RCSS နှင့် SSPP တိုက်ပွဲ ဆက်လက်ဖြစ်ပွားနေဆဲ

0

သျှမ်းပြည် တောင်ပိုင်း ကျေးသီးမြို့နယ် လွယ်ဟွန်းတောင်ကြောတစ်လျောက်တွင် သျှမ်းပြည်ပြန်လည် ထူထောင်ရေးကောင်စီ (RCSS/SSA) နှင့် သျှမ်းပြည်တိုး တက်ရေးပါတီ(SSPP/SSA) တို့ တိုက်ပွဲသည် ယမန်နေ့ (ဇွန် ၁၀)ရက် ညနေပိုင်းထိ တိုက်ပွဲပြင်းထန်နေသေးကြောင်းသိရသည်။

ပြီးခဲ့သည့် ဇွန်လ ၁ ရက်နေ့မှ စတင်ကာ အပြန်အလှန်နယ်မြေလုသည် ဆိုသည့် အကြောင်းပြချက်ဖြင့် ဖြစ်ပွားနေသည့် တိုက်ပွဲသည် ယနေ့ထိ ၁၀ ရက်တိုင်တိုင် အချင်းချင်း ပစ်ခတ်နေကြပြီး အနီးနားရှိ ကျေးရွာပြည်သူလူ ၁၀၀၀ နီးပါးခန့်က ထွက်ပြေးတိမ်းရှောင် နေကြရသည်။

“ပစ်ခတ်မှုကတော့ ဇွန် ၁ ရက်နေ့ကစပြီး နေ့တိုင်းရှိနေပါတယ်၊ ညှိနှိုင်းဆွေးနွေးမှုတွေအနေနဲ့ ကျနော်တို့ အချင်းချင်းကြားမှာ နှစ်ဖက်ကိုယ်စားလှယ်တွေ လွှတ်ပြီးဆွေးနွေးတာရယ်။ CSSU ကနေ ဆွေးနွေးတာရယ် ရှိခဲ့ပါတယ်။ ဒါပေမယ့် အခုလို တိုက်ပွဲဖြစ်ပွားနေတဲ့ကာလမှာတော့ဆွေးနွေးညှိနှိုင်းမှုတော့ လုပ်မရဘူး” ဟု RCSS/SSA မှ ပြောရေးဆိုခွင့်ရှိသူ ဗိုလ်မှူးခမ်းစံက သျှမ်းသံတော်ဆင့်ကို ပြောသည်။

သျှမ်းတပ် (၂)တပ် ဆွေးနွေးညှိနှိုင်းရန် အတွက် RCSS/SSA အနေဖြင့် အမြဲအဆင်သင့်ဖြစ်ကြောင်း၊ အပစ်ခတ်ရပ်တန့်ရန် အတွက် တပ် (၂)တပ် ရပ်မှသာလျှင် ဖြစ်နိုင်ကြောင်းလည်း ဗိုလ်မှူးခမ်းစံ က ပြောသည်။

“ကျနော်တို့ နှစ်ဖက်လုံးက ဆွေးနွေးညှိနှိုင်းမှုအတွက် အမြဲအသင့်ရှိတယ်လို့ ပြောကြတယ်၊ ဒါပေမယ့် သူတို့ဖက်ကလာလာပစ်နေတော့ ကျနော်တို့ကလည်း ပြန်တိုက်ရတာ။ အပစ် အခတ်ရပ်ဖို့ဆိုတာက နှစ်ဖက်လုံးရပ်မှဖြစ်မယ်။” ဟု ဗိုလ်မှူးခမ်းစံ က ဆိုသည်။

ယခုကာလသည် စိုက်ပျိုးရေး လုပ်ဆောင်ရမည့် အချိန်ကာလဖြစ်သည့်အတွက် သျှမ်းတပ်(၂)တပ် ခေါင်းဆောင် များအနေဖြင့် တိုက်ပွဲများအမြန်ဆုံး ရပ်တန့်ပေးရန် သျှမ်းသံဃာများ၊ သျှမ်းပြည်သူများက အကြိမ်ကြိမ်တောင်းဆိုခဲ့သည်။

အဆိုပါ သျှမ်းတပ် ၂ တပ်တိုက်ပွဲဖြစ်ပွားနေသည့် ကိစ္စနှင့်ပက်သက်ပြီး “ပြောရရင် ဒီကစ္စ ပြဿနာတွေက ကျနော်တို့ဘက်က စလို့ဖြစ်တာ မဟုတ်ပါဘူး၊ ကျနော် တို့အချင်းချင်း ၁၀ နှစ်ကျော်ကာလ ညှိနှိုင်းဖြေ ရှင်းနေခဲ့ကြတာပြည်သူတွေအတွက်ပါ၊ စားပွဲပေါ်မှာ ဖြေရှင်းလို့မရတော့မှ လက်နက်ကိုင်ဖြေရှင်းရတာ” ဟု SSPP/SSA ၏ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်က သျှမ်းသံတော်ဆင့်ကို ပြောသည်။

ကျေးသီးမြို့နယ် လွယ်ဟွန်းတောင် ကြောတွင် RCSS နှင့် SSPP တို့သည် ၁၀ ရက်ကျော်ကြာ အပြန်အလှန် တိုက်ပွဲဖြစ်ပွားဖြစ်ပွားမှုကြောင့် စစ်ဘေးရှောင် (၁၀၀၀ )ဝန်းကျင် ထွက်ပြေးတိမ်းရှောင်နေရပြီး စားဝတ် နေရေးနှင့် ကျန်းမာရေး စောင့်ရှောက်မှုများအတွက် အကူအညီများ လိုအပ်နေကြောင်း သိရသည်။

Leave a Comments