သျှမ်းပြည် တောင်ပိုင်း ဟိုပုံးမြို့နယ် အမျိုးသားဒီမိုကရေစီအဖွဲ့ချုပ် (NLD) ပြည်နယ်လွှတ်တော်ကိုယ်စားလှယ်လောင်း ဦးခွန်ကျော်အေး ကို ယမန်နေ့ (မေ ၃)ရက် ည ၁၀နာရီကျော် တွင် အကြမ်းဖက်စစ်ကောင်စီမှ ဖမ်းဆီးခေါ်ဆောင် သွားကြောင်း သတင်းရရှိသည်။
ဦးခွန်ကျော်အေးသည် စစ်တပ်မှ နိုင်ငံတော် အာဏာကို သိမ်းယူပြီးနောက်ပိုင်း ရှောင်ပုန်းနေထိုင်ခဲ့ရာမှ ၎င်း၏ အမျိုးသမီး နေမကောင်း သောကြောင့် အိမ်သို့ ခနပြန်လာရာတွင် ဖမ်းဆီးခံရကြောင်းသိရသည်။
“ မနေ့ည က ဖမ်းဆီးသွားတယ်။ သူအမျိုးသမီးကနေမကောင်းလို့ ဆေးရုံတက်နေရတာ။ ဆေးရုံးဆင်းပြီး ၃ ရက်ကြာ တော့ သူကခဏလာလည်တာ။ မနေ့ည ၁၀ နာရီကျော်လောက်မှ ဖမ်းဆီးခံရတာ။ သတင်းပေးတဲ့ ဒလန်တွေ သတင်းပေး လို့ပေါ့” ဟု ဟိုပုံးမြို့ မျက်မြင်ဒေသခံတဦးက သျှမ်းသံတော်ဆင့်ကို ပြောသည်။
ဦးခွန်ကျော်အေးသည် ရာဇာသတ်ကြီး ပုဒ်မ ၅၀၅ (က) နှင့် ဖမ်းဝရမ်းထုတ်ခံထားရသူ တစ်ဦးလည်း ဖြစ်သည်။
အကြမ်းဖက်စစ်ကောင်စီမှ NLD ကိုယ်စားများအားလုံးကို လိုက်လံဖမ်းဆီးနေပြီး တစ်ချို့သော ကိုယ်စားများကို ရက်စက်စွာသတ်ဖြတ်မှုများလည်းရှိသည်။
ဖေဖော်ဝါရီ ၁ ရက်နေ့ စစ်ကောင်စီမှ အာဏာလုယူပြီးနောက်ပိုင်း အမျိုးသားဒီမိုကရေစီ အဖွဲ့ချုပ် ဥက္ကဌ ဒေါ်အောင်ဆန်းစုကြည်အပါဝင် ၂၀၂၀ ရွေးကောက်ပွဲတွင် အနိုင်ရ ကိုယ်စားလှယ်များကို ဖမ်းဆီးထိန်းချုပ်နှောင်ခံရသည်။
Leave a Comments