သျှမ်းပြည် လားရှိုးခရိုင်၊ လားရှိုးမြို့နယ်အတွင်း ဗုံးပေါက်ကွဲမှု မကြာခဏ ဖြစ်ပွားသောကြောင့် ဈေးဆိုင်၊ စတိုင်းဆိုင်များရှိ ဆိုင်းဘုတ်အချို့ ဖြုတ်သိမ်းထားရကြောင်း စုံစမ်းသိရသည်။

ပြီးခဲ့သည့် စက်တင်ဘာ ၂၇ ရက် ညနေပိုင်းတွင် ဖြစ်ပွားခဲ့သည့် လားရှိုးမြို့ရှိ DENKO ပန့်ဆီဆိုင် ဗုံးပေါက်ကွဲ မီးလောင်မှုကြောင့် လားရှိုးမြို့တွင်းရှိ စတိုင်းဆိုင်၊ ကုန်စုံဆိုင် နှင့် ဆေးဆိုင်အချို့ရှိ ဆိုင်းဘုတ်များကို ဖြုတ်ထားကြောင်း လားရှိုးမြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ပေါက်ကွဲမှုကို လုပ်တဲ့ အဖွဲ့အစည်းက စီးပွားရေး လုပ်ငန်းရှင်တွေ၊ ရောင်းဝယ်ရေး လုပ်တဲ့ သူတွေကို ဦးတည်လုပ်နေတာတွေ့တော့ တချို့ကလည်း ကြောက်တာပေ့ါ၊ အဲ့ကြောင့် ဆိုင် ဆိုင်းဘုတ်ကို ဖြုတ်ချထားလိုက်တယ်၊ ဆိုင်ကို အလွယ်တကူ ရှာလို့မရအောင်၊ ရန်ရှာမှု မခံရအောင် ကာကွယ်တဲ့ အနေနဲ့ပေါ့” ဟု လားရှိုးမြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

DENKO ပန့်ဆီဆိုင်မှ ဗုံးပေါက်ကွဲမှုတွင် အမျိုးသား (၂) ဦး သေဆုံးရပြီး ကျား (၈) ဦး၊ မ (၄) ဦး စုစုပေါင်း (၁၂) ဦး ဒဏ်ရာပြင်းထန်စွာရရှိပြီး လားရှိုးမြို့ ပြည်သူ့ဆေးရုံတွင် ဆေးကုသမှု ခံယူနေရကြောင်း စုံစမ်းသိရသည်။

ထို့အပြင် ပန့်ဆီဆိုင်မှ ဗုံးပေါက်ကွဲမှု အပြီး၌ စစ်ကောင်စီ တပ်ဖွဲ့ဝင်များ၊ ရဲတပ်ဖွဲ့ဝင်များမှ မြို့ဝင် မြို့ထွက် နှင့် မြို့တွင်း လမ်းကြိုလမ်းကြားများ၌ စစ်ဆေးမှုများ တင်းကြပ်စွာ ပြုလုပ်လာကြောင်းလည်း သိရသည်။

“ပေါက်ကွဲမှု တစ်ခေါက်ဖြစ်ပြီးတိုင်း လုံခြုံရေး အင်အားတိုးပြီး စစ်ဆေးမှု တင်းကြပ်တာတော့ ပုံမှန်လို ဖြစ်နေပါပြီ၊ အဲ့လိုကျရင် ပြည်သူရဲ့ သွားရေး လာရေးကိုပဲ ထိခိုက်မှာ၊ လုပ်တဲ့သူက ပြေးနေပြီလေ။ တကယ်လိုအပ်တဲ့ ခိုးယူလုယက်သူတွေရဲ့ ရန်ကိုကျ ပြည်သူတွေကို အကာအကွယ်မပေးကြဘူး” ဟု အသက် (၄၀) ဝန်းကျင် အမည်မဖော်လိုသူ ဒေသခံ အမျိုးသား ကပြောသည်။

ထို့အပြင် စစ်အာဏာသိမ်းပြီးနောက်ပိုင်း လားရှိုးမြို့တွင်း၌ ပေါက်ကွဲမှု၊ ပစ်ခတ်မှု မကြာခဏ ဖြစ်ပွားလေ့ရှိပြီး အရပ်သားများ ထိခိုက်သေဆုံးရသည်အထိ ဖြစ်ပွားခဲ့သည်။

ပြီးခဲ့သည့် ဇူလိုင် ၁၇ ရက်တွင် လားရှိုးမြို့မဈေးထဲရှိ ဇွဲထက်ရွှေဆိုင် ဗုံးပေါက်ကွဲမှု ဖြစ်ပွားခဲ့ပြီး ၁ ဦးသေ၊ ၁၂ ဦး ဒဏ်ရာရ၊ အလားတူ စက်တင်ဘာလ ၁၉ ရက်၌ လားရှိုးမြို့ အမှတ် (၂) ရပ်ကွက်ရှိ CS Hotel ၌ ဗုံးပေါက်ကွဲရာ ၁ ဦးသေ၊ ၄ ဦး ဒဏ်ရာရခဲ့ပြီး စက်တင်ဘာ ၂၇ ရက်နေ့ DENKO ပန့်ဆီဆိုင်၌ ၂ ဦးသေ ၁၂ ဦး ဒဏ်ရာရ စသဖြင့် ပေါက်ကွဲမှုများ ဖြစ်ပွားခဲ့သည်။

“ပေါက်ကွဲမှု ဖြစ်သွားတဲ့ နေရာက CCTV မှတ်တမ်းတွေကို ပြန်ကြည့်လိုက်ရင် ပေါက်ကွဲမှု ပုံစံက အမျိုးသား တစ်ဦးက ဆိုင်ကယ်စီးပြီး လာထိုးရပ်တယ်၊ အဲ့ကနေ ပေါက်ကွဲမှု စဖြစ်တယ်၊ အဲ့လို ပုံစံတွေ အတူတူပဲ။ ဒါပေမဲ့ ဘယ်အဖွဲ့အစည်းက လုပ်တယ်ဆိုတာတော့ မသိဘူး။ တစ်ဖွဲ့နဲ့ တစ်ဖွဲ့ အပုပ်ချချင်လို့ နာမည်တွေကို အလွဲသုံးစားလုပ်တာလည်း ဖြစ်နိုင်လို့လေ” ဟု လားရှိုးမြို့မှ တက်ကြွ လှုပ်ရှားသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် စက်တင်ဘာ (၂၂ ) ရက်တွင်လည်း လားရှိုး ယာဉ်ထိန်းရဲတစ်ဉီး ပစ်သတ်ခံခဲ့ရသည်။

လားရှိုးမြို့သည် စစ်ကောင်စီတပ်ဖွဲ့ရှိသော်လည်း လက်နက်ကိုင် တပ်ဖွဲ့များ မြို့ပေါ်အထိ ဆက်ကြေး ကောက်ယူမှုများ၊ ဗုံးခွဲတိုက်ခိုက်မှုများ နှင့် စစ်ကောင်စီ လက်အောက်ခံ စခန်းများ ပစ်ခတ် တိုက်ခိုက်မှုများ မကြာခဏ ဖြစ်ပွားလေ့ရှိသည်။