သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)ထိန်းချုပ်သည့် နယ်မြေအတွင်း လုံခြုံရေး အရ လာရောက်ခိုလှုံသည့်သူ (၁၀၀) နီးပါးရှိကြောင်း စုံစမ်းသိရသည်။

ဖေဖော်ဝါရီ ၁ရက် မနက်မှ စတင်ကာ နိုင်ငံတော်၏ အာဏာကို စစ်တပ်မှ သိမ်းယူလိုက်ပြီး၊ ထို့နောက် မြန်မာတဝှမ်းပြည်သူများ၊ အစိုးရဝန်ထမ်းများ၊ ပုဂ္ဂလိကဝန်ထမ်းများက စစ်အာဏာရှင်စနစ်ကျဆုံးရေးအတွက် ဆန့်ကျင်ဆန္ဒထုတ်ဖော်မှုကို ယနေ့ထိတိုင်အရှိန်အဟုန်မြင့်ကာ ပြုလုပ်နေကြသည်။

ထို့အပြင် စစ်အာဏာရှင်စနစ်အောက်တွင် အလုပ်မလုပ်လိုသဖြင့် အစိုးရဝန်ထမ်းများကလည်း အာဏာရှင်ဖီဆန်ရေး လှုပ်ရှားမှုဖြစ်သည့် (CDM) ကို ပူးပေါင်းပါဝင်လာကြသည်။

ထိုCDMပြုလုပ်သည့် ပြည်သူများကိုလည်း စစ်ကောင်စီ ၏ လက်နက်ကိုင်တပ်ဖွဲ့က နေ့စဉ်နဲ့အမျှ ဖမ်းဆီးချုပ်နှောင်မှုရှိသဖြင့် CDM လုပ်ထားသည့် အစိုးရဝန်ထမ်းများသည် လုံခြုံသည့်နေရာတွင် ပြောင်ရွှေ့ ရှောင်ပုန်းနေရပြီး၊ တချို့ မှာ ဖမ်းဆီးထိန်းသိမ်းထားခံရကြောင်း သိရသည်။

“ ကျနော်တို့ နယ်မြေထဲမှာလာခိုလှုံတဲ့သူ ရှိပါတယ်။ ဘယ်သူတွေပါလဲဆိုတာ လုံခြုံရေးအရ တိကျပြောလို့မရပေမယ့် ဦးရေကတော့ (၁၀၀)နီးပါးရှိပါတယ်။ ကျနော်တို့ နယ်မြေအပိုင်တာဝန်ခံဖုန်းနံပတ်တွေလည်း ပေးထားပါတယ်” ဟု RCSS/SSA ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့်ကို ပြောသည်။

RCSS/SSA ထိန်းချုပ်သည့် နယ်မြေ တာဝန်ခံဖုန်းနံပတ်များကိုလည်း Tai Freedom လူမှုကွန်ရက် စာမျက်နှာတွင် ကြေညာခဲ့သည်။

စစ်အာဏာရှင်ဆန့်ကျင်ဆန္ဒထုတ်ဖော်သူများ၊ အာဏာဖီဆန်ရေးလှုပ်ရှားမှုတွင် ပါဝင်သည့် ရဲ၊ စစ်သားများနှင့် အစိုးရဝန်ထမ်းအားလုံး မည်သူမဆို RCSS/SSA နယ်မြေအတွင်း လုံခြုံရေး အရ လာရောက်ခိုလှုံမည်ဆိုပါက လက်ခံပေးသွားမည် ဟုလည်း ဗိုလ်မှူးခမ်းစံ က ပြောသည်။

ယမန်နေ့ (မတ် ၉ )ရက်တွင် RCSS/SSA နှင့် ပြည်ထောင်စုလွှတ်တော်ကိုယ်စားပြု ကော်မတီ (CRPH)တို့ အလွတ်သဘောတွေ့ဆုံခဲ့ကြပြီးနောက် မိုင်းနောင်မြို့နယ် အတွင်း RCSS/SSA ကို တပ်မတော်က လိုက်လံတိုက်ခိုက်နေကြောင်း သိရသည်။