သျှမ်းပြည် လားရှိုးမြို့တွင် ၁၀ ရက် အတွင်း ဗုံးပေါက်ကွဲမှု ၃ ကြိမ်ဖြစ်ပွားခဲ့ပြီး ထိခိုက်ဒဏ်ရာရရှိသူများရှိ နေကြောင်း သတင်းရရှိသည်။
သျှမ်းပြည် လားရှိုးမြို့တွင် ညဈေး၊စန်းရွှင်ဟိုတယ်အနီး ယမန်နေ့ (ဖေဖော်ဝါရီလ ၇ ရက်) ညနေ ၄ နာရီခွဲဝန်းကျင်တွင် ဗုံးပေါက်ကွဲမှု ဖြစ်ပွားခဲ့ပြီး ၈ ဦးထိခိုက်ခဲ့ပြီး ထိုအထဲတွင် အမျိုးသားတစ်ဦး အပြင်းအထန် ဒဏ်ရာရရှိခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“ပြောရရင်တော့ ထောင်တဲ့ဗုံးတွေပေါ့။ ထိခိုက်သွားတာက မိန်းကလေး ၄ ယောက် ယောက်ျားလေ ၄ ယောက်ပေါ့။ ဟိုတယ်ဝန်ထမ်းက မိုင်းချသွားတယ်ဘာညာ လာအော်ပြောလိုက်တော့ အဲ့နားက လူတွအကုန် ထွက်ပြေးတာ။ ယောကျ်ားလေး ၁ယောက်ကတော့ လက်ကျိုးတာ။ ကျန်တာတွေ ကတော့ ဗုံးစမှန်တာ။ သေဆုံးတာမျိုးတော့မရှိပါဘူး။”ဟု လားရှိုးမြို့ဒေသခံ အမျိုးသားတစ်ဦးက ပြောသည်။
ထိုအပြင် လားရှိုးမြို့တွင် ၁၀ ရက်အတွင်း ဗုံးပေါက်ကွဲမှု ၃ ကြိမ်ဖြစ်ပွာခဲ့ပြီး ဇန်နဝါရီလ ၃၀ ရက်တွင် လားရှိုးမြို့ ရပ်ကွက် ၃ ၊ သီရိလမ်းပေါ်ရှိ DR ကုန်မာဆိုင်ရှေ့၌လည်း ဗုံးနှစ်လုံး ပေါက်ကွဲမှုကြောင့် လမ်းသွားလမ်းလာ ကလေးငယ်အပါအဝင် ပြည်သူ ၃ ဦး ထိခိုက်ဒဏ်ရာရရှိခဲ့ပြီး၊ ဖေဖော်ဝါရိလ ၁ ရက်တွင်လည်း ရပ်ကွက် ၈ နမ့်ခုံးဆေးတိုက်အနီးတွင် တစ်ကြိမ်ဖြစ်ပွားခဲ့ကြောင်း သိရသည်။
ထို့အပြင် လားရှိုးမြို့တွင် လုံခြုံရေးအားနည်းခြင်းကြောင့် မကြာခဏ ဗုံးပေါက်ကွဲမှု ဖြစ်ပွားနေလျက်ရှိပြီး ပေါက်ကွဲမှုဖြစ်စဉ် အများစုတွင် ဆိုင်ကယ်အတွင်း ထည့်ထားသော ဗုံးများကြောင့်ဖြစ်ပွားခဲ့သည်။
လားရှိုးမြို့နယ်တွင် စစ်ကောင်စီတပ်ဖွဲ့အပြင် ပြည်သူ့စစ်အဖွဲ့၊ တိုင်းရင်းသားလက်နက်ကိုင်များ ဖြစ်ကြသည့် SSPP/SSA၊ TNLA ၊ MNDAAစသည့်ဖြင့် လက်နက်ကိုင်တပ်ဖွဲ့များ လှုပ်ရှားနေသည်။
သို့သော် လားရှိုးမြို့ပေါ်တွင် မကြာခဏ ဖြစ်ပွားနေသည့် ဗုံးပေါက်ကွဲမှု၊ ခိုးဆိုးလုယက်မှု၊ ဓားပြတိုက်မှုနှင့် ဆက်စပ်သူ တရားခံများကို သက်ဆိုင်ရာ လက်နက်ကိုင်အဖွဲ့အစည်းမှ ဖမ်းဆီးဆောင်ရွက်ပေးခြင်း မရှိကြောင်း၊ အဆိုပါ တရားခံများနှင့် လက်နက်ကိုင်အဖွဲ့အစည်းများက ဆက်စပ်နေသည်ဟု သံသယရှိကြောင်း ဒေသခံများက ပြောဆိုနေလျက်ရှိသည်။
Leave a Comments