သျှမ်းပြည်မြောက်ပိုင်း သီပေါမြို့နယ် နမ့်လန် ဝမ်စိမ်းအုပ်စုအနီး တိုင်းရင်းသားလက်နက်ကိုင် အချင်းချင်း တိုက်ပွဲများ ဖြစ်ပွားကာ စစ်ရှောင် (၁၀၀၀) ကျော် ထွက်ပြေးတိမ်းရှောင်ခဲ့ရကြောင်း စုံစမ်းသိရှိရသည်။
လက်နက်ကိုင် တိုက်ပွဲကြောင့် ယနေ့ မေ (၁၉) ရက် မနက်မှ ယခုချိန်ထိ ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်တို့ တိုက်ပွဲဖြစ်ပွားကာ လက်နက်ကြီး လက်နက်ငယ်ဖြင့် ပစ်ခတ်သဖြင့် ဝမ်စိမ်းအုပ်စုရှိ ကျေးရွာများ ဝမ်စိမ်းဘုန်းကြီးကျောင်းသို့ ထွက်ပြေး တိမ်းရှောင်နေရကြောင်း၊ သတင်းရရှိသည်။
“ခုထိ အသံကျယ်နေတုန်းပဲ။ အသံကြားနေရတာ တမနက်လုံးပဲ ရင်ထိတ်စရာကြီး၊ ကြာလေ အသံပိုကျယ်လာလေ။ ရေဖြူကျေးရွာဘက်က အရင်နေ့လည်း နည်းနည်းဖြစ်တယ်” ဟု နမ့်လန် ဒေသခံ တစ်ဦးက သျှမ်းသံတော်ဆင့် ကိုပြောသည်။
လက်ရှိအချိန်သည် စိုက်ပျိုးရာသီဖြစ်ပြီး၊ တိုက်ပွဲပြင်းထန်နေပါက လယ်ယာစိုက်ပျိုးမှု မလုပ်နိုင်လျှင် နောင်နှစ်အတွက် စားဝတ်နေရေး ခက်ခဲနိုင်ကြောင်း နမ့်လန်ဒေသခံများက ပြောဆိုကြသည်။
“တောင်ယာသွားလုပ်မယ့်သူလည်း မသွားရဲကြတော့ဘူး။ ခုချိန်က လူတွေ အလုပ်စဆင်းရမယ့်အချိန် သီးနှံတွေ ပျိုးဖို့ ပြင်ရမယ့် အချိန်ပဲ။ ပြီးရင် အခွန်ဆောင်ပေးရမှာလည်း ပြည်သူတွေ မပေးလည်း မရ အလုပ်မလုပ်ရရင် ဘယ်မှာ ယူပြီးပေးရမလဲ”ဟု နမ့်လန်ဒေသခံ တစ်ဦး က သျှမ်းသံတော်ဆင့် ကိုပြောသည်။
ယနေ့ တိုက်ပွဲဖြစ်ပွားမှုကြောင့် စစ်ရှောင်နေရသည့် ကျေးရွာများမှာ ဝမ်စိမ်းအုပ်စု မှ ကောင်းခမ်ကျေးရွာ၊ ပန်ဆိမ်ကျေးရွာ၊ ကုန်းညုရွာ၊ ဝမ်တပ်ကျေးရွာ၊ စံကားကျေးရွာ၊ ဟိုနမ့်ကျေးရွာ နှင့် ကုံးမုံကျေးရွာတို့ဖြစ်ပြီး၊ ထိုဒေသခံများသည် ဝမ်စိမ်းဘုန်းကြီးကျောင်းသို့ ထွက်ပြေးတိမ်းရှောင်ခဲ့ကြောင်း သတင်းရရှိသည်။
“ဒီမနက် (၅) နာရီလောက်ကတည်းက ကျမတို့ အသံစကြားနေရပြီ။ တိုက်ပွဲက ဒီလို ရေရှည်ဖြစ်လာမယ်ဆိုရင် ပြည်သူတွေ တအားဒုက္ခရောက်နေကြပြီ။ ပြည်သူလူထုကိုလည်း သနားပါအုံး စစ်ဘေးပဲ ရှောင်နေရတယ်” ဟု သီပေါ စစ်ရှောင်များကို ကူညီပေးနေသည့် နန်းမွမ်းမွမ်းပေါင်း က သျှမ်းသံတော်ဆင့် ကို ပြောသည်။
သျှမ်းပြည်အတွင်း တိုက်ပွဲများ အမြန်ရပ်တန့်ပေးရန်နှင့် တိုက်ပွဲဖြစ်ပွားနေသည့် လက်နက်ကိုင်များအနေဖြင့် သျှမ်းပြည်သားများကို သနားပေးရန် လည်း နန်းမွမ်းမွမ်းပေါင်း က တောင်းဆိုလိုက်သည်။
“ဒီနေ့ မြောက်ပိုင်းမဟာမိတ်နဲ့ တိုက်ပွဲတွေ ဖြစ်နေတာ ဟုတ်ပါတယ်။ စစ်ရှောင် ထွက်ပြေးလာတာကိုလည်း ကြားသိရပါတယ်။ အသေးစိတ် အချက်လက်ကိုတော့ မသိရှိရသေးပါဘူး။” ဟု RCSS/SSA ၏ပြောရေးဆိုခွင့် ရှိသူ ဒုဗိုလ်မှူးကြီး ခမ်းစံ က သျှမ်းသံတော်ဆင့် ကိုပြောသည်။
ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်တို့ တိုက်ပွဲကြောင့် နမ္မတူမြိုု့နယ်၊ သီပေါမြို့နယ်တွင် စစ်ဘေးရှောင်များ (၂)လကျော်ကြားရှိနေသော်လည်း နေရပ်သို့ မပြန်နိုင်သေးပေ။
Leave a Comments