သျှမ်းပြည် လားရှိုးမြို့ပေါ်တွင် ကားသမား အမျိုးသားတစ်ဦးကို အမည်မသိ လက်နက်ကိုင်မှ သေနတ်ဖြင့် ပစ်ခတ်ခဲ့ကြောင်း စုံစမ်းသိရသည်။
ယနေ့ (ဧပြီလ ၂ ရက်) မနက်ပိုင်း လားရှိုးမြို့ ရပ်ကွက် (၃) တွင် ကားသမား အမျိုးသားတစ်ဦးကို အမည်မသိ လက်နက်ကိုင်မှ သေနတ်ဖြင့်ပစ်ခတ်ခဲ့ကြောင်း လားရှိုးမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ကားသမားတစ်ယောက် ပါဆယ်ပို့ရင်းနဲ့ ပစ်ခံရတာ။ပစ္စည်းယူတဲ့တစ်ယောက်က ပိုက်ဆံ လိုက်ယူခိုင်းတဲ့အချိန် သေနတ်နဲ့ ပစ်တာ။၂ ချက်ပစ်ခံရတယ်တဲ့။ပန်းဆန်းက ပို့လာတဲ့ ပစ္စည်းပြောတယ်။ပစ်ခံရတဲ့ ကားသမားကတော့ မသေဘူး။လည်ပင်းနား တစ်ဝိုက်ထိသွားတာ။”ဟု လားရှိုးမြို့ ဒေသခံအမျိုးသားတစ်ဦးက ပြောသည်။
ထိုပစ်ခတ်ခံရသည့် အမျိုးသားသည် လက်ရှိတွင် ဆေးကုသမှုခံယူနေပြီး ပန်ဆန်း – လားရှိုး သွားလာနေသည့် ကားသမားတစ်ဦး ဖြစ်ကြောင်း သိရသည်။
ပြီးခဲ့သည့် (ဖေဖော်ဝါရီလ ၂၄ ရက်)တွင် လားရှိုးမြို့ ရပ်ကွက် (၅) ရှိ ကုန်စုံဆိုင်တစ်ဆိုင် အတွင်း ထိုင်နေသည့် အမျိုးသမီးတစ်ဦးကို အမည်မသိ လက်နက်ကိုင် အမျိုးသား (၃) ဦးက ဝင်ရောက် ဖမ်းဆီးကာ ပြန်ပေးဆွဲ ခေါ်ဆောင်သွားခဲ့သည်။
လားရှိုးမြို့ကို စစ်ကောင်စီတပ်ဖွဲ့ဝင်များ မြို့တွင်းလုံခြုံရေး ယူထားသည့်ကြားမှ လူသတ်မှု၊ ဓားပြတိုက် လုယက်မှုတို့ လတိုင်းနီးပါး ဖြစ်ပွားနေခြင်းကြောင့် မြို့နေပြည်သူများအကြား တရားဥပဒေ စိုးမိုးရေးနှင့် လုံခြုံရေး အခြေအနေအတွက် စိုးရိမ်စရာဖြစ်နေကြောင်း သိရသည်။
လားရှိုးမြို့အတွင်းရှိ ရပ်ကွက် (၁၂) ခုကို စစ်ကော်မရှင်တပ်က ထိန်းချုပ်ထားပြီး မြို့အပြင်ရှိ ကျေးရွာအုပ်စု အများစုကို ကိုးကန့်တပ်ဖွဲ့ MNDAA က ထိန်းချုပ်ထားသည်။
Leave a Comments