သျှမ်းတောင် တောင်ကြီးမြို့နယ်၊ အေးသာယာမြို့ တွင် ယနေ့ ( မေ ၂၇)ရက် မနက် ( ၈ ) နာရီခွဲ ဝန်းကျင် ၌ ပေါက်ကွဲမှု ဖြစ်ပွားပြီး အရပ်သား တစ်ဦး ထိခိုက်ဒဏ်ရာရရှိကြောင်း သတင်းရရှိသည်။
ယနေ့ ( မေ ၂၇)ရက် မနက်ပိုင်းတွင် အေးသာယာမြို့ ရှိ သာသနာ့ဗိမာန် ( မြို့လယ် ဓမ္မာရုံ) အနီးတွင် ဖြစ်ပွားခဲ့ပြီး၊ စိတ်ကျန်းမာရေးမကောင်းသည့်အမျိုးသားတစ်ဦး ဗုံးစ ထိမှန်သွားကြောင်း အေးသာယာ ဒေသခံတစ်ဦး က သျှမ်းသံတော်ဆင့် ကို ပြောသည်။
” မြို့လယ် ဓမ္မာရုံထောင့် က ကွမ်းယာဆိုင်နားမှာ ပေါက်ကွဲမှုက ဖြစ်တာဗျ၊ အဲ့အနားမှာ ရှိနေတဲ့ စိတ်ကျန်းမာရေး မကောင်းတဲ့ တစ်ယောက်ကို ဗုံးစ၊ ခဲစ တွေထိပြီး လေးချက်ချုပ် လိုက်ရတယ်။အခုချိန်ထိအဲ့ ဓမ္မာရုံနား ရဲတွေ စစ်သားတွေ ရှိနေတယ်” လို့ ၎င်း ဒေသခံတစ်ဦးကပြောပါသည်။
ပေါက်ကွဲမှုကြောင့် အေးသာယာမြို့၊ သာသနာ့ဗိမာန် (မြို့လယ် ဓမ္မာရုံ) ရှေ့တွင် စစ်ကောင်စီ၏ ရဲနှင့် စစ်သားများက
စောင့်ကြပ်နေကြကြောင်းသိရသည်။
အေးသာယာဓမ္မာရုံရှေ့လိုင်းကားစောင့်သည့် နေရာ ဓာတ်တိုင်နားတွင် ဗုံးထည့်ထားသည် ဟု ယူဆရသော အိတ်အမဲ တစ်လုံး ထပ် တွေ့ကြောင်း သိရသည်။
