သျှမ်းပြည် မြောက်ပိုင်း သီပေါမြို့နယ် တွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA) နှင့် အစိုးရတပ် ယခုရက်ပိုင်း တိုက်ပွဲပြင်းထန်မှုဖြစ်ပွားနေကြောင်းစုံစမ်းသိရသည်။
သီပေါမြို့နယ် မိုင်းတုံကျေးရွာအုပ်စု ပန်ခါးကျေးရွာ အနီးတွင် RCSS/SSA နှင့် အစိုးရတပ် တို့သည် ယမန်နေ့ (ဖေဖော်ဝါရီ ၁၁)ရက်တွင် တိုက်ပွဲပြင်းထန်မှုဖြစ်ပွားခဲ့ပြီး တပ်မတော်ဘက်မှ တပ်သား ၂ဦး ကျဆုံးမှုရှိကြောင်း RCSS/SSA သတင်းပြန်ကြားရေးမှ စုံစမ်းသိရသည်။
“ မနေ့က တိုက်ပွဲ တနေကုန်ပဲ။ တပ်မတော်က ကျနော်တို့ RCSS/SSAကို လာပြီး ထိုးစစ်ဆင်တာ။ သီပေါမြိုု့နယ် ကျနော်တို့ ရှိနေတဲ့နေရာ အနှံ့ပဲ လာတိုက်တယ်။ အခုတော့ ငြိမ်တော့ငြိမ်နေတယ်။ ဒါပေမယ့် စစ်ရေးက တင်းမာနေတုန်းပဲ” ဟု RCSS/SSA မှ ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့်ကို ပြောသည်။
ဆက်လက်ပြီး ယမန်နေ့ ဖြစ်ပွားသည့်တိုက်ပွဲ တွင် အစိုးရတပ် ဘက်မှ တပ်သားကျရှုံးမှုရှိပြီး၊ အစိုးရတပ် ဘက်မှ လက်နက်ပစ္စည်းများလည်း RCSS/SSA ဘက်မှ သိမ်းဆည်းရမိကြောင်း၊ မြေပြင်သတင်းအချက်အလက် အသေးစိတ်ကို မသိရှိသေးကြောင်းလည်း ဗိုလ်မှူး ခမ်းစံ က ပြောသည်။
RCSS/SSA နှင့် အစိုးရတပ်တို့သည် ဖေဖော်ဝါရီ ၉ ရက်နေ့မှ စတင်ကာ ယမန်နေ့ (ဖေဖော်ဝါရီ ၁၁)ရက်ထိ သီပေါမြို့နယ် အတွင်း ၃ရက်ဆက်တိုက် တိုက်ပွဲဖြစ်ပွားခဲ့ကြောင်း၊ ယနေ့ မှာလည်း တပ်မတော်မှ နောက်ဆုတ်သွားခြင်းမရှိသေးသဖြင့် အချိန်မရွေး တိုက်ပွဲ ပြန်ဖြစ်နိုင်ကြောင်းလည်း ဗိုလ်မှူး ခမ်းစံက ပြောသည်။
“ အခု ချိန်ထိ တပ်မတော်က နောက်မဆုတ်သေးဘူး။ ရှိနေသေးတယ်။ အချိန်မရွေး တိုက်ပွဲပြန်ဖြစ်နိုင်တဲ့သဘောပဲ။ စစ်ရေးတင်းမာနေဆဲပါ” ဟု ဗိုလ်မှူးခမ်းစံက ထပ်လောင်းပြောသည်။
သီပေါမြို့နယ် အတွင်း RCSS/SSA နှင့် အစိုးရတပ်တို့ တိုက်ပွဲဖြစ်ပွားမှုကြောင့် ဒေသခံတချို့ စိုးရိမ်ထိတ်လန့်ပြီး မန်လီကျေးရွာအုပ်စု နားစင့်ကျေးရွာသို့ထွက်ပြေးလာရကြောင်း သိရသည်။
လက်ရှိ အခြေအနေမှာ မြန်မာနိုင်ငံသည် ဖေဖော်ဝါရီ ၁ရက် မှ စတင်ကာ တပ်မတော် မှ နိုင်ငံတော်၏အာဏာကို သိမ်းယူပြီး၊ ပြည်သူများက စစ်အာဏာရှင် စနစ်ကို မြန်မာပြည်အနှံ့ ဆန့်ကျင် ဆန္ဒထုတ်ဖော်နေကြသည်။
ထိုဆန္ဒပြမှုတွေ ဖြစ်နေသည့် ကြားက တနိုင်ငံလုံး အပစ်ခတ်ရပ်စဲရေး သဘောတူစာချုပ် (NCA)ထိုးထားသည့် RCSS/SSA ကို ထိုးစစ်ဆင်နေခြင်းသည် အာဏာသိမ်း အစိုးရ အနေဖြင့် NCAကို ချိုးဖောက်နေခြင်းဖြစ်ကြောင်းလည်း RCSS က ပြောဆိုလိုက်သည်။
ထို့ပြင် ယမန်နေ့တွင်လည်း သျှမ်းမြောက် ကွတ်ခိုင်မြို့နယ်တွင် သျှမ်းပြည် တိုးတက်ရေးပါတီ၊ သျှမ်းပြည်တပ်မတော် (SSPP/SSA)နှင့် အစိုးရတပ်တို့တိုက်ပွဲ ဖြစ်ပွားခဲ့ကြောင်းသိရသည်။
Leave a Comments