Monday, July 22, 2024

ကျောက်မဲမြို့နယ် တိုင်းရင်းသားလက်နက်ကိုင် အချင်းချင်း တိုက်ပွဲ ဆက်လက်ဖြစ်ပွား

Must read

သျှမ်းပြည်မြောက်ပိုင်း ကျောက်မဲမြို့နယ် တော့ဆန်ကျေးရွာအုပ်စုတွင် မြောက်ပိုင်းမဟာမိတ်တပ်ဖွဲ့ SSPP/SSA ၊ TNLA နှင့် RCSS/SSA ယမန့်နေ့ (ဇွန် ၂၂) ညနေ ( ၆) နာရီဝန်းကျင်တွင် တိုက်ပွဲထပ်မံဖြစ်ပွားခဲ့ကြောင်း စုံစမ်းသိရသည်။

ယမန်နေ့ တိုင်းရင်းသားအချင်းချင်း ဖြစ်ပွားသည့် တိုက်ပွဲသည် (၁) နာရီကျော်ကြာပစ်ခတ်ခဲ့ကြောင်း၊ တိုက်ပွဲ အနီးတဝှိက်တွင်နေထိုင်သည့် ပြည်သူတစ်ချို့ထွက်ပြေးတိတ်ရှောင်းခဲ့ရကြောင်း ဒေသခံများကပြောသည်။

“ ကျောက်မဲမှာက တိုက်ပွဲခဏခဏဖြစ်တယ်။ မနေ့ညတော့ ၁ နာရီကြာပစ်ခတ်မှုခဲ့တယ်။ ဒီနေ့က တော့ မကြားရသေးဘူး။ အခြေနေကတော့ နမ္မတူတို့ဘက်လောက်မဆိုးဘူးပေါ့ ” ဟု ကျောက်မဲမြို့ ဒေသခံတစ်ဦးက ပြောသည်။

ကျောက်မဲမြို့နယ် တော့ဆန်ကျေးရွာအုပ်စုတွင် RCSS/SSA နှင့် SSPP/SSA ၊ TNLA တို့သည် တိုက်ပွဲဖြစ်ပွားလာခဲ့သည့် မှာ (၆)လတာ ကြာခဲ့ပြီဖြစ်ပြီး လက်ရှိ အချိန်ထိ စစ်ရေး တင်းမာနေဆဲဖြစ်ပြီး၊ အချိန်မရွေး တိုက်ပွဲပြန်ဖြစ်နိုင်သည်။

ထို့တိုင်းရင်းသားအချင်းချင်းဖြစ်ပွားသည့် တိုက်ပွဲကြောင့် တော့ဆန်ကျေးရွာအုပ်စုအတွင်းရှိ ပြည်သူများလည်း စစ်ဘေးရှောင်နေရသည်မှာ (၆) လကြာ ရှိလာပြီး၊ ယနေ့ချိန်ထိ နေရပ်မပြန်နိုင်သေးကြောင်း သိရသည်။

“ တိုက်ပွဲက မနေ့က ထိဖြစ်တယ်။ ဘယ်ချိန်ထိ ဆက်ဖြစ်နေမလဲမသိဘူး။ စစ်ရှောင်တွေကတော့ ထွက်ပြေးနေရတာ (၆)လကြာပြီ။ နေရပ်မပြန်ရဲသေးဘူး” ဟု စစ်ဘေးရှောင်ကိုကူညီပေးနေသည့် သူတစ်ဦးက သျှမ်းသံတော်ဆင့် ကိုပြောသည်။

လက်ရှိ ကျေးရွာအတွင်း အသက်ကြီးသည့်သူများသာကျန်နေပြီး လူငယ်များသည် ထွက်ပြေးတိမ်းရှောင်နေရကြောင်း၊ တိုင်းရင်းသားလက်နက်ကိုင်များ တပ်သားသစ်စုဆောင်းမည်ကို လည်းကြောက်နေသဖြင့် နေရပ်ကို မပြန်ရဲကြောင်း သိရသည်။

“ ကျေးရွာမှာက လူတွေသိပ်မရှိတော့ဘူး။ လူကြီးပိုင်းတွေပဲရှိတော့တယ်။ လူငယ်တွေအများစုက ထွက်ပြေးသွားပြီး။ တပ်သားသစ်ကောက်မှာဆိုလို့ သူတို့ထွက်ပြေးကြတာ။ တစ်ခြားမြို့မှာသွားပြီး အလုပ်လုပ်ကြရတယ်။ ဘယ်တပ်က ကောက်တာလဲမသိဘူး။” ဟု ဒေသခံတစ်ဦးက ပြောသည်။

ကျောက်မဲမြို့နယ်တွင် တိုက်ပွဲများ မကြာခဏဖြစ်ပွားသည့်နေရာဖြစ်ပြီး၊ စစ်ဘေးရှောင်များ (၆)လသာ ရက်ရှည်လာသည့်အတွက်မည်သည့် အလှူရှင်မှ လာရောက်ပြီး လှူဒါန်းခြင်းမရှိတော့ကြောင်းလည်း စစ်ဘေးရှောင်ကူညီသည့် သူတစ်ဦးက ပြောပြသည်။

“ ရက်ရှည်လာတော့ အလှူရှင်လည်း မရှိတော့ စားဝတ်နေရေးခက်ခဲလာတယ်။ စစ်ရှောင်များစုက ဝမ်းရေးအတွက် တခြားနေရာပြောင်းပြီး အလုပ်သွားရှာကြတယ်။ စစ်ရှောင်နေရာကလည်း အဆင်မပြေတော့ဘူး” ဟု ၎င်းက ဆိုသည်။

သျှမ်းပြည်မြောက်ပိုင်းတွင် တိုင်းရင်းသားလက်နက်ကိုင်အချင်းချင်း တိုက်ပွဲမကြာခဏ ဖြစ်ပွားနေလျက်ရှိပြီး တိုက်ပွဲများကို အမြန်ဆုံးရပ်တန်ပေးရန်အတွက် သံဃာများ၊ ပြည်သူများက တောင်းဆိုကြသည်။

Leave a Comments

- Advertisement -spot_img

Latest article