သျှမ်းပြည်မြောက်ပိုင်း နမ္မတူမြို့နယ် မန်လီကျေးရွာအတွင်း တိုင်းရင်းသား လက်နက်ကိုင် တပ်ဖွဲ့များကြား တိုက်ပွဲပြင်းထန်မှုကြောင့် သီပေါမြို့ပေါ် ရှောင်တိမ်းလာသည့် စစ်ရှောင် (၆၀၀) ကျော် ထွက်ပြေးတိမ်းရှောင်ခဲ့ရကြောင်း သတင်းရရှိသည်။
အဆိုပါ တိုင်းရင်းသား လက်နက်ကိုင်တပ်ဖွဲ့များမှာ RCSS/SSA နှင့် မြောက်ပိုင်းမဟာမိတ်တပ်ပေါင်းစုံဖြစ်သည့် SSPP/SSA ၊ TNLA တို့ ဖြစ်သည်။
“စစ်ရှောင် (၆၀၀) ကျော် တွေရဲ့ စားနပ်ရိကာတွေအတွက်တော့ ခုလောလောဆယ် ဒီနေ့ နဲ့ မနက်ဖြန်အတွက်ပဲ စားစရာ ရှိတော့တယ်” ဟု သီပေါစစ်ရှောင်စခန်းမှာ လာရောက်ကူညီပေးသည့် အမျိုးသမီး တစ်ဦး က သျှမ်းသံတော်ဆင့် ကိုပြောသည်။
ဧပြီ (၆) ရက်တွင် နမ္မတူမြို့နယ် မန်လီကျေးရွာအတွင်း တိုက်ပွဲများဖြစ်ပွဲသောကြောင့် သီပေါမြို့ပေါ်သို့ စစ်ရှောင် (၄၀၀) ကျော် ထွက်ပြေး တိမ်းရှောင်နေရခြင်း ယနေ့ ဧပြီ (၇) ရက်တွင်လည်း စစ်ရှောင် (၂၀၀) ကျော် ထပ်မံ ထွက်ပြေးတိမ်းရှောင်ခဲ့ရကြောင်း မန်လီကျေးရွာ ဒေသခံ တစ်ဦးက ပြောသည်။
လက်ရှိကာလသည် မြို့ပေါ်တွင်လည်း စစ်အာဏာရှင် အလိုမရှိ ဆန္ဒထုတ်ဖော်နေကြပြီး၊နိုင်ငံရေးမတည်ငြိမ်မှုကြား တိုင်းရင်းသားလက်နက်ကိုင် အချင်းချင်း တိုက်ပွဲထပ်မံဖြစ်သည့်အတွက် သျှမ်းမြောက် သီပေါ၊ ကျောက်မဲ၊ နမတူ ပြည်သူများအနေဖြင့် အလွန်ခက်ခဲကြောင်းလည်း ဒေသခံပြည်သူများက ပြောသည်။
ဧပြီ (၆) ရက်နေ့လည် ၃ နာရီဝန်းကျင်တွင် တိုင်းရင်းသားလက်နက်ကိုင် တပ်ဖွဲ့များကြား တိုက်ပွဲပြင်းထန်မှုကြောင့် နေအိမ် (၃) လုံး မီးလောင်မှု ဖြစ်ပွားပြီး ယနေ့တွင်လည်း တိုက်ပွဲ ဆက်လက်တင်းမာမှုကြောင့် နေအိမ် (၂) လုံး ထပ်မံ မီးလောင်မှု ဖြစ်ပွားခဲ့သည်။
သျှမ်းပြည်မြောက်ပိုင်းတွင် မြောက်ပိုင်းမဟာမိတ် တပ်ပေါင်းစု နှင့် RCSS/SSA ကြား တိုက်ပွဲဖြစ်ပွားခဲ့သည်မှာ ၂ လသာရှိလာခဲ့ပြီဖြစ်သော်လည်း လက်ရှိအချိန်ထိ အချင်းချင်းကြားတွေ့ဆုံဆွေးနွေးမှု မရှိကြပဲ အပြန်အလှန် ငြင်းဆိုနေကြသည်။
Leave a Comments