သျှမ်းပြည်မြောက်ပိုင်းကျောက်မဲမြို့တွင် One Love ဟိုတယ် ၌ ဗုံးပေါက်ကွဲ မှုဖြစ်ပြီးနောက်ပိုင်း ပြည်သူများ သတိဖြင့် သွားလာနေရကြောင်း စုံစမ်းသိရသည်။
ပြီးခဲ့သည့် မေ ၂၆ ရက် ညပိုင်းတွင် ကျောက်မဲမြို့ရှိ One Love ဟိုတယ်၌ ဗုံးပေါက်ကွဲမှု ဖြစ်ပြီးနောက်ပိုင်း မြို့နယ်အုပ်ချုပ်ရေးမှူးများက မာရှယ်လော(ညမထွက်ရ) အမိန့်ကိုပြန်လည် သတိပေးနေလာ၊ ဒေသခံများလည်း သတိဖြင့် အပြင်သွားလာနေရကြောင်း ကျောက်မဲမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“မာရှယ်လောက အရင်ကတည်းက မပယ်ဖျက်ရသေးဘူး ။ အရင်ကတော့ ညတွေထွက်ကြတာရှိတယ်။ ဒီနောက်ပိုင်း ဟိုတယ် ဗုံးပေါက်ကွဲပြီးတဲ့ နောက်ပိုင်းမှ မထွက်ကြတော့တာ ခုလည်း ပြန်သတိပေးတဲ့ သဘောပေါ့” ကျောက်မဲဒေသခံ အမျိုးသားတစ်ဦးက ဆိုသည်။
One Love ဟိုတယ် ဗုံးပေါက်ကွဲမှု မဖြစ်ပွားခင်တွင် ကျောက်မဲမြို့ ဒေသခံများသည် မာရှယ်လော (ညမထွက်ရ) အမိန့် ရှိနေသော်လည်း ည ၁၀နာရီထိ သွားလာလှုပ်ရှားနေသေးကြောင်း၊ ထိုဟိုတယ်ပေါက်ကွဲမှု ဖြစ်ပွားပြီးနောက်ပိုင်းတွင် ည ၆နာရီဝန်းကျင်၌ ကျောက်မဲမြို့ပေါ် သွားလာမှု မရှိတော့ကြောင်း ကျောက်မဲမြို့ အသက် ၄၀အရွယ်ရှိ အမျိုးသားတစ်ဦးက ပြောသည်။
“ ဒီနိုင်ငံရေးအခြေနေနဲ့ အရင်ကတည်းက သတိထားသွားလာကြတယ်။ ခု သူတို့ ဒီလို(ညမထွက်ရ) ပြန်ပြောလာတော့လည်း ပိုသတိထားကြတာပေါ့ ဒါမဲ့ ကျန်းမာရေးကြောင့် ည ဆေးရုံ ၊ ဆေးခန်းတွေ သွားမယ်ဆို စစ်ဆေးတဲ့ နေရာတွေရောက်ရင် ထောက်ခံစာပေးပြီး သွားလို့ ရတယ်”ဟု ၎င်းအမျိုးသားက ဆိုသည်။
ထို One love ဟိုတယ်ပေါက်ကွဲရာတွင် ဟိုတယ်ဝန်ထမ်းတစ်ဦး ဒဏ်ရာရပြီး အနီးနားရှိ ကားမှန်များ ပျက်စီးခဲ့ကြောင်း သိရသည်။
ကျောက်မဲမြို့တွင် ညမထွက်ရအမိန့် ကို ပြီးခဲ့သည့် ၂၀၂၃ ခုနှစ် ဩဂုတ် ၆ရက် ကျောက်မဲမြို့ ရပ်ကွက်(၁)တွင် ဗုံးပေါက်ကွဲမှု ဖြစ်ပွားပြီး နောက်ပိုင်း ထုတ်ခဲ့သည်။
ကျောက်မဲမြို့နယ်တွင် စစ်ကောင်စီ တပ်ရင်းများအပြင် ၊ တအာင်းအမျိုးသားလွတ်မြောက်ရေးတပ်မတော့ (TNLA) ၊ ရှမ်းပြည်တိုးတက်ရေးပါတီ (SSPP/SSA) ၊ ကျောက်မဲပြည်သူကာကွယ်ရေးတပ်ဖွဲ့ တို့လည်း အခြေစိုက်ကြောင်းသိရသည်။
အလုပ်သင် သတင်းထောက် နန်းလောဝ်ငင်း ရေးသားသည်။
Leave a Comments