သီပေါမြို့ လူထုသပိတ် သေနတ်ပစ်ဖောက် စတင်ဖြိုခွင်းခံရ

သျှမ်းပြည်မြောက်ပိုင်း သီပေါမြို့တွင် ယနေ့ (မတ်လ ၁၀ ရက်) စစ်အာဏာရှင်ဆန့်ကျင်ဆန္ဒထုတ်ဖော်သည့် လူထုသပိတ်ကို ရဲ၊စစ်တပ်မှ သေနတ်ပစ်ဖောက်ကာ ဖြိုခွင်းမှုပြုလုပ်ခဲ့ကြောင်း သတင်းရရှိသည်။

စစ်အာဏာသိမ်းမှုကို ဆန့်ကျင်ဆန္ဒထုတ်ဖော်လာခဲ့သည်မှာ တလနီးပါးကြာလာခဲ့ပြီး၊ တကြိမ်တခါမျှ လူထုသပိတ်ဖြိုခွင်းမခံရဘဲ ယနေ့မှ စတင်ဖြိုခွင်းခံရကြောင်း သီပေါမြို့မှဆန္ဒထုတ်ဖော်သူများက ပြောဆိုလိုက်သည်။

“ ဒီနေ့ကတော့ သူတို့လာဖြိုခွင်းမယ်။ လုံးဝ ဆန္ဒသွားပြလို့မရအောင်လုပ်နေတာပါ၊။ ရေကား၊ စစ်ကားတွေနဲ့ အကုန်လာခဲ့တယ်။ စစ်ကားတွေလဲ တစ်ခြားဖက်ကနေလာတယ်” ဟု သီပေါမြို့ မှ တိကျသေချာသည့် သတင်းရင်းမြစ်တဦးက သျှမ်းသံတော်ဆင့်ကိုပြောသည်။

ယနေ့ မနက်ပိုင်း စစ်အာဏာရှင်ကို ဆန့်ကျင်ဆန္ဒထုတ်ဖော်ရန် လူစုနေချိန် ရဲများက ရောက်လာပြီး လူစုခွဲရန်၊ ဆန္ဒမပြရန် လာရောက်ညှိသော်လည်း သီပေါဒေသခံများက ဆက်လက်ပြသနေသဖြင့် ရဲတပ်ဖွဲ့က သေနတ်ဖြင့် ပစ်ဖောက်ကာ လူထုသပိတ်ကို ဖြိုခွင်းခဲ့ကြောင်း ၎င်းသတင်းရင်းမြစ်က ပြောပြသည်။

“ ဆန္ဒထုတ်ဖော်ဖို့ အချိန် (၁၅)မိနစ်ပေးတယ်။ ၁၅မိနစ်ကျော်ရင် လူစုခွဲဖို့ လာပြောတယ်။ ဒါပေမယ့် ပြည်သူတွေက လူစုမခွဲဘဲ ဆက်ပြတယ်။ အဲ့ဒါနဲ့ ရဲက သေနတ်ဖောက်ပြီး ဖြိုခွင်းလိုက်ပါတယ်။ ဒီလိုဖြိုခွင်းတာကတော့ ပထမဆုံးအကြိမ်ပါပဲ” လို့ ဆန္ဒထုတ်ဖော်ရာတွင် ပါဝင်သည့် အသက် ၃၅နှစ်အရွယ် အမျိုးသား တဦးက သျှမ်းသံတော်ဆင့်ကိုပြောသည်။

တလကျော်ကြာ စစ်အာဏာကို ဆန့်ကျင်ဆန္ဒထုတ်ဖော်လာပြီး ယနေ့မှ လူထုသပိတ်ကို ရဲ၊စစ်တပ်မှ စတင်ပြီး သေနတ်ပစ်ဖောက် ဖြိုခွင်းခဲ့ကြောင်း သိရသည်။

ယမန်နေ့တွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)နှင့် ပြည်ထောင်စုလွှတ်တော် ကိုယ်စားပြု ကော်မတီ (CRPH) တို့ အလွတ်သဘောတွေ့ဆုံမှုပြုလုပ်ခဲ့သည်။

ယခုကဲ့သို့သျှမ်းပြည် သီပေါမြို့ လူထု သပိတ်ကို အကြမ်းဖက်ဖြိုခွင်းမှုသည် ယမန်နေ့ RCSS/SSAနှင့် CRPH တွေ့ဆုံမှုနှင့် သက်ဆိုင်နိုင်ကြောင်း သျှမ်းပြည်လူထုများက ပြောဆိုလိုက်သည်။

“CRPH နဲ့ RCSS တို့‌ဆွေးနွေမှုကြောင့် ဒီနေ့ဆန္ဒပြတာကို ဖြိုခွင်းတယ်လို့ ယူဆလို့လဲရတယ်။ သူတို့က တိုင်းရင်းသားတွေကို အကောင်းမမြင်တာ ကြာလာပြီးလေ” ဟု နိုင်ငံရေး လေ့လာသုံးသပ်သူတဦးက ပြောပါတယ်။

ခေတ်အဆက်ဆက်ပြုလုပ်သည့် လုပ်နည်းအတိုင်းပဲ စစ်ကောင်စီလည်း ပြန်လည်ကျင့်သုံးနေကြောင်း စစ်အုပ်ချုပ်မှု အောက်တွင် နှစ်ပေါင်းများစွာနေထိုင်လာရသည့် တောင်ပေါ်တိုင်းရင်းသားအနေဖြင့် စစ်အာဏာကျဆုံးသည့်အထိ ဆက်လက်တိုက်ပွဲဝင်သွားမည်ဟုလည်း သီပေါပြည်သူများက ပြောဆိုလိုက်သည်။