သျှမ်းပြည်မြောက်ပိုင်း နမ္မတူမြို့နယ် မန်စံကျေးရွာ အနီးတွင် ယနေ့ (ဖေဖော်ဝါရီ ၂၅)ရက် မနက် ၁၀နာရီခွဲမှ စတင်ကာ တိုင်းရင်းသားလက်နက်ကိုင် အချင်းချင်း တိုက်ပွဲ ပြင်းထန်စွာပြီး အရပ်သားနေအိမ်ကျည်ထိမှန်မှုရှိကြောင်း သတင်းရရှိသည်။

နမ္မတူမြို့နယ်အတွင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA)နှင့် မြောက်ပိုင်းမဟာမိတ်တပ်ဖွဲ့ ဖြစ်သည့် တအာင်း အမျိုးသားလွတ်မြောက်ရေးတပ်မတော်(TNLA)၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)တို့ ပူးပေါင်းကာ တိုက်ပွဲဖြစ်ပွားနေကြောင်း စုံစမ်းသိရသည်။

“ တိုက်ပွဲက တော့ မန်စံရဲ့ အနီးပတ်ဝန်းကျင်တွေမှာ ဖြစ်နေတယ်။ မနက် ၁၀နာရီခွဲကနေ အခုချိန်ထိ ဖြစ်နေသေးတယ်။ တိုက်ပွဲတွေက ပြင်းထန်နေတယ်” ဟု မန်စံ ဒေသခံ အမျိုးသားတဦး က သျှမ်းသံတော်ဆင့်ကို ပြောသည်။

တိုက်ပွဲဖြစ်ပွားသည့်နေရာသည် မန်စံကျေးရွာ နှင့် နီးနေသဖြင့် ဒေသခံ နှင့် စစ်ဘေးရှောင်များ၏ လုံခြုံရေးလည်း စိုးရိမ်နေရကြောင်း ၎င်း အမျိုးသားက ပြောသည်။

ယမန်(ဖေဖော်ဝါရီ ၂၄)ရက် ည ၈နာရီခွဲဝန်းကျင်တွင် တိုင်းရင်းသားလက်နက်ကိုင် အချင်းချင်း တိုက်ပွဲဖြစ်ပွားမှုကြောင့် မန်စံကျေးရွာရှိ နေအိမ်တလုံးပေါ် လက်နက်ကြီးကျခဲ့ပြီး နေအိမ် ပျက်စီးခဲ့ရကြောင်း၊ လူထိခိုက်မှုမရှိကြောင်းလည်း မန်စံ ဒေသခံများ ပြောပြချက် အရသိရသည်။

“ မနေ့က ည လက်နက်ကြီး တလုံးနေအိမ်ထိတယ်။ အိမ်တော့ပျက်စီးတယ်။ လူတော့မထိဘူး။ ရွာထဲထိ ရောက်တော့ ကျနော်တို့လည်း ကြောက်နေရ စိုးရိမ်နေရတယ်” ဟု စစ်ဘေးရှောင်များကို ကူညီပေးနေသည့် အမျိုးသားတဦးက ပြောသည်။

ထိုတိုက်ပွဲပြင်းထန်မှုကြောင့် ဘေးအကာမရှိသည့် စစ်ဘေးရှောင်များအတွက် စိုးရိမ်ရသဖြင့် ညတွင်းချင်း နေရာအပြောင်းအရွှေ့ပြုလုပ်ခဲ့ရကြောင်းလည်း စစ်ရှောင်ကူညီသူက ဆိုသည်။

“ ဘေး အကာတွေ မရှိတဲ့ စစ်ရှောင်အမျိုးသမီးတွေ ကလေးတွေနေတဲ့ နေရာကို မနေ့ည ကချက်ချင်း ပြောင်းရွှေ့ပေးရတာတွေရှိတယ်။ လက်နက်ကြီး၊ ကျည်ကျရင် အုတ်အခံမရှိတော့ ချက်ချင်းထိနိုင်တယ်လေ။ ဒါကြောင့် မနေ့ညက သူတို့ကို ဘုန်းကြီးကျောင်းဆောင်ထဲ တန်းပို့လိုက်ရတယ်” လို့ စစ်ရှောင်ကူညီပေးနေသည့် သူက ထပ်လောင်းပြောသည်။

လက်ရှိမှာ နမ္မတူမြို့နယ် မန်စံအတွင်းတွင် စစ်ရှောင် ၄၀၀ကျော်ရှိပြီး၊ တိုက်ပွဲများ ဆက်လက်ပြင်းထန်နေပါက စစ်ရှောင်များနေထိုင်သည့် မန်စံလည်း အန္တရာယ်ရှိနိုင်ကြောင်းသိရသည်။

ထို့ကြောင့် တိုက်ပွဲဖြစ်ပွားသည့် တိုင်းရင်းသားလက်နက်ကိုင်အချင်းချင်း တွေ့ဆုံဆွေးနွေးပေးရန် လည်း နမ္မတူ ပြည်သူများက တောင်းဆိုလိုက်သည်။