သျှမ်းပြည် သီပေါမြို့နယ်တွင် “၁၀၂၇ စစ်ဆင်ရေး”ကြောင့် ပျက်စီးသွားသော နေအိမ်များကို လူမှုကူညီရေးအဖွဲ့များက ကူညီထောက်ပံ့ပေးသွားမည်ဟု သတင်းရရှိသည်။
လက်ရှိတွင် သီပေါမြို့ကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA က ထိန်းချုပ်ထားပြီး “၁၀၂၇ စစ်ဆင်ရေး”အတွင်း မြို့သိမ်းတိုက်ပွဲများကြောင့် ပြည်သူနေအိမ် ၂၀၀ ကျော် ပျက်စီးဆုံးရှုံးခဲ့ကြောင်း သိရသည်။
“တိုက်ပွဲကြောင့် ပျက်စီးသွားတဲ့ နေအိမ်တွေကို ပြန်ပြီးကူညီတာပါ။ ကျနော်တို့အနေနဲ့က ငွေသားပဲ ကူညီပေးသွားမှာပါ။ ပျက်စီးမှုအလိုက် ရာခိုင်နှုန်းခွဲပြီး ထောက်ပံ့သွားမယ်” ဟု သီပေါမြို့ နှလုံးသားပရဟိတအဖွဲ့မှ တာဝန်ရှိသူ တစ်ဉီးက သျှမ်းသံတော်ဆင့်ကို ပြောသည်။
ထိုပျက်စီးဆုံးရှုံးသွားသည့် နေအိမ်များထံ ထောက်ပံ့မှုကို နှလုံးသား ပရဟိတအဖွဲ့က ဉီးဆောင်ပြီး လူမှုရေးအဖွဲ့များမှ လှူဒါန်းငွေဖြင့် ကူညီနေခြင်းဖြစ်ကြောင်း သိရသည်။
TNLA နှင့် ပူးပေါင်းတပ်ဖွဲ့များ၏ သီပေါမြို့သိမ်း တိုက်ပွဲအတွင်း နေအိမ် ထိခိုက်ပျက်စီးမှု အများဆုံး ဖြစ်သည့် ဇာတ်စုရပ်ကွက်၊ တုံစင့်ကျေးရွာ၊ နားမုံကျေးရွာနှင့် မြို့ပေါ်ရပ်ကွက် အချို့ကို ပျက်စီးမှုအလိုက် ရာခိုင်နှုန်းခွဲဝေပြီး ကူညီသွားမည်ဟု ဆိုသည်။
“ကျနော်တို့ အနေနဲ့ ကျေးရွာအလိုက် ကွင်းဆင်းပြီး ကြည့်ရှုတယ်။ ကျေးရွာ ဒေသခံတွေနဲ့ ဆွေးနွေးတယ်။ ပြည်သူတွေလည်း ခက်ခဲနေချိန်ဆိုတော့ ကိုယ်တတ်နိုင်သလောက် လှူတာပါ” ဟု နှလုံးသား ပရဟိတအဖွဲ့မှ ၎င်းတာဝန်ရှိသူက ဆက်ပြောသည်။
သီပေါမြို့ပေါ်ရှိ တိုက်ပွဲအတွင်း ပျက်စီးသွားသည့် နေအိမ်များကို လူမှုကူညီရေးအသင်းများမှ ငွေကြေးထောက်ပံ့ ပေးနေကြောင်း၊ ပျက်စီးသွားသည့် အိမ်ခြေ တစ်အိမ်လျှင် ကျပ်ငွေ ၃ သိန်း ရရှိကြောင်း သီပေါမြို့မှ ဒေသခံ အမျိုးသမီးတစ်ဉီးက သျှမ်းသံတော်ဆင့်ကို ပြောသည်။
“ကျမ သိရသလောက်တော့ တစ်အိမ်ကို ကျပ်ငွေ ၃သိန်း ထောက်ပံ့တယ်။ အားလုံးတော့ မရသေးဘူး။ တုံစင့်ကျေးရွာဘက်က ထိခိုက်ပျက်စီးမှု အများဆုံးဖြစ်လိမ့်မယ်” ဟု ၎င်းဒေသခံ အမျိုးသမီး က ဆိုသည်။
TNLA သည် သီပေါမြို့ကို ၂၀၂၄ ခုနှစ် အောက်တိုဘာလ နှောင်းပိုင်းတွင် ထိန်းချုပ်နိုင်ခဲ့သော်လည်း လက်ရှိအချိန်ထိ ဒေသဖွံ့ဖြိုးရေး၊ မိုင်းရှင်းလင်းရေး လုပ်ဆောင်မှုများ မရှိသေးကြောင်း ဒေသခံများက ပြောဆိုသည်။
Leave a Comments