သျှမ်းပြည်မြောက်ပိုင်း ကွတ်ခိုင်မြို့နယ်တွင် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) နှင့် မြန်မာ့တပ်မတော်တို့သည် ယနေ့ (ဖေဖော်ဝါရီ ၁၁)ရက် မနက်ပိုင်းတွင် တိုက်ပွဲ စတင်ဖြစ်ပွားခဲ့ကြောင်းစုံစမ်းသိရသည်။
SSPP/SSA နှင့် မြန်မာ့တပ်မတော်သည် ကွတ်ခိုင်-နမ့်ဖက်ကာကြား နမ့်အုမ်ကျေးရွာ အနီးတဝှိက်တွင် ယနေ့ မနက် ၈နာရီ မှ စတင်ဖြစ်ပွားခဲ့ကြောင်း၊ တပ်မတော် တပ်မ (၉ ၉ )လက်အောက်ခံ တပ်ရင်း (၃)ရင်းသည် SSPP/SSA တပ်စခန်းရှိသည့်နေရာကို လာရောက်ထိုးစစ်ဆင်မှုကြောင့် တိုက်ပွဲဖြစ်ပွားရခြင်းဖြစ်ကြောင်း SSPP/SSA မြေပြင် တပ်သားပြောပြချက် အရသိရသည်။
“ ဒီနေ့ မနက် ၈နာရီ မှဖြစ်တာ တိုက်ပွဲက နေ့လည်ထိ ပြင်းထန်နေတုန်းပဲ။ တပ်က ကျနော်တို့တပ်စခန်းရှိတဲ့နေရာ ထိုးစစ်ဆင်လို့တိုက်ပွဲဖြစ်တာပါ” လို့ မြေပြင်တပ်သားက ဆိုသည်။
ထို့အပြင် ယမန်နေ့တွင်လည်း SSPP/SSAတပ်ရှိသည့်နေရာကို တပ်မတော် မှ လက်နက်ကြီးဖြင့် ပစ်ခတ်ခဲ့ကြောင်းလည်း သိရသည်။
“ မနေ့ကလည်း လက်နက်ကြီး ၃လုံးလောက်နဲ့ ကျနော်တို့ တပ်စခန်းနေရာကို ဦးတည်ပြီး ပစ်တယ်။ တိုက်ပွဲက တော့ ပြင်းထန်လာမယ်ထင်တာပဲ” လို့ တပ်သား က ဆက်လက်ပြောပြသည်။
သီပေါမြို့နယ် အတွင်း သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) နှင့် အစိုးရတပ်မတော်တို့သည် ဖေဖော်ဝါရီ ၉ ရက် နှင့်ဖေဖော်ဝါရီ ၁၀ရက် တိုက်ပွဲ ပြင်းထန်ခဲ့သည်။
ဖေဖော်ဝါရီ ၁ရက် မနက်တွင် တပ်မတော် မှ နိုင်ငံတော်၏ အာဏာကို သိမ်းယူလိုက်ပြီးနောက် ပြည်သူများက စစ်အာဏာသိမ်းယူမှုကို ဆန့်ကျင်ဆန္ဒပြ တနေ့ထက် တနေ့အရှိန်မြင့်လာသည်။
“အခုဖြစ်နေတဲ့ တိုက်ပွဲက ဆန္ဒပြတာတွေကို တဖက် အာရုံလွှဲနေတဲ့သဘောပဲ။ပြည်သူတွေကို အာရုံလွှဲချင်လို့ ရှမ်းလက်နက်ကိုင်တွေကို လိုက်ပစ်နေတာ” ဟု ကွတ်ခိုင် ဒေသခံပြည်သူတဦးက ပြောသည်။
Leave a Comments