သျှမ်းပြည်တောင်ပိုင်း တောင်ကြီးမြို့နယ် မောက်စံကျေးရွာတွင် ယမန်နေ့ (ဇွန် ၁၂)ရက် ညနေ ၃နာရီဝန်းကျင်တွင် အမျိုးသားဒီမိုကရေစီ အဖွဲ့ချုပ်(NLD) ပါတီဝင် တစ်ဦး သေနတ်ဖြင့် ပစ်သတ်ခံရကြောင်း သတင်းရရှိသည်။
ယမန်နေ့ (ဇွန် ၁၂)ရက် ညနေ ၃နာရီတွင် အသက် (၆၅)နှစ်အရွယ်ရှိ NLD ပါတီဝင် ဦးထွဋ်မောင်သည် ၎င်းပိုင်သည့် ဆန်စက်တွင် ရောက်ရှိနေချိန် အမည်မသိလက်နက်ကိုင်တပ်ဖွဲ့က သေနတ်(၄)ချက်ဖောက်ကာ ပစ်ခတ်သွားကြောင်း၊ ထို့ပြင် ဦးထွဋ်မောင်၏ အလောင်းကိုပါ သယ်ယူသွားကြောင်း ဒေသခံ တစ်ဦးက သျှမ်းသံတော်ဆင့်ကို ပြောသည်။
“ သေနတ်ပစ်သံကြားတော့ ဘယ်သူမှ ထွက်မကြည့်ရဲဘူး။ ဘယ်သူလာပစ်သွားလဲဆိုတာကို မသိလိုက်ရဘူး။ သေနတ်သံ က (၄)ချက်ပါ။ ဦးထွဋ်မောင် အလောင်းကိုလည်း ယူသွားတယ်။ အခုထိမရသေးဘူး” ဟု ဒေသခံ တစ်ဦး ကဆိုသည်။
ဦးထွဋ်မောင်၏ အလောင်းကို လက်ရှိအချိန်ထိ မိသားစုဝင်များပြန် မရရှိသေးကြောင်း၊ ဆေးရုံ နှင့် ရဲစခန်းများကို မိသားစုဝင်များက လိုက်ကြည့်သော်လည်း မတွေ့ရှိကြောင်း သိရသည်။
အဆိုပါ ဦးထွဋ်မောင် ပစ်သတ်ခံရသည့် မောက်စံကျေးရွာသည် ပအိုဝ်း အမျိုးသားတပ်မတော်(PNA) နှင့် ပအိုဝ်း အမျိုးသား အဖွဲ့ချုပ် (PNO) တို့ မကြာခဏ မြေနေရာလုသည့် ပဋိပက္ခ ဖြစ်ပွားလေ့ရှိသည့် ဒေသဖြစ်ကြောင်း သိရသည်။
Leave a Comments