သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) မှ ဖမ်းဆီးထိန်းသိမ်းထားသော RCSS/SSA တပ်သား ၉ ဦးကို နေရပ်သို့ ပြန်လည် လွှတ်ပေးလိုက်ပြီ ဖြစ်ကြောင်း စုံစမ်းသိရှိရသည်။

ဖမ်းဆီးထိန်းသိမ်းခံရသော RCSS/SSA ၏တပ်သား ၉ ဦးကို SSPP/SSA က မတ်လ (၂၁ )ရက်နေ့က ပြန်လွှတ်ပေး ခဲ့ကြောင်း သိရသည်။

“ ကျနော်တို့ကို ပြောနေကြသလိုမျိုး – စစ်ရှုံးတပ်သားတွေကို သတ်ပစ်တယ်ဆိုတာ မဟုတ်ဘူး။ SSPP/SSA ကနေပြီးတော့ ဒီလိုလုပ်ရပ်မျိုးကို မလုပ်ဘူးဆိုတာကို သိစေချင်လို့၊ ပြည်သူတွေ ဒါကို နားလည်စေချင်လို့ ကျနော်တို့ ရည်ရွယ်ပြီးတော့ ဒီအခမ်းအနားကို ပြုလုပ်ရတာဖြစ်ပါတယ်။

SSPP/SSA မှာ လူသတ်တဲ့ ပေါ်လစီ မရှိဘူး။” ဟု SSPP/SSA ပြောခွင့်ရ ဗိုလ်မှူးကြီး စိုင်းဆု က သျှမ်းသံတော်ဆင့်ကို ပြောသည်။

ထိုဖမ်းဆီးခံခဲ့ရသော RCSS/SSA တပ်သား ၉ ဦးသည် တိုက်ပွဲမှ ဒဏ်ရာရရှိခဲ့သဖြင့် SSPP/SSA မှ ဆေးဝါးကု သပေးပြီး ပြန်လည်လွှတ်ပေးလိုက်ခြင်းဖြစ်ကြောင်းသိရသည်။

“ကျနော်တို့ကိုဆေးကုပေးတာ။ စစရောက်တုန်းကတော့ကြောက်တာပေါ့ ။ ကျနော်တို့ကို တစ်ခုခုလုပ်မှာလဲကြောက်တယ်။ဒါကလည်း ကျနော့ရဲ့ ပထမဆုံးတိုက်ပွဲဘဲ။ ဒီလိုမျိုးကြုံတွေ့ရ‌တော့ ကြောက်တာပေါ့” ဟု ဖမ်းဆီးခံရသူ တစ်ဦးက ပြောသည်။

ဖမ်းဆီးခံရသော တပ်သား ၉ ဦးသည် SSPP နှင့်တိုက်ပွဲဖြစ်ပွါးနေစဉ်က မိမိတို့ အဖွဲ့ခေါင်းဆောင်က တပ်မဆုတ်ချင်သဖြင့်မိမိတို့အား သေနတ်ဖြင့်ပြန်လည်ပစ်ခတ်မှုကြောင့် ဒဏ်ရာများရရှိခဲ့ခြင်းဖြစ်သည်ဟု ပြောကြားခဲ့သည်။ ဖမ်းဆီးခံရသော တပ်သား ၉ ဦးသည် ၎င်းတို့၏ နေရပ်ကိုသာပြန်မည် ဟုလည်း ပြောဆိုနေကြသည်။

“ ကျနော်တို့ကတော့ ကိုယ့်အိမ်ကိုပြန်မယ်။ တစ်ချို့ကတော့ တစ်ခြားမြို့ကို သွားပြီး အလုပ်သွားလုပ်မယ်။ ကိုယ့်ဘဝကို လွတ်လွတ်လပ်လပ်နဲ့ပဲ ဖြတ်သန်းချင်တော့တယ်။” ဟု ပြန်လည်လွှတ်မြောက်သည့် တပ်သား တစ်ဦးကပြောသည်။

SSPP/SSA နှင့် RCSS/SSA တို့သည် ဖေဖော်ဝါရီ ၁၅ ရက် ညနေပိုင်း က သီပေါမြို့နယ် နားမခေါ်အုပ်စု ကိတ်ဖွန်ရွာဘက်တွင် တိုက်ပွဲဖြစ်ပွားစဉ် RCSS/SSA တပ်ဖွဲ့ဝင် ၉ ဦးတိုက်ပွဲတွင်ကျဆုံးခဲ့ပြီး ဒဏ်ရာရသည့်တပ်သား ၉ ဦးကို SSPP/SSA ကဖမ်းဆီးရမိခဲ့သည်။

အဆိုပါဖမ်းဆီးရမိမှုတွင် RCSS တပ်သားများအားလုံးကို SSPP က သတ်ဖြတ်လိုက်သည် ဟု လူမှုကွန်ရက်တွင် သတင်းများပျံ့နှံ့ခဲ့ပြီး R.I.P 18 အနက်ရောင် ပရိုဖိုင်းများ ဖေ့စ်ဘုသုံးစွဲသူ သျှမ်းလူငယ်များအကြား ပျံ့နှံ့သွားခဲ့ပါသည်။

လက်ရှိတွင် အဆိုပါအဖမ်းခံရစစ်သည်များအား SSPP က ပြန်လည်လွှတ်ပေးသည့်အခမ်းအနားပြုလုပ်ခဲ့ခြင်းဖြစ်ပါသည်။