သျှမ်းပြည်မြောက်ပိုင်း နမ့်ခမ်းမြို့ရှိ ဈေးဆိုင်များ ထံ တိုင်းရင်းသား လက်နက်ကိုင်တပ်ဖွဲ့များက ဆက်ကြေးလိုက်လံ ကောက်ခံနေကြောင်း သတင်းရရှိသည်။
နမ့်ခမ်းမြို့ရှိ စားသောက်ဆိုင်များ၊ ကုန်စုံဆိုင်များ အအေးဆိုင်များ၊ စာရေးကိရိယာဆိုင်များ စသည့် ဆိုင်ဖွင့်ထားသည့် ဈေးသည်များထံ တိုင်းရင်းသားလက်နက်ကိုင်များက စာပို့ပြီး ဆက်ကြေးကောက်နေကြောင်း နမ့်ခမ်းဒေသခံများက ပြောဆိုကြသည်။
“မနေ့ညက ဖုန်းဆက်လာပြီး စားသောက်ဆိုင် တစ်ဆိုင်ကို (၄) သိန်းတောင်းတယ်။ ဆိုင်ရှင်တွေဘက်ကလည်း ခု ငွေ ရှာရတာ တအားခက်လို့ဆိုပြီး ပြန်တောင်းပန်တော့ (၂) သိန်းပေးရတယ်” ဟု နမ့်ခမ်းဒေသခံ အမျိုးသား တဦး က သျှမ်းသံတော်ဆင့်ကို ပြောသည်။
လက်ရှိ ကာလသည် ကိုဗစ်-၁၉ ကူးစက်မြန်ရောဂါ၊ နိုင်ငံရေး အခြေအနေကြောင့် ဈေးအရောင်းအဝယ် ခက်ခဲနေပြီး၊ ရှာဖွေစားသောက်ရန် အလွန်ခက်ခဲနေကြောင်း လည်း နမ့်ခမ်း ဒေသခံ အမျိုးသား တဦးက ပြောသည်။
“ သူတို့ တောင်တာ မပေးရင် ဆိုင်ပိတ်ရမယ်။ ဆိုင်မပိတ်ချင်တော့ လုံခြုံရေးအရ ရှိတယ်လေ။ တခုခု လာလုပ်ရင် ဘယ်လိုလုပ်မလဲ” ဟု ဈေးဆိုင်ဖွင့်ထားသည့် အမည်မဖော်လိုသူ တဦး က ပြောသည်။
သျှမ်းမြောက် နမ့်ခမ်းမြို့နယ် တွင် တိုင်းရင်းသားလက်နက်ကိုင် တပ်ဖွဲ့ အားလုံးနီးပါးက ဆက်ကြေး လှည့်ကောက်နေကြာင်း၊ တဖွဲ့တည်းမဟုတ်ကြောင်းလည်း အထက်ပါ ဆိုင်ရှင်က ပြောသည်။
“ တဖွဲ့တည်းမဟုတ်ဘူး။ ကချင်တပ်၊ ပလောင်(တအာင်း)တပ် ရှမ်းတပ်တွေရော ပါတယ်။ သူတို့တွေက လှည့်ကောက်နေတာ။ ပြည်သူတွေက ဒီကာလမှာ ပေးရတာခက်တယ်။ စီးပွားရေးမှ မဖြစ်တာ။ စီးပွားရေးဖြစ်ရင်တမျိုးပေါ” ဟု ဆိုင်ရှင် ကဆိုသည်။
ထိုနည်းတူ မူဆယ်-လားရှိုး ကားလမ်းမကြီးပေါ်တွင်လည်း ကားသမားများထံ တိုင်းရင်းသားလက်နက်ကိုင်တပ်ဖွဲ့များက မကြာခဏ ဆက်ကြေးကောက်နေကြောင်း သိရသည်။
“ ကျနော်တို့ ကားသမားတွေ မကြာခဏ ဆက်ကြေးပေးရတယ်။ အဖွဲ့အစုံပေးနေရတယ်။ တခါတလေ ကားခတောင်မကျန်ဘူး။ တဖွဲ့ပေးပြီးလည်း နောက်တဖွဲ့ ပေးရတာပါပဲ” ဟု မူဆယ်ဒေသခံ ကားသမားတဦးက သျှမ်းသံတော်ဆင့်ကို ပြောသည်။
ကားအမျိုးအစားပေါ်မူတည်ပြီး ဆက်ကြေးပေးရကြောင်း၊ ကားပေါ် ပစ္စည်း (၃)မျိုးတင်ပါက ကျပ်ငွေ တသိန်းပေးဆောင်ရကြောင်းသိရသည်။
ဆိုင်ခန်းများ၊ ကားသမားများ သည် တိုင်းရင်းသားလက်နက်ကိုင်တပ်ဖွဲ့များထံ တနှစ်လျှင် တကြိမ် အခွန်ဆောင် (ဆက်ကြေး) ပေးသွင်းရမည် ဆိုသည့် မူဝါဒရှိကြောင်း၊ တကြိမ်တခါဆောင်ပြီး ပါက ပြေစာဖြတ်ပိုင်းကို သိမ်းထားပြီး ပြန်ပြနိုင်ကြောင်း သိရသည်။
သို့ပေမယ့် သျှမ်းမြောက်တွင် တိုင်းရင်းသားလက်နက်ကိုင်တပ်ဖွဲ့ ပေါင်းများစွာ တည်ရှိနေပြီး လက်နက်ကိုင်တပ်ဖွဲ့အားလုံးကို ဆက်ကြေး (အခွန်ဆောင်)နေရသဖြင့် ပြည်သူများအတွက် ဝန်ထုတ်ပိုကြီးနေကြောင်း သိရသည်။
