူဆယ်မြို့ နောင်လောင်းကျေးရွာအုပ်စု မန်ဟောင်းလွယ်ကျေးရွာမှ အမျိုးသားတစ်ဦးသည် ပြီးခဲ့သည့် ဇွန်( ၂၆ )ရက် ည (၈) နာရီဝန်းကျင်တွင် သေနတ်ဖြင့် ပစ်ခံရကြောင်း သိရသည်။
ပြီးခဲ့သည့် ဇွန်လ ၂၈ ရက်နေ့ ည ၈ နာရီဝန်းကျင် အချိန်တွင် အမည်မသိလက်နက်ကိုင် လူ(၃)ယောက်သည် စိုင်းအိုက်ကျန် နေအိမ်သို့ ဆိုင်ကယ်နှင့်ရောက်လာပြီး မေးမြန်းချိန် လယ်တောမှ ပြန် လာသည့် ၎င်းကို အိမ်ရှေ့တွင် သေနတ်ဖြင့် (၅) ချက်ပစ်ခတ်သွားကြောင်း ၎င်း၏ ဆွေမျိုးနီးစပ်သူများက သျှမ်းသံတော်ဆင့်ကို ပြောသည်။
“ သေနတ် ကိုင်ထားတဲ့ လူ (၃)ယောက် က အိုက်ကျန်ရဲ့ နေအိမ်ကို လာတယ်။ အိုက်ကျန် ဘယ်သွား လဲ ဆိုပြီး သူ့ အဖေကို လာမေးတယ်၊ အဲ့ချိန်မှာ သူအိမ်မှာ မရှိသေးဘူး၊ သူတို့က(လက်နက်ကိုင်) ဆိုင်ကယ်နား ပြန်သွားပြီးစောင့်နေတယ်၊ အိုက်ကျန်က ပြန်လာတော့ သူတို့က သေနတ်နဲ့ (၅)ချက်ပစ်ထည့်လိုက်တာ” ဟု စိုင်းအိုက်ကျန်နဲ့ ဆွေမျိုးတော်စပ်သူတစ်ဦးက သျှမ်းသံတော်ဆင့်ကို ပြောသည်။
စိုင်းအိုက်ကျန် သေနတ်ထိမှန်ခံရသည့် ဒဏ်ရာများမှာ ရင်ဘတ်တွင်(၂)နေရာ၊ ခါးအောက်၊ လက်မောင်းနှင့် ဝမ်းဗိုက်တို့တွင် တစ်ချက်စီ ကျည်ထိမှန်ပြီး နမ့်ခမ်းမြို့ ပြည်သူ့ဆေးရုံမှာ တက်ရောက်ပြီး ဆေးကုသမှုခံယူ နေကြောင်း ၎င်းက ပြောသည်။
“သူ့ကို ရင်ဘတ်မှာရယ် ပြီးတော့ ခါးအောက်၊ လက်မောင်းဆုံနဲ့ ဝမ်းဗိုက်တွေမှာ သေနတ်မှန်ထားတယ်၊ သူ့ ခန္ဓာကိုယ်မှာချည်း စုစုပေါင်းကျည် (၅)ချက်ထိတာ။၊ အခုက နမ့်ခမ်းပြည်သူ့ဆေးရုံမှာ ကုနေတယ်” ဟု သျှမ်းသံတော်ဆင့် ကို ပြောသည်။
အဆိုပါ ပစ်ခတ်ခံရသည့် စိုင်းအိုက်ကျန်သည် ပြီးခဲ့သည့် ၂၀၁၅ ခုနှစ်မှ စတင်ပြီး SSPP/SSA တွင် ၂၀၁၈ ခုနှစ် အထိ တာဝန်ထမ်းဆောင်ခဲ့ဖူးကြောင်း SSPP/SSA ၏ သတင်း ဝက်ဆိုဒ်စာမျက်နှာတွင် တင်ထားသည်။
အဆိုပါ ကိစ္စနှင့် ပက်သက်ပြီး စိုင်းအိုက်ကျန် ၏ မိသားစုဝင်တစ်ဦး က “အရင်ကတော့ သူ SSPP/SSA မှာလုပ်ဖူးတာတော့ ကြားမိပါတယ်၊ ဒါပေမယ့် သူအလုပ်နားပြီးနောက်ပိုင်း ကျနော်တို့နဲ့ အတူ လယ်ခြံ အလုပ်တွေပဲ လုပ်နေတာပါ” ဟု ဆိုသည်။
လက်ရှိ စိုင်းအိုက်ကျန် ပစ်ခတ်ခံရသည့် ကိစ္စသည် မည်သည့် အဖွဲ့အစည်းလက်ချက်ဖြစ်ကြောင်း အတည် မပြုနိုင်သေးပေမယ့် အဆိုပါ နမ့်ခမ်းမြို့နယ် ထုန့်မောဝ်းဒေသ (ရွှေလီမြစ်ဝှမ်း) အတွင်းနေထိုင်သည့် ပြည်သူများအနေဖြင့် လက်နက်ကိုင် အုပ်စုများကို ကြောက်လန့်ရသည့် အခြေအနေရှိနေကြောင်း သိရသည်။
