စစ်အာဏာသိမ်းယူမှု ရက်ပေါင်း (၁၀၀) နီးပါးရှိလာပြီး မြန်မာတဝှမ်းရှိ ဘဏ်ရှေ့တွင် မိမိဘဏ်အပ်ငွေများ ပြန်လည်ထုတ်ယူရန် မိုးမလင်းခင်ကတည်းက တန်းစီ စောင့်ဆိုင်းနေရကြောင်း သိရသည်။
မတ် ၁ရက် မှစတင်ကာ မြန်မာနိုင်ငံတော်ဗဟိုဘဏ် ATM/ POS ငွေသားထုတ်တဦးလျှင် ကျပ် ၅သိန်း၊ ဘဏ်ငွေစာရင်းမှ ငွေသားထုတ်ယူလျှင် တဦးချင်း အတွက် တပတ် အများဆုံး ကျပ်သိန်း ၂၀၊ ကုမ္ပဏီ၊ အဖွဲ့အစည်းများအတွက် တပတ်လျှင် အများဆုံး ကျပ်သိန်း ၂၀၀ သတ်မှတ်ကြေညာခဲ့သည်။
ထို့နောက် မြန်မာပြည်သူများက အလုအယက် ငွေထုတ်ယူမှုများရှိလာ ကြသည့်အတွက် တိုကင်စနစ်ဖြင့်သာ ငွေထုတ်ပေးလာကာ ပြည်သူများ အခက်အခဲပိုဖြစ်လာကာ ပွဲစားမှ တဆင့်နေကြကြောင်း သိရသည်။
“ကျမတို့ ဆိုင်မှာ Kpay နဲ့ ငွေသွားထုတ်တာ တစ်သိန်းကို (၈၀၀၀) ပေးရတယ်။ အရင်က တစ်သိန်းကို (၂၀၀၀) ပဲပေးရတယ်။ ဈေးတက်လာတယ်။ ထုတ်တဲ့သူလည်း အလုအယက်ပဲ။ ကျမတို့ သွားထုတ်နေကျ နေရင်ဆိုရင် မထုတ်ပေးတော့ဘူး။ ငွေမရှိတော့ဘူးလို့ ပြောတယ်။” ပင်လုံဒေသခံ အမျိုးသမီးတစ်ဦး က သျှမ်းသံတော်ဆင့် ကိုပြောသည်။
လက်ရှိ အရောင်းအဝယ်မှာလည်း ငွေပေးချေမှု စနစ်မှာ ငွေသားသာ လက်ခံနေပြီး၊ အွန်လိုင်း ငွေလွှဲမှုကို မသုံးတော့သည့် အတွက် ခက်ခဲမှု များစွာ ရှိနေကြောင်း လည်း ပင်လုံဒေသခံ အမျိုးသမီး က ပြောသည်။
“ငွေလွှဲပြီး ပစ္စည်း ဝယ်တာတောင် လက်မခံတော့ဘူး။ ငွေသားနဲ့ပဲ ရချင်တာတဲ့။ အခက်ခဲ တစ်အားဖြစ်လာတယ်။ Kpay နဲ့ ငွေသွားထုတ်ရင်လည်း ကော်မရှင်ခက တစ်နေ့ထက် တစ်နေ့ တက်ဖို့ပဲရှိတယ်။ ကျမတို့အတွက် အများကြီးရှုံးတယ်” အသေးစား စီးပွားရေး လုပ်ကိုင်သူ လူငယ်တစ်ဦး ကပြောသည်။
အလားတူ ယနေ့ မေ (၁၀) ရက်မှာ သျှမ်းပြည်မြောက်ပိုင်း လားရှိုးမြို့ ၊မူဆယ်မြို့ နှင့် နမ့်ခမ်းမြို့တွင်လည်း ငွေထုတ်ရန် အတွက် မနက် မိုးမလင်းခင်ကတည်းက ရာနှင့်ချီပြည်သူများ ဘဏ်ရှေ့တွင် သွားရောက် စောင့်ဆိုင်း နေကြသည်။
“ကိုယ့်ငွေကို ရဖို့အတွက် တစ်မနက်လုံး တန်းစီပြီး နေပူတဲ့ နေ့လည်း ရှိသလို မိုးရွာတဲ့နေ့လည်းရှိတယ်။ အပေါ့သွားချင်ပေမယ့် သွားရင် ကိုယ့်အလှည့်ကျော်မှာ စိုးရိမ်ရနဲ့ တမနက်လုံး လက်တစ်ထွာလောက်တောင် မရွေ့သေးဘူး။ တန်းစီပြီး စောင့်တဲ့သူက လူရာချီတယ်။” ဟု လားရှိုးဒေသခံ တစ်ဦး ကပြောသည်။
စစ်တပ်မှ အာဏာသိမ်းပြီးနောက် မြန်မာကျပ် ငွေ ကျဆင်းခြင်း၊ ရွှေဈေး အဆမတန်မြင့်တက်ခြင်း များ ကြုံတွေ့နေရပြီး ပြည်သူများလည်း ဘဏ်များကို ယုံကြည်မှုမဲ့လာကြောင်း သိရသည်။
ဖေဖော်ဝါရီ ၁ ရက်နေ့မှ စစ်အာဏာသိမ်းပြီးနောက် ဘဏ်ဝန်ထမ်းများ၊ အစိုးရဝန်ထမ်းများ အာဏာဖီဆန်ရး CDM တွင် ပါဝင်လှုပ်ရှားလာသောကြောင့် စီးပွားရေးများ၊ နိုင်ငံတော် ယနယားများ ကောင်းမွန်စွာ လှည့်ပတ်နိုင်ခြင်း မရှိတော့ကြောင်းသိရသည်။
