သျှမ်းပြည် လားရှိုးမြို့တွင် မကြာခဏ ဗုံးပေါက်ကွဲမှုကြောင့် ထိခိုက်သေဆုံးမှုများလာရာ လုံခြုံရေးအတွက် စိုးရိမ်နေကြောင်း ဒေသခံများက ပြောဆိုလိုက်သည်။

ယမန်နေ့ (အောက်တိုဘာလ ၁၆) ရက် ည ၈ နာရီဝန်းကျင်တွင် လားရှိုးမြို့ ပန်းခြံအနီးရှိ (ကားရေဆေးဆိုင်) တစ်ခုနှင့် မျက်နှာချင်းဆိုင် လမ်း၌ ဗုံးပေါက်ကွဲမှု ထပ်မံဖြစ်ပွားခဲ့ပြီး လူထိခိုက်ဒဏ်ရာရရှိမှု မရှိကြောင်း ဒေသခံ အမျိုးသားတစ်ဦးက ပြောသည်။

အလားတူ ပြီးခဲ့သည့် အောက်တိုဘာလ (၁၃) ရက်တွင်လည်း လားရှိုးမြို့ ရပ်ကွက် (၈) အတွင်း ဖွင့်လှစ်ထားသည့် Fine ပရိဘောဂ ဆိုင်တစ်ဆိုင် ဗုံးခွဲတိုက်ခိုက်ခံရပြီး၊ ယမန်နေ့ (အောက်တိုဘာ ၁၆) ရက်တွင်လည်း အဆိုပါ Fine ပရိဘောဂဆိုင်သည် သေနတ်ဖြင့် ထပ်မံ ပစ်ခတ်ခံရသေးကြောင်း ၎င်းက ဆက်ပြောသည်။

စစ်တပ်က အာဏာသိမ်းပြီးနောက်ပိုင်း လားရှိုးမြို့ရှိ ဟိုတယ်၊ ဆိုင်ခန်း နှင့် ဓာတ်ဆီဆိုင်တွင် ဗုံးပေါက်ကွဲမှုကြောင့် ၂၀၂၃ ခုနှစ်အတွင်း လူ ၈ ဦး သေဆုံးပြီး ၄၁ ဦးဝန်းကျင် ထိခိုက်ဒဏ်ရာ ရရှိခဲ့ကြောင်း သျှမ်းသံတော်ဆင့်မှ နေ့စဉ် ရေးသားတင်ဆက်ထားသည့် သတင်းမှတ်တမ်းအရ သိရသည်။

“ဗုံးပေါက်ကွဲတာက ဆက်ကြေးဆောင်ခိုင်းတာနဲ့ ပတ်သက်မယ်ထင်တယ်။ အခုနောက်ပိုင်း လက်နက်ကိုင်တပ်ဖွဲ့ တွေလည်း အခွန်တောင်းတာကြမ်းတယ်။ တပိုင်တနိုင် ဆိုင်သေးတွေအစ မြို့ထဲက နာမည်ကြီးနေတဲ့ ဆိုင်တွေ လိုက်တောင်းတယ်။ တောင်းတဲ့အဖွဲ့တွေကလည်း များတယ်။ ဒီအဖွဲ့ကို ထည့်ပေးပြီး ကျန်တဲ့အဖွဲ့ကို ထည့်မပေးလို့ ဖြစ်မယ်။ အဲ့ကြောင့် ဗုံးနဲ့လာပစ်တာပေါ့ “ ဟု လားရှိုးမြို့ဒေသခံ အသက် ၃၀ ကျော် အမျိုးသား တစ်ဦးက ပြောသည်။

သျှမ်းပြည် လားရှိုးမြို့နယ်တွင် တိုင်းရင်းသားလက်နက်ကိုင်တပ်ဖွဲ့ဖြစ်ကြသည့် ရှမ်းပြည် တိုးတက်ရေးပါတီ၊ ရှမ်းပြည်တပ်မတော် (SSPP/SSA)၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA)၊ ကချင်လွတ်မြောက်ရေးတပ်မတော် (KIA) တို့ နှစ်စဥ်နှစ်တိုင်း ဆက်ကြေး ကောက်ယူမှုရှိသည်။

ထို့အပြင် ပြည်သူ့စစ်တပ်ဖွဲ့များလည်း လှုပ်ရှားနေလျက်ရှိပြီး ပြည်သူ့ကာကွယ်ရေး PDF တပ်ဖွဲ့အချို့လည်း လှုပ်ရှားနေကြောင်း ဒေသခံတစ်ဦးက ပြောသည်။

လက်ရှိအချိန်ထိ လားရှိုးမြို့အတွင်း မကြာခဏ ဗုံးပေါက်ကွဲခံရမှု နှင့် ပတ်သက်ပြီး တရားခံသည် မည်သည့်အဖွဲ့ဖြစ်သည်ကို မသိရှိရသေးပေ။

“လားရှိုးမြို့မှာတော့ ခဏခဏဗုံးပေါက်တာ တရားခံကို မဖမ်းမိဘူး။ ရဲတွေလည်း တရားခံကို မဖမ်းနိုင်တဲ့အပြင် လုံခြုံရေးလည်း မပေးနိုင်ဘူး။ လက်နက်ကိုင်တပ်ဖွဲ့တွေလည်း ပေါမှပေါ ဘယ်တပ်ဖွဲ့မှ လုံခြုံရေး မပေးနိုင်ဘူး။ ရဲတွေလည်း ဗုံးပေါက်ပြီးမှ လမ်းတွေပိတ်၊ စစ်ဆေးမေးမြန်းဖို့ဘဲ သိတယ်။ ပြီးရင် ဆိုင်ကယ်တွေ လိုက်ဖမ်းတယ်၊ ဘာမှမလုပ်ပေးနိုင်ဘူး “ ဟု လားရှိုးမြို့ဒေသခံ တက်ကြွလှုပ်ရှားသူတစ်ဦးက ပြောသည်။

လားရှိုးမြို့တွင်း လစဉ်ဆက်တိုက် ဗုံးပေါက်ကွဲမှု ဖြစ်လာသဖြင့် ဆိုင်ခန်းဖွင့်လှစ်ထားသူများသည် ဖုန်းဆက် လိမ်လည်မှု ခံရမည်ကို စိုးရိမ်ခြင်းနှင့် ဆက်ကြေးများလာရောက်ကောက်မည်ကို ကြောက်သဖြင့် ဆိုင်ခန်း ဆိုင်းဘုတ် ဖြုတ်ထားရကြောင်း သိရသည်။