နောင်ချို ရွေးကောက်ခံ ပြည်သူ့လွှတ်တော် ကိုယ်စားလှယ် ဦးထွန်းထွန်းဟိန် ထိန်းသိမ်းခံရ

0

သျှမ်းပြည် မြောက်ပိုင်း နောင်ချိုမြို့နယ်မှရွေးကောက်ခံ ပြည်သူ့လွှတ်တော် ကိုယ်စားလှယ် ဦးထွန်းထွန်းဟိန်ကို ယနေ့(ဖေဖော်ဝါရီ ၁၀)ရက် ညနေပိုင်း ၄ နာရီခွဲခန့်တွင် ၎င်းနေထိုင်ရာ ကျောက်တောကျေးရွာ နေအိမ်မှ လာရောက်ခေါ်ယူ သွားကြောင်း မိသားစုဝင်များထံမှသိရသည်။

“အရပ်ဝတ် စရဖတွေနဲ့ နယ်မြေခံ ရဲတွေ လာခေါ် သွားတာပါ။ ဘယ်ကို ခေါ်သွားမယ်ဆိုတာကို ကျွန်တော်တို့ မသိရပါဘူး။ မကြာပါဘူးလို့တော့ ပြောသွားတယ်” ဟု ဦးထွန်းထွန်းဟိန်၏ မိသားစုဝင်တစ်ဦး ဖြစ်သူ ကိုအေးချမ်းဟိန်က ပြောသည်။

ဦးထွန်းထွန်းဟိန်သည် ယခင် အစိုးရသက်တမ်းတွင် ၂၀၁၈ ခုနှစ်မှ စတင်ပြီး ပြည်သူ့လွှတ်တော် ဒုဥက္ကဌ တာဝန် ယူထားခဲ့သူ ဖြစ်ကာ ၂၀၂၀ အထွေထွေ ရွေးကောက်ပွဲတွင် အမျိုးသား ဒီမိုကရေစီ အဖွဲ့ချုပ်(NLD) နောင်ချိုမြို့နယ် ပြည်သူ့လွှတ်တော် ကိုယ်စားလှယ် ဝင်ရောက်ယှဉ်ပြိုင် အနိုင်ရခဲ့သူ ဖြစ်သည်။

စစ်အာဏာသိမ်းသည့် ဖေဖော်ဝါရီလ ၁ ရက် တွင် အခြားနိုင်ငံ့ခေါင်းဆောင်များနှင့်အတူ ဖမ်းဆီးထိန်းသိမ်းခံခဲ့ရပြီး ဖေဖော်ဝါရီလ ၇ ရက်နေ့တွင် ပြန်လည် လွှတ်မြောက်လာခဲ့ကာ ယနေ့သည် ဒုတိယအကြိမ် ပြန်လည် အထိန်းသိမ်းခံရခြင်းဖြစ်ကြောင်းသိရသည်။

ထို့အပြင် နောင်ချိုမြို့နယ်အတွင်း အခြား ရွေးကောက်ခံ ကိုယ်စားလှယ်တချို့ နှင့် စစ်အာဏာသိမ်းမှုကို ဆန့်ကျင်သည့် တက်ကြွလှုပ်ရှားသူ တချို့လည်း မကြာခဏခေါ်ယူစစ်မေးခြင်းခံနေရသည်။

NLD မှ ရွေးကောက်ခံ ပြည်နယ်လွှတ်တော် ကိုယ်စားလှယ် ကိုအောင်မြင့်ထွန်းကို စစ်အာဏာသိမ်းမှုစတင်သည့် ဖေဖော်ဝါရီ ၁ ရက်နေ့တွင် တစ်ကြိမ်၊ ဖေဖော်ဝါရီ ၉ ရက်တွင် တကြိမ် နေအိမ်မှ ခေါ်ယူ ထိန်းသိမ်းခဲ့သည်။

ယနေ့ (ဖေဖော်ဝါရီလ ၁၀) ရက် မနက်ပိုင်းတွင် နောင်ချို မြို့နယ်အတွင်း Civil Disobedience Movement အတွက် ဆောင်ရွက်နေသော ကျောင်းဆရာတစ်ဦးကိုလည်း နေအိမ်မှ လာရောက်ခေါ် ဆောင် စစ်ဆေး မေးမြန်းခဲ့ကြောင်း သိရသည်။

နောင်ချိုမြို့တွင် စစ်အာဏာသိမ်းမှုကို ဆန့်ကျင်သည့် လူထု လှုပ်ရှားမှုများကို ဖေဖော်ဝါရီလ ၇ ရက်နေ့ ည ၈ နာရီတွင် စတင်ခဲ့ကြပြီး ယနေ့အထိ အရှိန်မြင့်ကာ ဆက်လက်လှုပ်ရှားနေဆဲ ဖြစ်သည်။

Leave a Comments